Salmos 118 - New Testament Psalms and Proverbs in Mixtec Magdalena Peñasco

Salmo 118 Sukan jin ndakuan‑ta'vi o nuu Su'si ma ja ni chindee ña'a ya te ni ka kaku o nuu ja u'vi ma

¹ Jín ndachiñu'u o Su'si Iya Tátnuni ma, vaa iya va'a ini kúu ya, vaa kúnda'vi ini ña'a ya ni‑kani ni‑jika.

² Na jin ka'an ñayii ñuu Israel ma ja ni‑kani ni‑jika kúnda'vi ini ña'a ya.

³ Sa'ya tata Aarón ma, na jin ka'an i ja ni‑kani ni‑jika kúnda'vi ini ña'a ya.

⁴ Ndaka ñayii ka yu'u Su'si ma te ñatuu‑ka na ja u'vi ka sa'a i ma, na jin ka'an i ja ni‑kani ni‑jika kúnda'vi ini ña'a ya.

⁵ Saña chi kivi ni ndo'o ni neni sa ma, te ni ndakune'e sa Su'si Iya Tátnuni ma ja na chindee ña'a ya, te ni ndakone'e ya, te ni ndanune nda'a nuu sa a, ni jini sa.

⁶ Su'si Iya Tátnuni ma iyo ji'in sa, te másu koyu'u sa nawa sa'a ña'a ñayii ma.

⁷ Su'si Iya Tátnuni ma iyo ji'in sa, te iyo sa ne'un ñayii ka chindee ña'a ma, te chukan kúu ja kuni sa sukan jin ndo'o jin neni ñayii ka saxiko ña'a ma.

⁸ Ja va'a‑ka kúu ja kukanu ini o Su'si Iya Tátnuni ma sana ja kukanu ini o ñayii ma.

⁹ Ja va'a‑ka kúu ja kukanu ini o Su'si Iya Tátnuni ma sana ja kukanu ini o tee ka tatnuni‑ka ma.

¹⁰ Ndaka ñayii ndaka ñuu ma, ni ka ndakonduu ña'a i ja jin sa'a ndeva'a ña'a i, kovaa ja maa Su'si Iya Tátnuni ma, te ni xnaa sa i.

¹¹ Ni ka ndakonduu ndi'i kuiti ña'a i, kovaa ja maa Su'si Iya Tátnuni ma, te ni xnaa sa i.

¹² Ni ka ndakonduu ña'a i kuenda tnu'u ja ñuñu, kovaa ja ka ndakiti xeen ini i nuu sa ma ni naa kuenda kúu ora káyu iñu ma‑ni, kovaa ja maa Su'si Iya Tátnuni ma, te ni xnaa sa i.

¹³ Ni ka tunda'a ndeva'a ndekuu ña'a i, sukan‑va'a nduva sa, kovaa maa Su'si Iya Tátnuni ma ni chindee ña'a, te ñatuu ni kotuu sa.

¹⁴ Su'si Iya Tátnuni ma kúu iya táa tnu'u ndee tnu'u ndatnu, te maa ya ni sa'a ja ni kaku sa nuu ja u'vi ma, te chukan kúu ja kata sa nuu ya ja ndachiñu'u sa ya.

¹⁵ Ve'e ñayii ka sa'a ja va'a ja ndaa ma ka kayu'u i, ja ka jita sii ini i, vaa ni ka kaku i nuu ja u'vi ma. Kua'a xeen kúu ja ni sa'a ya ji'in tnu'u ndee tnu'u ndatnu ya ma.

¹⁶ Masu kuu ndaka'an ndakachi o sukan sa'a ya ma ji'in tnu'u ndee tnu'u ndatnu ya ma, vaa ni kundee ya nuu ñayii ñatuu ka kunimani nuu o ma.

¹⁷ Masu kûu sa chi su'va koteku sa, te ko ndaka'an ko ndakachi sa ja sa'a ja kúu ya ma.

¹⁸ Ni wa'a ya tnu'u ja ni ndo'o ni neni sa ma, kovaa ñatuu ni wa'a ya tnu'u ja kûu sa.

¹⁹ Jin ndakune ni ye'e nuu ka ndatna'a ñayii ka sa'a ja va'a ja ndaa ma, sukan‑va'a na kivi sa te ndákuan‑ta'vi sa nuu Iya Tátnuni ma.

²⁰ Te ye'e ya'a kúu ye'e Iya Tátnuni ma, te ye'e ya'a jin kivi koo ñayii ka sa'a ja va'a ja ndaa ma.

²¹ Chukan kúu ja ya'a iyo sa, vi Su'si, te ndákuan‑ta'vi sa nuu ni, vaa ni jiniso'o ni ja ni ka'an sa ma, te ni chindee ña'a ni ja ni kaku sa nuu ja u'vi ma.

²² Vaa yuu ni ka saxiko ñayii ka sa'a ve'e ma, ni nduu i yuu kanuu‑ka.

²³ Te sukan ni sa'a maa Iya Tátnuni ma, te yo'o chi ni ka sa'vi‑nka ini o ja sa'a ya a.

²⁴ Vitna kúu kii ja ni sa'a Iya Tátnuni ma, te jín koo sii ini xeen o nuu ya.

²⁵ Iya Tátnuni, sa'a ni ja jin kaku tna sa vitna. Jikan‑ta'vi xeen sa nuu ni ja na chindee ña'a ni ja na jin kundee sa vitna.

²⁶ Ja va'a kúu iya vee nuu Iya Tátnuni ma. Te onde ve'e Iya Tátnuni ma ka iyo sa, te ka ka'an sa ja vii ja va'a ja jin kuu ndaka ni ja ve koo ni a.

²⁷ Iya Tátnuni ma kúu Su'si o, te xtnuu ya ñu'u maa ya ma nuu o a. Te chukan kúu ja jín koo sii ini o, te jín ndakua'a o kiti jin ka'mi o nuu altar ya ma ja ka ndachiñu'u o ya.

²⁸ Su'si maa sa kúu ni, te ndáchiñu'u ña'a sa, te ndákuan‑ta'vi sa nuu ni, vaa maa ni kúu Su'si sa.

²⁹ Jín ndachiñu'u o Su'si Iya Tátnuni ma, vaa iya va'a ini kúu ya, vaa kúnda'vi ini ña'a ya ni‑kani ni‑jika.