Salmos 126 - New Testament Psalms and Proverbs in Mixtec Magdalena Peñasco

Salmo 126 Sukan jin kakan‑ta'vi o nuu Su'si ma ja na chindee ña'a ya ja na jin kaku o nuu ja u'vi ma

¹ Kivi ni sa'a Iya Tátnuni ma ja yo'o ja ni ka yo iyo o nuu nda'a ñayii in‑ka ñuu ma, ni ka ndakokuiñi o ñuu Sion ma, te kuenda tnu'u ja ka jani o kúu ma.

² Kovaa sani te ni ka ndakusii o ja ni ka ndusii ini o, te ni ka jita sii ini o nuu Su'si ma. Te onde ñayii ka iyo in‑ka ñuu ma, ka ka'an i: “Kua'a xeen ja va'a ja vii ni sa'a Su'si ma ja jin kuu ñayii ya'a”, ka kuu i ka ka'an i.

³ Vaa kua'a xeen ja va'a ja vii ni sa'a Iya Tátnuni ma ja jin kuu o ma, te chukan kúu ja ka kusii ini xeen o ya.

⁴ Vitna ka jikan‑ta'vi sa nuu ni, vi Su'si Iya Tátnuni, sukan sa'a ni ja tóo ndute nuu ñu'ú yichi ma, te sukan sa'a tna ni ja na jin ndakokuiñi ñayii ñuu sa ya, ja ni ka kunda'a ña'a ñayii in‑ka ñuu ma, ja jin kunukuechi i nuu ñayii yukan ma.

⁵ Vaa sa'a ka'an ni: “Ñayii ka nda'yu kuan koo i ka saka i ndikin itu ma chi sii ini xeen jin ndaxtutu i kivi ni kuu ma.

⁶ Vaa visi ka nda'yu i kuan koo i ja ka ndo'o ka neni i ka saka i ma, kovaa sii ini xeen jin ndakokuiñi i, vaa ndendee i ka ndiso i ja jâ ni ka ndaxtutu i ja ni ka saka i ma.” Sa'a ka'an ni vi.