Salmos 115 - New Testament Psalms and Proverbs in Mixtec Magdalena Peñasco

Salmo 115 Su'si ndija ma chi téku ya

¹ Masu nuu saña jin koo jayiñu'u ma, vi Su'si. Masu nuu saña, su'va nuu maa ni na koo jayiñu'u ni ma ja sukan kútoo ña'a ni a, ji'in sukan ká'an ndaa ni ma.

² ¿Nava'a jin ka'an ñayii ñuu ñayivi a: “¿Ndenu iyo Su'si ka ndachiñu'u i ma?”?

³ Kovaa Su'si o ma chi iyo ya onde andivi ma, te maa ya kúu iya ni sa'a ndaka nde a ni kuu ini ya ja sa'a ya ma.

⁴ Kovaa tna'a ja ka ka'an ñayii ñuu ñayivi a ja su'si i ka kuu ma chi oro xi plata‑ni ka kuu i, te másu Su'si ka kuu ma. Tna'a ja ni sa'a ñayii ma ji'in nda'a i ma‑ni ka kuu.

⁵ Vaa ka iyo yu'u i, kovaa masu nde kúu jin ka'an i, te ka iyo nduchinuu i, kovaa masu nde kúu jin konde'ya i.

⁶ Ka iyo so'o i, kovaa masu nde ka jiniso'o i nawa ká'an o ma. Ka iyo xitni i, kovaa masu nde kúu jin ni'i i xiko.

⁷ Ka iyo nda'a i, kovaa masu nde kúu jin tnii i, te ka iyo ja'a i, kovaa masu nde kúu jin kaka i, va ni a in tnu'u masu nde kúu jin ka'an i.

⁸ Te sukan‑ni kúu tna'a ja ni sa'a ñayii ma ji'in nda'a i ma, sukan‑ni kúu tna maa ñayii ni sa'a ma, te sukan ka kuu tna ndaka ñayii ka kukanu ini ja su'si i ka kuu ma.

⁹ Ndijin ja ka kuu ni ñayii ñuu Su'si ma, jin kukanu ini ni Iya Tátnuni ma, vaa suu ya kúu iya chíndee ña'a, te kasi ndee kasi ndoso ya ja ni‑in ja u'vi ma kenda nuu ka iyo ni a.

¹⁰ Ndijin ja ka kuu ni sa'ya tata tee ni yo kuu Aarón ma ja ka jinukuechi ni nuu Iya Tátnuni ma, jin kukanu ini ni ya, vaa suu ya kúu iya chindee ña'a, te kasi ndee kasi ndoso ya ja ni‑in ja u'vi ma kenda nuu ka iyo ni a.

¹¹ Ndaka ni ja ka yu'u ni Iya Tátnuni ma vaa ndakan ya kuenda nuu ni a, jin kukanu ini ni ya, vaa suu ya kúu iya chíndee ña'a, te kasi ndee kasi ndoso ya ja ni‑in ja u'vi ma kenda nuu ka iyo ni a.

¹² Vaa Iya Tátnuni ma chi ndáka'án ña'a ya ndaka o a, te táa ya ja vii ja va'a ja jin ni'i o, te sukan sa'a ya ji'in ñayii ñuu Israel ma, ji'in sa'ya tata tee ni yo kuu Aarón ma.

¹³ Te sukan sa'a ya ji'in ñayii ka yu'u ja ká'an ya ma te ñatuu‑ka na ja u'vi ka sa'a i ma, ka kuu i ñayii nija'nu, ka kuu i suchi kuechi.

¹⁴ Te maa Iya Tátnuni ma na taa kua'a xeen ja vii ja va'a nuu ni, ji'in nuu in in sa'ya ni ma.

¹⁵ Ja vii ja va'a ka kuu ni nuu Iya Tátnuni ma, iya ni sa'a andivi a ji'in ñu'ú ya.

¹⁶ Kovaa andivi ma kúu nuu iyo maa ya ja tátnuni ya ma, te nuu ñu'ú ya ni wa'a ya ja jin koo sa'ya tata ñayii ma.

¹⁷ Te ñayii ni ka ji'i ma chi másu kuu jin ndachiñu'u‑ka i Iya Tátnuni ma ñuu ñayivi ya, vaa ka iyo nañii nañii‑nka i chii ñu'ú ma.

¹⁸ Kovaa yo'o ja ka teku o a chi jín ka'an o ja vii ja va'a ja kuu ya, sukan‑va'a na koo jayiñu'u nuu ya onde vitna, te ni‑kani ni‑jika jín ko sa'a o sukan. ¡Jayiñu'u na koo nuu ya! ¡Aleluya!