Salmos 137 - New Testament Psalms and Proverbs in Mixtec Magdalena Peñasco

Salmo 137 Sukan ka ndakani ini ñayii ñuu Israel ma ja ni ka kunda'a ña'a maa ñayii ñuu Babilonia ma

¹ Yu'u yute ñuu Babilonia ma ni ka yo nukoo sa, te ni ka yo nda'yu sa ja ka ndaka'án sa ñuu Sion ma.

² Te ne'un tnu jatnu ma ni ka yo jata kaa sa arpa yutnu ka tee sa yaa ma.

³ Te ñayii ni ka jeka ña'a ja jin kunukuechi sa nuu i ma, ni ka yo ka'an i ja na jin kata sa. Te ndaka maa ñayii ni ka xtandee ndaka ja ka neva'a sa ma ka ka'an ja jin kata sii ini sa, te sa'a ni ka yo ka'an i: “Jin kata ni jaku yaa ka jita ni ñuu Sion ma”, ka kuu i ka ka'an i.

⁴ Saña chi masu jin kata sa yaa ka jita sa nuu maa Su'si Iya Tátnuni ma in‑ka ñuu nuu masu ñuu sa kúu ma.

⁵ Ñuu Jerusalén, nuna kenda ja ndunaa ña'a ri, na yichi nda'a kua'a ri a.

⁶ Te yaa ri a na ndatnii tna'a ji'in nda'nda ri a, nú ma ndaka'án ña'a ri, vi ñuu Jerusalén, te nú ora iyo sii ini ri ma, te ñatuu ndaka'án ña'a ri te na ndo'o maa ri sukan.

⁷ Su'si Iya Tátnuni, ndaka'án ni sukan ni ka ka'an ñayii ñuu Edom ma nuu ni ka xnaa ñayii ma ñuu Jerusalén ma, ja sa'a ka kayu'u i ma: “Jin xnaa ni, jin xnaa ni, onde nuu ni ka keja'a i ni ka chutna'a i ma, jin xnaa ni”, ka kuu i ka kayu'u i ma.

⁸ Ñayii ñuu Babilonia, suni jin xnaa tna ña'a i ndijin. Ja vava'a kó kuu ñayii kenda te ndasa'a ña'a i sukan ni ka sa'a ña'a ni ma.

⁹ Ja vava'a kó kuu ñayii tnii suchi kuechi ni a te skana ndee i suchi a nuu toto ma te jin kûu i.