Salmos 111 - New Testament Psalms and Proverbs in Mixtec Magdalena Peñasco

Salmo 111 Su'si ma, jito va'a ya ñayii ñuu ya ma

¹ Ni‑yu'u ni‑ini sa ndachiñu'u sa Su'si Iya Tátnuni ma nuu ka ndatna'a sa ji'in ndaka ñayii ka iyo va'a ka iyo ndaa nuu Su'si ma.

² Kua'a xeen ja vii ja luu ni sa'a Su'si ma, te ñayii ka kuu sii ini ja ka nde'ya i ma, te ñukuun ka ndanduku‑ka i, sukan‑va'a jin ndasa'a i kuenda sukan kaa sukan iyo ja ni sa'a ya ma.

³ Ja vii ja yiñu'u kúu ja ni sa'a ya ma, te jin koo i ni‑kani ni‑jika. Suni tnu'u ndaa tnu'u ndija ya ma koo ni‑kani ni‑jika.

⁴ Ndaka milagru ni sa'a ya ma masu jin ndunaa o, vaa iya nda'vi xen‑xeen ini kúu Su'si o Iya Tátnuni ma, te kuee ini ya.

⁵ Te ñayii ka yu'u Su'si ma ja iya ndákan kuenda nuu o kúu ya, te ñatuu‑ka na ja u'vi ka sa'a i ma, chi ñukuun wa'a ya ndaka ja jin kaa jin ko'o i ma, vaa ni masu ndunaa ya ja ni skuiso ya nuu o ma.

⁶ Ni kaxtnu'u ya nuu ñayii kúu ñuu ya ma sukan iyo tnu'u ndee tnu'u ndatnu ya ma, nuu ni ndakua'a ya i ñu'ú nuu ni ka yo kuu ta'vi ñayii in‑ka ñuu ma.

⁷ Te ndaka ja ni sa'a ya ji'in nda'a ya ma inuu kúu ji'in tnu'u ndaa tnu'u ndija ká'an ya ma ji'in sukan jani ini ya ma. Te tnu'u tátnuni ya ma chi kuu jin kukanu ini o, vaa ja va'a kúu.

⁸ Te ni‑kani ni‑jika koo tnu'u tátnuni ya a, te masu na in ka'an ja masu ja ndaa kúu, vaa tnu'u ndaa tnu'u ndija kúu, te kuu jin kukanu ini o.

⁹ Ya'vi xeen ni ndachunaa Su'si ma ja jin kaku ñayii kúu ñuu ya ma, vaa sukan ni skuiso ya ja sa'a ya ji'in ñayii kúu ñuu ya ma, te sukan ko kuu ni‑kani ni‑jika. Vaa iya ii kúu ya, te iyo ya ja jin koyu'u o ya, vaa ndakan ya kuenda nuu o a.

¹⁰ Ja ko kuu o in ñayii ndichi ma kúu ja koyu'u o Su'si Iya Tátnuni ma te máko ko sa'a‑ka o ja u'vi ma. Vaa ñayii kándija te sa'a i sukan tátnuni Su'si ma chi janitnuni va'a‑ka koneva'a i, te ko ndachiñu'u i Su'si ma ni‑kani ni‑jika.