Salmos 141 - New Testament Psalms and Proverbs in Mixtec Magdalena Peñasco

Salmo 141 Sukan kakan‑ta'vi o nuu Su'si ma ja na ko koto va'a ña'a ya, sukan‑va'a kaku o nuu ja u'vi ma

¹ Su'si Iya Tátnuni, maa ni ndákune'e sa. Koniniso'o ni ora na kakan‑ta'vi sa ma, te kii kunu tna ni, ki chindee ña'a ni.

² Te ndaka ja jikan‑ta'vi sa ma na kenda onde nuu iyo ni a sukan kénda xiko ja jáxiko asi ka ndataa ñayii ma. Te kó kuu ja ndóne'e sa nda'a sa ya ora jikan‑ta'vi sa ma nuu ni ma, sukan kúu ja va'a ka ndataa ñayii ma ora jañini ma.

³ Su'si Iya Tátnuni, jikan‑ta'vi sa nuu ni ja kasi ndee kasi ndoso ni yu'u sa ya, te máko ndakune sa yu'u sa a te ko ka'an sa in ja masu kuatniñu.

⁴ Te máko kua'a ni tnu'u ja ko kani ini sa ja u'vi ma, te ni a máko kua'a ni tnu'u ja ko sa'a sa ja u'vi te kuiso kuechi sa nuu ni, ni a ko ketna'a ini sa ji'in ñayii ka sa'a ja u'vi ma te ko kaa sii ini sa ji'in i xita nuu ka ndatna'a i ja ka jaa i xita ma, vi Su'si.

⁵ ¡Naka vii naka va'a ko kuu ja ñayii sa'a ja va'a ja ndaa ma, te suu i jin ko kuu ñayii jin ndaka'an‑so'o nuu sa a, nú masu va'a‑ni sa'a sa ma! Chi ja sukan ma chi kuenda tnu'u ja sukan kúu ndute jáxiko asi ka chi'i ñayii ma maa i ma ko kuu ja ndaka'an‑so'o ñayii ma nuu sa ma. Te saña chi koniniso'o sa ja ndaka'an ja ndakachi i nuu sa ma, te ma saxiko sa, vi Su'si. Visi tnundo'o xeen sukan jin ndaka'an‑so'o i ma, kovaa saña chi kakan‑ta'vi kakan‑ta'vi sa nuu ni ja ñayii ka sa'a ja u'vi ma, te máko jin ko sa'a‑ka i, vi Su'si.

⁶ Te tee ka tatnuni nuu ñayii ka sa'a ja u'vi ma chi jin kun‑kava de onde sukun nuu ka iyo de ma, te jin kuni de ja tnu'u ká'an sa ya chi tnu'u ndaa tnu'u ndija kúu.

⁷ Te sa'a‑nka jin ka'an de: “Ni ka jitenuu, ni ka jiteni'ni yiki o a nuu ñu'ú ya, te ni ka sakanuu, ni ka sakani'ni i. Sukan kúu ora ndáta'vi ndásaka tee jitu ma itu de ma, sukan ni ka jitenuu, ni ka jiteni'ni yiki o ma yu'u yavi nuu ka yinee o a”, jin ka'an de.

⁸ Kovaa saña, vi Su'si Iya Tátnuni, nuu maa ni kúkanu ini sa, te ko koto va'a ni anua sa ya, te máko xndoo ña'a ni nuu ja u'vi ma.

⁹ Chindee ña'a ni ja na kaku sa nuu ja ni ka satu'va ñayii ka sa'a ja u'vi ma ja jin ke'en su'va ña'a i ma.

¹⁰ Su'va na jin ndê koo maa i nuu ni ka satu'va i ja jin ke'en su'va ña'a i ma, nani saña chi ya'a ndita sa kua'an sa, vi Su'si.