Salmos 110 - New Testament Psalms and Proverbs in Mixtec Magdalena Peñasco

Salmo 110 Maa Su'si ma wa'a tnu'u ndee tnu'u ndatnu nuu rey ma

¹ Su'si Iya Tátnuni ma jiña'a nuu iya tátnuni nuu sa a: “Kunukoo ro xiñi kua'a ri a, te onde nú ni kundee ri skendoo ri ndaka suchi ñatuu ka kunimani nuu o ma chii ja'a ro a, te kuiñi ndoso ro i”, kúu ya jiña'a ya nuu iya tátnuni nuu sa a.

² Iya Tátnuni ma tetniñu onde ñuu Sion ma yutnu xii kinda'a ni ja tatnuni ni ma, te kundee ni tatnuni ni nuu ñayii ñatuu ka kunimani nuu ni ma.

³ Ñayii ñuu ni ma, ka iyo tu'va i ja jin chindee ña'a i, te kundee ni nuu ñayii ñatuu ka kunimani nuu ni ma. Te ñayii ñuu ni ma, jin koo vii jin koo ndoo i, vaa ñatuu‑ka na ja u'vi ka sa'a i. Te kuta'vi ni yuyu xtnee ne'e ma, ja ni yo iyo ji'in ni onde nuu ni iyo jaa ni ma.

⁴ Vaa maa Iya Tátnuni ma ni skuiso, te masu ndakani ini ya, te sa'a ni ka'an ya: “Maa ro kúu sutu ni‑kani ni‑jika sukan ni yo kuu tee kúu Melquisedec ma, ja ni yo kuu de sutu ma”, kúu ya jiña'a ya nuu iya tátnuni nuu sa ma.

⁵ Te Su'si Iya Tátnuni ma, núkuiñi ya xiñi kua'a ni a, te maa ya sa'a ja jin skenaa tee ka kuu rey ma kivi kaxtnu'u ya sukan ndákiti ini ya nuu de ma.

⁶ Vaa maa ya ndakan kuenda nuu ndaka ñayii ñuu ñayivi a, te ndasotna'a ndasotnii ya ñunde'yu ñayii ni ka ji'i ma, vaa kua'a xeen ñayii ka iyo ñuu ñayivi a ja ñatuu ka kunimani i nuu ya ma, kaxi ya xini i ma.

⁷ Te ichi kua'an ya ma ko'o ya ndute jika yute ma, te ndatnii ya tnu'u ndee tnu'u ndatnu.