Salmos 112 - New Testament Psalms and Proverbs in Mixtec Magdalena Peñasco

Salmo 112 Sukan ní'i tná'a ñayii sa'a sukan játna ini Su'si ma

¹ ¡Naka vii naka va'a kúu ñayii yu'u Su'si ma te ñatuu sa'a‑ka i ja u'vi ma! Te sii ini xeen iyo i ja sa'a i sukan tátnuni ya ma.

² Te sa'ya tata i ma, jin ko kuu i ñayii ka tatnuni ñuu ñayivi a. Vaa sa'ya tata ñayii iyo ndaa nuu Su'si ma ka kuu i, te maa ya chi skuta'vi ya i ja vii ja va'a ma.

³ Te ko ni'i ko tna'a i ja koneva'a i ve'e i ma, te nuu ya ma ndimaa ko sa'a i ja va'a ja ndaa.

⁴ Te ko kuu i ñayii kuee ini, ñayii nda'vi ini, te ko sa'a i ja ndaa ma. Te kuenda tnu'u ja in ñu'u xtnuu nuu nee ma ko kuu i nuu ñayii ka sa'a ja va'a ja ndaa ma.

⁵ Ñayii sa'a ja va'a ma te nda'vi ini i ma, te wanuu i nawa jiniñu'u in‑ka ñayii ma, chi kuu i kuatniñu va'a i nawa neva'a i ma.

⁶ Te ja sukan sa'a i ma, te masu skenaa i maa i nuu Su'si ma, te ndimaa jin ko ndaka'án ñayii maa i, ja ni yo sa'a i ja va'a ma.

⁷ Te másu koyu'u i, visi na kenda tnundo'o tnuneni nuu iyo i ma, vaa ini anua i ma chi kúkanu ini i Su'si ma, te nuu maa in‑ni ya kúkanu ini i.

⁸ Vaa jito va'a Su'si ma anua i ma, te másu nawa koyu'u i, onde kenda kivi kuni i sukan jin ndo'o jin neni ñayii ñatuu ka kunimani nuu i ma.

⁹ Wa'a i nawa jiniñu'u ñayii nda'vi ma, te sa'a i ja ndaa ni‑kani ni‑jika, te ja sukan kúu sa'a i ndaka ma, te koo jayiñu'u i ma.

¹⁰ Te kuni ñayii sa'a ja u'vi ma, te ûni ndakiti xeen ini i, te ûni ndakaa ndi'i i nu'u i, te xnaa i maa i. Ja ñu'u ini ñayii sa'a ja u'vi ma ja sa'a i ma chi másu ko kuu sukan jani ini i ma.