Salmos 122 - New Testament Psalms and Proverbs in Mixtec Magdalena Peñasco

Salmo 122 Sukan jin kakan‑ta'vi o nuu Su'si ma ja na jin koo mani ñayii ñuu Israel ma

¹ Saña chi ni ndusii ini sa ji'in ñayii ni ka ka'an sa'a ma: “Jín koo o ve'e Su'si ma ja jín ndachiñu'u o ya”, ni ka ka'an i.

² Te vitna ka iyo sa onde ye'e ñuu Jerusalén ya.

³ Te ñuu Jerusalén ya kúu in ñuu núkuiñi vava'a, sukan‑va'a ndaka ñayii ma jin ndatna'a ya'a.

⁴ Vaa ya'a ka ndatna'a ndaka jichi ñayii ma, sukan‑va'a jin ndachiñu'u ña'a i maa ni, vi Su'si, vaa sukan ni tatnuni ni nuu tee kúu Israel ma.

⁵ Vaa ya'a ka iyo nuu ka nukoo sa'ya tata David ma ja ka tatnuni i nuu ñayii a, te ya'a ka kenda koo ñayii ma ja ka kundaa tniñu i ma.

⁶ Jín kakan‑ta'vi o nuu Su'si ma ja koo kuee ini ñuu Jerusalén a, te sa'a jín kuña'a o ñuu Jerusalén a: “Jerusalén, na jin koo vii jín koo va'a ndaka ñayii ka kutoo ña'a a.

⁷ Ñatuu nawa ko jin koyu'u ñayii ka iyo ini ro ja kúu ro ñuu Jerusalén a, te vivii jín ndatatu ñayii ka iyo ve'e ro a.

⁸ Te ja na jin koo vii jín koo va'a ndaka ñayii ka ketna'a ini ji'in ri a, te jikan‑ta'vi ri nuu Su'si ma ja na koo kuee ja ko kuu ro.

⁹ Te ja kúnda'vi ini ri ve'e nuu ka ndachiñu'u ri Su'si ma, te chukan kúu ja ndimaa ko ndi ini ri ja na koo vii koo va'a ro vi, ñuu Jerusalén.” Sa'a jin kuña'a o ñuu a.