Salmos 129 - New Testament Psalms and Proverbs in Mixtec Magdalena Peñasco

Salmo 129 Jín ndatna'a maa ñayii ñatuu ka kunimani nuu o ma ja kan‑nuu

¹ Kua'a xeen ja ni ndo'o, ni neni sa onde nuu jaa‑ka sa ma ―te sukan na jin ndaka'an maa ñayii ñuu Israel ma―,

² nde'e xeen ni ka xndo'o, ni ka xneni ña'a i onde nuu jaa‑ka sa ma, kovaa ñatuu ni ka kundee i ja jin chitna'nu ña'a i.

³ Vaa kuenda tnu'u ja onde yata sa ya ni ka ya'a ñayii ka jitu ma, te ni ka sa'a kunu‑ka i yukun ma. Ûni sukan ni jini sa nuu ni ka xndo'o, ni ka xneni ña'a i ma.

⁴ Kovaa Su'si Iya Tátnuni ma chi iya sa'a va'a sa'a ndaa kúu ya, te ni ja'nde ya yo'o kaa ni ka ju'ni ña'a ñayii ka sa'a ja u'vi ma, te ni kaku sa.

⁵ Te jín ndatna'a maa ñayii ka sa'a ja u'vi ma ja kan‑nuu. Ndaka maa i ja ka saxiko i ñuu Sion ma, te jín ndakakayata maa i jín koo i.

⁶ Te jín ko kuu maa i sukan‑ni kúu yi'i nana xini ve'e ma, ja masu nde ja'nu ma, sani te yichi i ma.

⁷ Ja ni masu nde ni'i ña'a tee ja'nde yi'i ma ja xtutu de nuu nda'a de ma te ka'nde de. Ni a jaku'un nuu nda'a de ma te ku'ni de kuenda nu'ni i. Sukan‑ni jín ko kuu maa i.

⁸ Te ni a ñayii jin ya'a kuan koo ma, masu jin kuña'a i: “Su'si Iya Tátnuni ma, na skuta'vi ña'a ya ja vii ja va'a.” Ni a jin kuña'a i nuu ñayii ya'a: “Ja maa Su'si ma, te ka ka'an sa ja vii ja va'a ja jin kuu ni”, chi ña'a.