Salmos 12 - New Testament Psalms and Proverbs in Mixtec Magdalena Peñasco

Salmo 12 Sukan kakan‑ta'vi o nuu Su'si ma ja na chindee ña'a ya te kaku o nuu ñayii ka sa'a ja u'vi ma

¹ Iya Tátnuni, sa'a ni ja kaku sa, vaa ñatuu‑ka na ñayii ka sa'a sukan jatna ini ni ma ka iyo ne'un ñayii ka iyo ñuu ñayivi ya.

² Vaa ndaka ñayii a, ndimaa ka xnda'vi tna'a i, te ñii yu'u i ma‑ni ka iyo tnu'u ka ka'an i ma, kovaa masu inundija i ja ka ka'an i ma.

³ Iya Tátnuni ma, xnaa ya ndaka ñayii masu inundija i ja ka ka'an i ma, ji'in ndaka ñayii ndimaa tnu'u vixi ka ka'an i ma,

⁴ ji'in ndaka‑ka ñayii sa'a ka ka'an i ma: “Ka kukanu ini o ja ndaka ja ka ka'an o ya, te jin kundee o, vaa ji'in yu'u maa o a ka ka'an o, te masu na in tátnuni nuu yo'o”, ka kuu i ka ka'an i.

⁵ Kovaa sa'a ká'an Iya Tátnuni ma: “Ja kuechi ja ka sa'a ndeva'a ñayii ma ñayii nda'vi ñayii kee ma, te vitna, te ndokuiñi o, te sa'a o ja jin kaku ñayii ka kuxii ka kunda'vi ini ma, ja ka ndo'o ka neni i nuu in‑ka ñayii ma”, kúu ya ká'an ya.

⁶ Tnu'u Iya Tátnuni a chi tnu'u nanimaa kúu, sukan ni nduu nanimaa plata ma ja ni ja'an i uja jichi nuu ñu'u i'ni ma.

⁷ Vaa maa ni, vi Iya Tátnuni, chi ko koto va'a ña'a ni ni‑kani ni‑jika, te sa'a ni ja jin kaku sa nuu ñayii ka sa'a ja u'vi ma.

⁸ Visi ni ka ndakonduu ña'a maa ñayii ka sa'a ja u'vi ma, te ndaka maa ñayii ka iyo ñuu ñayivi ya, ka jatna maa i ja jin sa'a i ja u'vi ma, te ka jani ini i ja vii xeen kúu, kovaa sa'a ni ja jin kaku saña nuu ja u'vi ma.