Salmos 121 - New Testament Psalms and Proverbs in Mixtec Magdalena Peñasco

Salmo 121 Maa in‑ni Su'si Iya Tátnuni ma kúu iya jito ña'a ndenu kua'an ndenu vee o ma

¹ Visi na ndonenuu sa ichi yuku ma, ja kondetu sa ndenu kenda ja chindee ña'a,

² kovaa masu ndenu kenda, vaa maa in‑ni Su'si Iya Tátnuni ma, iya ni sa'a andivi ma ji'in ñuu ñayivi a, kúu iya kuu chindee ña'a.

³ Vaa masu kua'a ya tnu'u ja kendeka ja'a o a, te ni masu kusu ya ja jito ñukuun ña'a ya.

⁴ Te ni masu na ñuma'na nuu ya, ni masu iya kusu kúu iya jito ñayii ñuu Israel a.

⁵ Te maa Iya Tátnuni ma kúu iya jito va'a ña'a ma, te iyo yatni ya sukan iyo kuanda'vi o a ja iyo ichi nda'a kua'a o a.

⁶ Te kandii ma chi másu skuita ña'a i nduu ma, visi i'ni xeen ma, ni a yoo ma, masu nawa sa'a ña'a i jakuaa ma.

⁷ Te maa Iya Tátnuni ma kúu iya ko koto va'a ña'a ja kaku o nuu ndaka ja u'vi ma, te suni ko koto va'a ya anua o a.

⁸ Te maa Iya Tátnuni ma koto va'a ña'a ndenu ni kee o kua'an o, te ndenda va'a o. Onde vitna te ni‑kani ni‑jika ko koto va'a ña'a ya.