Salmos 139 - New Testament Psalms and Proverbs in Mixtec Magdalena Peñasco

Salmo 139 Su'si ma chi ni‑ka'nu iyo ya, te jini ya ndaka nawa sa'a nawa kúu o ma

¹ Su'si maa sa, maa ni kúu iya jitotnuni ña'a, te jini ña'a ni.

² Maa ni jini ña'a nuu núkoo núkuiñi sa. Visi onde jika ma iyo sa, kovaa jini ni nawa jani ini sa.

³ Maa ni, vivii jito ña'a ni ndenu kua'an ndenu vee sa. Nawa sa'a nawa kúu sa, ndaka tu'u jini ni.

⁴ Vaa visi ñatuu ka'an‑ka sa, kovaa maa ni, vi Su'si, chi jâ jini ni nawa jani ini sa ja ka'an sa ma.

⁵ Vaa ichi nuu sa ichi yata sa iyo ni, te nda'a ni a iyo siki sa a.

⁶ Te ndaka sukan sa'a sukan kúu ni ma, masu kuu ndaka'an sa ndaka, vaa kua'a xeen ja sa'a ni ja kuu sa, ni masu kuu jaku'ni ndi'i ini sa ja sukan va'a ini ni a.

⁷ ¿Ndenu ki'in sa ja ma kuni ña'a Xtumani maa ni a? ¿Nde ichi kunu sa, ja ki'in sa in nuu ñatuu ni iyo?

⁸ Nuna kaa sa onde andivi ma, te yukan iyo maa ni, te nuna kêe sa onde kunu kunu chii ñu'ú a, te koo sa yukan, kovaa onde yukan, te nde'ya ña'a ni.

⁹ Te nute kuu ndava sa te ki'in sa onde in‑ka yu'u mar ma te koo sa yukan,

¹⁰ te visi onde yukan chi skuili ni nda'a kua'a ni a, te ndatnii ña'a ni, te ndaskaka ña'a ni ichi va'a ma, te ni masu ndaxsiaa‑ka ña'a ni.

¹¹ Visi na ka'an sa ja masu kuni ña'a ni nuu nee xeen ma, kovaa onde yukan chi xtnuu ni ñu'u maa ni ma nuu iyo sa ma, te kuni ni nawa sa'a sa ma.

¹² Vaa visi nuu nee ma, masu nawa kuyu'u nuu maa ni. Vaa jakuaa ma chi ndii sukan ndii nduu ma, te nuu nee ma ji'in nuu ndu'va ñu'u ma chi inuu‑ni ka kuu i nuu maa ni, vi Su'si.

¹³ Vaa maa ni ni sa'a ni‑ka'nu yikikuñu sa a, te maa ni ni sa'a ña'a onde chii si'i sa ma.

¹⁴ Te maa sa chi ndachiñu'u ña'a sa, vaa vivii ni sa'a ña'a ni, vaa vivii kúu ja ni sa'a ni a, jani ini sa, vi Su'si, te kúu sii ini xeen sa, te vitna chi jâ ni jaku'ni vava'a ini sa ja maa ni ni sa'a ña'a.

¹⁵ Maa ni ni jini naxe ni kuva'a yikikuñu sa a, nani yikuu ka jakona'a yiki sa a, nani ve jin kua'nu yiki sa a nuu iyo yu'u ma onde chii si'i sa ma, sukan yu'u iyo chii ñu'ú ma nuu ñunee sa ma.

¹⁶ Kovaa maa ni chi nde'ya nde'ya‑ni ña'a ni sukan ve kuva'a yikikuñu sa ma, te nuu libru ni ma jâ yoxtnee ndaka kivi koteku sa ma, visi ñatuu kâku‑ka sa ma.

¹⁷ ¡Naka vivii kúu ja jani ini ni ja kuu sa, vi Su'si maa sa! Kua'a xen‑xeen kúu, nuna ndasa'a sa kuenda.

¹⁸ Vaa nuna ndaka'vi sa ja sa'a ni ja kuu sa ma chi jini sa ja kua'a xeen‑ka kúu sana ñuti ma. Te visi na kusu sa te ndoto sa, te iyo sa ji'in ni, vi Su'si.

¹⁹ Su'si maa sa, ja ndaa kúu ja ndijin chi sa'a ni ja jin kûu ñayii ka sa'a ja u'vi ma, te xtandiyo ni ñayii ka ja'ni in‑ka ñayii ma nuu iyo sa a.

²⁰ Vaa ka ka'an u'vi i ja kuu ni. Vaa ndaka ñayii ñatuu ka kunimani nuu ni ma chi visi ka ndakune'e ña'a i, kovaa masu nde jiniñu'u ja ka sa'a i ma.

²¹ Iya Tátnuni, saña chi ndákiti xeen ini sa nuu ñayii ka saxiko ña'a ndijin ma. Te ûni ndákiti xeen ini sa nuu ñayii ñatuu ka kunimani nuu ni ma, vi Su'si.

²² Ûni ñatuu kúnimani kuiti sa nuu i, te ûni saxiko sa i.

²³ Te kototnuni ña'a ni, vi Su'si, te kuni ni ja ñu'u ini anua sa a, te kototnuni ni janitnuni sa a, te kuni ni ja jani ini sa a.

²⁴ Te nú kua'an sa ichi u'vi ma, má kua'a ni tnu'u, su'va ndaskaka ña'a ni ichi nuu koteku sa ni‑kani ni‑jika ma, vi Su'si.