Salmos 14 - New Testament Psalms and Proverbs in Mixtec Magdalena Peñasco

Salmo 14 Ñayii ndee ini ma chi ñatuu ndánduku i Su'si ma

¹ Ñayii ñatuu kuiti ndása'a kuenda ma chi jani ini i ja ñatuu na Su'si ma iyo. Te ndaka ñayii yukan ma chi ka kuneé ka ku‑uun‑ni i, te ndimaa ja u'vi ma‑ni ka sa'a i, tna'a ja masu nde játna ini Su'si ma. Te ni a in ñayii ñatuu sa'a ja va'a.

² Onde andivi ma nde'ya nde'ya‑ni Iya Tátnuni ma nuu ka iyo sa'ya tata ñayii a, sukan‑va'a nú iyo in ñayii ja ndása'a i kuenda te ndánduku i Su'si ma.

³ Kovaa ndi‑in ndi‑in i siin siin ichi ni ka tnii i, te ka kuneé ka ku‑uun‑nka i. Ñatuu na in sa'a ja va'a, va ni a in ñayii sa'a ja va'a, vaa ni ka xndoo i ichi va'a ma.

⁴ Ndaka i, ñatuu na nde ka ndasa'a maa i kuenda ndaka ja u'vi ka sa'a i ma. Vaa kuenda tnu'u ja ka jaa i in xtatila ma‑ni, sukan‑ni kúu ora ka sa'a ndeva'a i ñayii ñuu ya ma, vaa masu in ja yii‑ni kúu, ka jani ini i, vaa ñayii masu ka yu'u Su'si o Iya Tátnuni ma ka kuu i.

⁵ Kovaa jin ndayu'u xen‑xeen maa i ja jin kuni i, vaa Su'si ma chi yika‑ni a ndaka ñayii ka kandija ya ma‑ni iyo ji'in ya.

⁶ Te ñayii ndákunitnuni ja jiniñu'u i Su'si ma, ndáka'an‑so'o i nuu ñayii ñatuu ka kandija ya ma, kovaa ñayii ñatuu kándija Su'si ma chi jákundee i ñayii ndáka'an‑so'o nuu i ma, te visi sukan ka sa'a i ma, kovaa Iya Tátnuni ma chi jito vava'a ya ñayii kándija ja ká'an ya ma.

⁷ ¡Nuna kava va'a ini maa Su'si ma, te onde ñuu nuu iyo ya ma, te sa'a ya ja na jin kaku ñayii ñuu Israel ma! Kivi sa'a Iya Tátnuni ma ja ndaka ñayii ni ka jitenuu te ni ka yo jinukuechi i in‑ka ñuu ma, jin ndakokuiñi i ñuu maa i ma, sani te jin ndusii ini ndaka sa'ya tata Jacob ma, ja ka kuu i ñayii ñuu Israel ma.