Salmos 116 - New Testament Psalms and Proverbs in Mixtec Magdalena Peñasco

Salmo 116 Sukan ndakuan‑ta'vi o nuu Su'si ma ja ni chindee ña'a ya te ni kaku o ja ñatuu ni ji'i o ma

¹ Kútoo sa Su'si o Iya Tátnuni ma, vaa ni jiniso'o ya ja ni jikan‑ta'vi xeen sa nuu ya ma.

² Vaa ni yo niniso'o ñukuun ya ja ni jiña'a sa ya ma, te chukan kúu ja ndaka kivi ja koteku sa ma, te ko ndakune'e sa ya.

³ Vaa vala‑nka ja kûu sa nkuu, vaa ni kundee kue'e ma nuu sa, te vala‑nka ja kûu sa, te kúxii kúnda'vi ini sa nkuu.

⁴ Kovaa sani te ni ndakune'e jajaa sa Su'si Iya Tátnuni ma, te sa'a ni jiña'a sa ya: “Su'si sa Iya Tátnuni, sa'a ni ja kaku ini anua sa ya nuu ja u'vi ma”, kúu sa jiña'a sa.

⁵ Ja ndaa kúu ja Su'si o ya chi iya kuee ini kúu ya, te sa'a ya ja va'a ja ndaa. Saa vi, Su'si o a chi iya kúnda'vi ini ña'a kúu ya.

⁶ Iya Tátnuni ma chi jito va'a ya ñayii ndákunitnuni ja jiniñu'u i ya ma. Ni kuita kuiti sa ja sani te kûu sa nkuu, te ni sa'a ya ja ni kaku sa.

⁷ Te sa'a ni jani ini sa: “Ini anua, ndatatu, vaa Su'si Iya Tátnuni ma, ni sa'a ña'a ya ja va'a.” Sa'a ni jani ini sa.

⁸ Vaa maa ni, vi Su'si, ni sa'a ni ja ni kaku sa te ñatuu ni ji'i sa, te ni chindee ña'a ni ja masu konda'yu‑ka sa, te jito ña'a ni ja masu kendeka‑ka sa, vi Su'si.

⁹ Chukan kúu ja ndimaa ko kandija sa nuu Iya Tátnuni ma ndaka kivi koteku sa ñuu ñayivi a,

¹⁰ te kúkanu ini sa Su'si ma. Chi vaa kivi nuu ni yo ndo'o, ni yo neni sa ma,

¹¹ te ñatuu ni'i ini‑ka sa nawa sa'a sa ma, te ni jani ini sa ja ndaka ñayii ma, masu inundija i ja ka ka'an i ma.

¹² ¿Naxe ndachunaa sa nuu Iya Tátnuni ma ndaka ja vii ja va'a ja ni sa'a ya ja kuu sa a?

¹³ Masu nawa kuu sa'a sa, nú masu ja koo sii ini xeen sa ja ni sa'a ya ja ni kaku sa nuu ja u'vi ma, te ndakune'e sa Su'si Iya Tátnuni ma.

¹⁴ Te suni sa'a sa tna'a ja ni skuiso sa nuu ya ma, te jin kuni ndaka ñayii kúu ñuu ya ma.

¹⁵ Ja nde'ya Su'si o Iya Tátnuni ma ja ji'i in ñayii iyo va'a iyo ndaa nuu ya ma, chi kúxii xeen ini ya.

¹⁶ Su'si Iya Tátnuni, saña ja jinukuechi sa nuu ni a, te suni si'i sa ma, ni yo jinukuechi ña nuu ni a, te maa ni ni ja'nde yo'o kaa ni yo nu'ni sa ma.

¹⁷ Te chukan kúu ja kata sa nuu ni, te ndataa sa jayiñu'u, te ndakune'e ña'a sa, ja kúu ni Su'si Iya Tátnuni.

¹⁸ Nuu Su'si Iya Tátnuni ma sa'a sa tna'a ja ni skuiso sa nuu ya ma, te jin kuni ndaka ñayii kúu ñuu ya ma.

¹⁹ Onde nuke'e veñu'u nuu iyo Iya Tátnuni ma, ja iyo i sasava ñuu Jerusalén ma, koo sa, te ndakua'a sa tna'a ja ni skuiso sa nuu ya ma. ¡Aleluya!