Salmos 135 - New Testament Psalms and Proverbs in Mixtec Magdalena Peñasco

Salmo 135 Maa in‑ni Su'si ndija ma kúu sa'a ndaka

¹ Jín ndachiñu'u o Su'si o Iya Tátnuni ma. Ndaka o ja ka jinukuechi o nuu Su'si o Iya Tátnuni ma, ñukuun ñukuun jin ndachiñu'u o ya.

² Ndaka o ja ka iyo o ini ve'e Iya Tátnuni ma ji'in nuke'e ve'e Su'si iya tátnuni nuu o a, vivii jín ndachiñu'u o ya.

³ Jín kata o nuu Iya Tátnuni ma, vaa iya va'a xeen ini kúu ya. Jín kata o yaa ja ká'an jayiñu'u ja kuu Su'si ma, vaa iya nda'vi ini kúu ya.

⁴ Vaa Su'si o Iya Tátnuni ma chi ni kaji ya sa'ya tata Jacob ma ja na jin ko kuu i sa'ya maa ya ma, te Israel ma ko kuu ñuu maa ya ma.

⁵ Vaa jini sa ja Su'si o ma chi iya ka'nu xeen kúu ya, te suu ya tátnuni nuu ndaka o, te maa in‑ni ya kúu iya tátnuni sana ndaka ja ka ka'an ñayii ma ja su'si i ka kuu ma.

⁶ Vaa ndaka ja kúni Iya Tátnuni ma chi sa'a ya, kúu onde andivi ma, xi nuu ñu'ú ya, xi nuu mar ma, xi onde nuu kunu xeen ma.

⁷ Vaa kúu sa'a ya ja nána viko ni‑ka'nu nuu ñu'ú ya te ndáa andivi ma. Sani te sa'a ya ja jándute ma, sukan‑va'a kuun savi ma. Sani te sa'a ya ja yi'i xen‑xeen tachi ma.

⁸ Vaa maa ya kúu iya ni sa'a ja ni ka ji'i ndaka sayii xinañu'u ndaka ñayii ñuu Egipto ma. Te suni ni sa'a ya ja ndaka kiti yii ni ka kâku xinañu'u ma, ni ka ji'i ti kivi yukan.

⁹ Te suni maa ya ni sa'a ndaka milagru nuu ndaka ñayii ñuu Egipto ma, sukan‑va'a ndo'o neni Faraón ma, ji'in ndaka ñayii ka jinukuechi nuu de ma.

¹⁰ Te suni maa ya kúu iya ni sa'a ja kua'a ñuu ni ka naa te ni ka ji'i rey ka tatnuni xen‑xeen ma.

¹¹ Vaa sukan ni sa'a ya ji'in tee ni yo nani Sehón ma ja ni yo kuu de rey ñuu amorreo ma, te suni sukan ni sa'a ya ji'in tee ni yo nani Og ma ja ni yo kuu de rey ñuu Basán ma, ji'in ndaka tee ni ka yo kuu rey ñuu Canaán ma.

¹² Te onde sukan ni sa'a ya ma ja ni xnaa ya ñayii yukan ma, te ni ndakua'a ya ñu'ú yukan ja ni ka nduta'vi ñayii ñuu Israel ma.

¹³ Saa vi, Iya Tátnuni, ni‑kani ni‑jika iyo ni, te jin ndaka'án ña'a sa ji'in sa'ya tata sa ma ji'in sa'ya tata i ma, vi Su'si Iya Tátnuni.

¹⁴ Vaa Iya Tátnuni ma chi ndakan ya kuenda nuu ñayii kúu ñuu ya ma, te kunda'vi ini ya ñayii ka jinukuechi nuu ya ma.

¹⁵ Kovaa ndaka ja ka ka'an ñayii ni‑ka'nu ñuu ñayivi a ja su'si ka kuu ma chi plata xi oro‑ni ka kuu, tna'a ja ni ka sa'a ñayii ma ji'in nda'a i ma‑ni ka kuu.

¹⁶ Vaa ka iyo yu'u i, kovaa masu nde kúu jin ka'an i, te ka iyo nduchinuu i, kovaa masu nde kúu jin konde'ya i.

¹⁷ Suni ka iyo so'o i, kovaa masu nde ka jiniso'o i ja ka ka'an o ma, te ni masu kúu jin xtatachi i ji'in yu'u i ma.

¹⁸ Te ñayii ka jani ini ja su'si i ka kuu ma te ni ka sa'a i ma, sukan ka kuu ja ni ka sa'a i ma, sukan ka kuu tna maa ñayii ma. Te suni sukan ka kuu tna ndaka ñayii masu ka ndasa'a kuenda te ka kukanu ini i ja su'si i ka kuu ma.

¹⁹ Ndaka ni ja ka kuu ni ñayii ñuu Israel ma, jin ka'an vii jin ka'an va'a ni ja kuu Su'si o Iya Tátnuni ma. Ndaka ni ja ka kuu ni sa'ya tata Aarón ma, jin ka'an ni ja vii ja va'a ja kuu Su'si o Iya Tátnuni ma.

²⁰ Ndaka ni ja ka kuu ni sa'ya tata Leví ma, jin ka'an vii jin ka'an va'a ni ja kuu Su'si o Iya Tátnuni ma. Ndaka ni ja ka yu'u ni ja ká'an Su'si o Iya Tátnuni ma te ñatuu ka sa'a‑ka ni ja u'vi ma, jin ka'an vii jin ka'an va'a ni ja kuu ya.

²¹ Te onde ñayii ka iyo yuku nani Sion ma, na jin ka'an i ja vii ja va'a ja kuu Su'si o Iya Tátnuni ma, iya iyo ini ñuu Jerusalén ma. ¡Aleluya!