Salmos 113 - New Testament Psalms and Proverbs in Mixtec Magdalena Peñasco

Salmo 113 Su'si ma chi ndákua'a ya tnu'u kanu ini nuu ñayii jani ini ja masu kuu‑ka i ma

¹ Ndijin ja ka jinukuechi ni nuu Iya Tátnuni ma, jin ndachiñu'u ni ya. Maa in‑ni ya jin ndachiñu'u ni.

² Ja vii ja va'a kúu Iya Tátnuni ma. Onde vitna te ni‑kani ni‑jika jin ka'an vii jin ka'an va'a o ja kuu ya ma.

³ Ndaka o na jin ndachiñu'u Iya Tátnuni ma. Onde ñayii ka iyo ichi nuu kána kandii ma, onde ñayii ka iyo ichi nuu kée kandii ma, na jin ndachiñu'u tna i ya ndaka ora.

⁴ Vaa maa ya tátnuni ni‑ka'nu ñuu ñayivi a, te jayiñu'u ya ma chi ka'nu‑ka sana andivi a.

⁵ Másu na in‑ka kuu sa'a sukan sa'a Su'si Iya Tátnuni ma, vaa maa ya chi onde sukun‑ka sana andivi ma núkoo ya ja tátnuni ya ma.

⁶ Te jákindeyi ya ja nde'ya ya andivi ma ji'in ñuu ñayivi a.

⁷ Te onde ñayii kúnda'vi kúkee ma ja kuenda tnu'u ja ne'un ñuyaka‑nka ma iyo i ma chi kuu ndone'e ya i ja kuatniñu ya i. Te onde ñayii jani ini ja másu nde jiniñu'u‑ka i ma vaa másu nawa neva'a kuiti i ma chi kuu ndone'e ya i ja kuatniñu ya i,

⁸ sukan‑va'a sa'a ya ja jin kunukoo i ne'un ñayii ka ndanuu‑ka ñuu ya ma.

⁹ Te ña'a ñatuu nama ni kúu koo sa'ya ña ma, te sa'a ya ja ndusii ini ña ja iyo ña ne'un sa'ya ña ma. ¡Jayiñu'u kóo nuu Iya Tátnuni ma! ¡Aleluya!