Salmos 130 - New Testament Psalms and Proverbs in Mixtec Magdalena Peñasco

Salmo 130 Ka kukanu ini o ja maa Su'si ma sa'a ja jin kaku o nuu ja u'vi ma

¹ Onde nuu kunu xen‑xeen ma ñunee sa, te káyu'u sa kána ña'a sa ja ndánduku ña'a sa, vi Su'si.

² Iya Tátnuni, koniniso'o ñukuun ni ja ká'an sa a, te kuni ni sukan jikan‑ta'vi jikan‑ta'vi sa nuu ni a.

³ Nute ndijin ma, vi Su'si, te ndakan ni kuenda nuu ndaka sa ja u'vi ni ka yo sa'a sa ma chi masu na in kundee ini ja konukuiñi i nuu ni ma te ka'an i ja masu na kuechi i ma, vi Su'si.

⁴ Kovaa nú na in na kandija ja ká'an ni ma chi sakanu ini ni kuechi i ma, te ndachiñu'u ña'a i, te masu ko sa'a‑ka i ja u'vi ma, vi Su'si.

⁵ Saña chi ni yo ndetu sa Iya Tátnuni ma, vaa anua sa ya chi ni yo ndetu ka'nu kuiti i ya, vaa ni kukanu ini sa ja sa'a ya sukan ká'an tnu'u maa ya ma.

⁶ Te ini anua sa ya chi ndetu ka'nu kuiti i Iya Tátnuni ma. Vi'i‑ka kúu sa sana sukan kúu in soldado ja jito de ñuu de ma te ndetu ka'nu kuiti de ja na ndii ma, xi vi'i‑ka kúu sa sana sukan kúu in ñayii ja iyo nawa jito i ma te ndetu ka'nu kuiti i ja na ndii ma.

⁷ Ñuu Israel, jin kondetu ka'nu kuiti ni Iya Tátnuni ma, vaa Iya Tátnuni ma chi nda'vi xeen ini ya, te maa ya chi iyo tnu'u ndee tnu'u ndatnu ya ja sa'a ya ja jin ndayaa ni nuu ja u'vi ma.

⁸ Ndijin ja ka kuu ni ñayii ñuu Israel a, maa ya sa'a ja jin ndayaa ni nuu ndaka ja u'vi ma.