Salmos 136 - New Testament Psalms and Proverbs in Mixtec Magdalena Peñasco

Salmo 136 Jín ndachiñu'u o Su'si ma, vaa ni‑kani ni‑jika kúnda'vi ini ña'a ya

¹ Jín ndachiñu'u o Su'si o iya tátnuni nuu o a, vaa iya va'a ini kúu ya, te ni‑kani ni‑jika nda'vi ini ya sa'ya ya ma.

² Jín ndachiñu'u o Su'si o iya téku ma sana ja ka ka'an i ja su'si i ka kuu ma, vaa Su'si ndija ma chi ni‑kani ni‑jika nda'vi ini ya sa'ya ya ma.

³ Jín ndachiñu'u o Su'si o iya tátnuni‑ka sana tee ka tatnuni ma, vaa ni‑kani ni‑jika nda'vi ini ya sa'ya ya ma.

⁴ Jín ndachiñu'u o maa in‑ni iya kúu sa'a milagru ma, vaa ni‑kani ni‑jika nda'vi ini ya sa'ya ya ma.

⁵ Jín ndachiñu'u o maa iya ni jani va'a ini naxe ko kuu andivi ma te ni sa'a ya ma, vaa ni‑kani ni‑jika nda'vi ini ya sa'ya ya ma.

⁶ Jín ndachiñu'u o maa iya ni ndasunkani ñu'ú a nuu ñu'u kua'a ndute ma, vaa ni‑kani ni‑jika nda'vi ini ya sa'ya ya ma.

⁷ Vaa maa ya ni sa'a ja na'nu ka tnuu ñuu ñayivi a nduu ma ji'in jakuaa ma, vaa ni‑kani ni‑jika nda'vi ini ya sa'ya ya ma.

⁸ Vaa maa ya ni sa'a kandii ma, ja tnuu i nduu ma ñuu ñayivi a, vaa ni‑kani ni‑jika nda'vi ini ya sa'ya ya ma.

⁹ Te suni maa ya ni sa'a yoo ma ji'in tiuxini ma, ja jin kotnuu i jakuaa ma, vaa ni‑kani ni‑jika nda'vi ini ya sa'ya ya ma.

¹⁰ Jín ndachiñu'u o iya ni sa'a ja ni ka ji'i ndaka sayii xinañu'u ñayii ñuu Egipto ma, vaa ñatuu ni ka kandija i ya ma, vaa ni‑kani ni‑jika nda'vi ini ya sa'ya ya ma.

¹¹ Te suni maa ya ni ndene'e sa'ya tata Israel ma ja ka kuu i ñuu maa ya ma ne'un ñayii ñuu Egipto ma, vaa ni‑kani ni‑jika nda'vi ini ya sa'ya ya ma.

¹² Ji'in tnu'u ndee tnu'u ndatnu ya ma, te ni skuili ya nda'a ya ma ja ni ndene'e ya ñuu ya ma, vaa ni‑kani ni‑jika nda'vi ini ya sa'ya ya ma.

¹³ Te suni maa ya ni sa'a ja ni te'nde sasava nuu ndute Mar Rojo ma te ni ndanune ichi jin koo i ma, vaa ni‑kani ni‑jika nda'vi ini ya sa'ya ya ma.

¹⁴ Te ni sa'a ya ja ni nduu ñu'ú yichi nuu ni ka jika i ja ni ka ya'a i ma, vaa ni‑kani ni‑jika nda'vi ini ya sa'ya ya ma.

¹⁵ Te maa ya ni sa'a ja ni ndatna'a nuu ndute ma, te ni ka kêe koo Faraón ma ji'in ndaka soldado de ma nuu Mar Rojo ma, vaa ni‑kani ni‑jika nda'vi ini ya sa'ya ya ma.

¹⁶ Jin ndachiñu'u ni maa iya ni yo jito va'a ñayii ñuu ya ma ichi nuu masu nawa iyo kuiti ma, vaa ni‑kani ni‑jika nda'vi ini ya sa'ya ya ma.

¹⁷ Iya ni ja'ni ndaka rey ñuu na'nu ma, sukan‑va'a jin kaku ñayii ñuu ya ma, vaa ni‑kani ni‑jika nda'vi ini ya sa'ya ya ma.

¹⁸ Iya ni ja'ni rey ka tatnuni‑ka ma, sukan‑va'a jin kaku ñayii ñuu ya ma, vaa ni‑kani ni‑jika nda'vi ini ya sa'ya ya ma.

¹⁹ Jin ndachiñu'u ni iya ni ja'ni rey ñuu amorreo ma ja nani de Sehón ma, sukan‑va'a jin kaku ñayii ñuu ya ma, vaa ni‑kani ni‑jika nda'vi ini ya sa'ya ya ma.

²⁰ Iya ni ja'ni rey tátnuni ñuu Basán ma, ja nani de Og ma, sukan‑va'a jin kaku ñayii ñuu ya ma, vaa ni‑kani ni‑jika nda'vi ini ya sa'ya ya ma.

²¹ Jin ndachiñu'u ni iya ni ndakua'a ñu'ú ndaka tee ya'a nuu ñayii ñuu ya ma, vaa ni‑kani ni‑jika nda'vi ini ya sa'ya ya ma.

²² Iya ni ndaskuta'vi ñu'ú ñuu yukan nuu sa'ya tata Israel ma, ñayii ka jinukuechi nuu maa ya ma, vaa ni‑kani ni‑jika nda'vi ini ya sa'ya ya ma.

²³ Te suni maa ya kúu iya ni ndaka'án ña'a nuu ka ndo'o ka neni o ma, vaa ni‑kani ni‑jika nda'vi ini ya sa'ya ya ma.

²⁴ Te ni ndatava ña'a ya nuu nda'a suchi ñatuu ka kunimani nuu o ma, vaa ni‑kani ni‑jika nda'vi ini ya sa'ya ya ma.

²⁵ Te maa ya kúu iya táa ja ka jaa ndaka o ja ka teku o a, te suni wa'a ya ja ka jaa ndaka kiti ka iyo ñuu ñayivi a, vaa ni‑kani ni‑jika nda'vi ini ya sa'ya ya ma.

²⁶ Jín ndachiñu'u o Su'si o iya iyo onde andivi ma, vaa ni‑kani ni‑jika nda'vi ini ya sa'ya ya ma.