Salmos 138 - New Testament Psalms and Proverbs in Mixtec Magdalena Peñasco

Salmo 138 Sukan ndakuan‑ta'vi o nuu Su'si ma ja ni ndakone'e ya ja ni jikan‑ta'vi o nuu ya ma

¹ Su'si maa sa, ni‑yu'u ni‑anua sa ndachiñu'u ña'a sa, visi ka nde'ya ña'a maa ja ka tatnuni ñuu ñayivi ya. Kovaa nuu maa ni kata sa salmo, vaa maa ni kúu Su'si ndija.

² Jinkoo jiti sa ini veñu'u ii ni a, te ndaka'an ndakachi sa sukan nda'vi ini ni a, vaa maa ni, vi Su'si, chi sa'a ni sukan ká'an ni ma, te kua'a ñayii, ka ndakunitnuni i ndaka sukan sa'a sukan kúu ni a sukan ká'an tnu'u maa ni a, te ka ndachiñu'u ña'a i.

³ Vaa kivi ni ndakune'e ña'a sa ma chi ni chindee ña'a ni, te ni ndani'i ini anua sa ya tnu'u ndee tnu'u ndatnu.

⁴ Ndaka rey ka iyo ñuu ñayivi a, jin ndachiñu'u ña'a de maa ni, vi Su'si, vaa ni ka jiniso'o de sukan ká'an ni ma.

⁵ Te jin kata de te jin ndaka'an de tnu'u ni kaxtnu'u maa ni a, vaa jayiñu'u maa ni a chi ja ka'nu xeen kúu.

⁶ Vaa Su'si Iya Tátnuni, iya iyo onde sukun ma kúu ni, te ndí ini ni ja jin kuu ñayii nda'vi ma. Kovaa jika‑ni nde'ya ni ñayii ka jani ini ja maa i ka kuu‑ka ma.

⁷ Vaa nú iyo yika sa nuu tnundo'o ma chi maa ni sa'a ja kaku sa te koteku sa. Vaa skuili ni nda'a ni ji'in tnu'u ndee tnu'u ndatnu ni ma, te sa'a ni ja kaku sa nuu ñayii ka kuni u'vi nuu sa ma te ka ndakiti ini i nuu sa ma.

⁸ Iya Tátnuni, maa ni chi sa'a ni sukan ni jani ini ni ja sa'a ni ja kuu sa ma. Su'si, tnu'u nda'vi ini ni a chi ni‑kani ni‑jika iyo, te máko xndoo nda'vi xndoo kee ña'a ni saña ja kúu sa ñayii ni sa'a maa ni ji'in nda'a ni a.