Salmos 11 - New Testament Psalms and Proverbs in Mixtec Magdalena Peñasco

Salmo 11 Ñayii sa'a ja va'a ja ndaa ma chi maa Su'si ma kasi ña'a te kaku i nuu ja u'vi ma

¹ Nuu Iya Tátnuni ma kúkanu ini sa, te kaku sa nuu ja u'vi ma. ¿Nava'a ka ka'an ñayii ma nuu sa ja na kunu sa onde yuku ma sukan ka ndava lasaa ma?

² Jin konde'ya ni ja ñayii ka sa'a ja u'vi ma chi jâ ka iyo tu'va i nuu iyo yu'u ma. Ka yinda'a i kuji i ma, ji'in flecha i ma. Sani te jin kani i nuu ka iyo ñayii ka iyo ndaa ini anua i ma nuu Su'si ma.

³ Nute naa ñuu ñayivi a, ¿nawa sa'a ñayii sa'a ja va'a ja ndaa ma?

⁴ Iya Tátnuni ma, iyo ya ini veñu'u ii ya ma. Onde andivi ma iyo nuu núkoo Iya Tátnuni ma, te nde'ya ya ji'in nduchinuu ya ma sukan ka sa'a ka kuu ñayii ma.

⁵ Iya Tátnuni ma, jitotnuni ya ñayii ka sa'a ja va'a ja ndaa ma nú inundija i ja ka kukanu ini i ya ma. Kovaa ñayii ka sa'a ja u'vi ma te ka jatna ini i ja ka sa'a ndeva'a i ñayii nda'vi ma, onde ini anua ya ma saxiko ya i.

⁶ Sa'a ya ja siki ñayii sa'a ja u'vi ma, in jichi‑ni jin ndajinu kua'a ja u'vi ja jâ ni sa'a maa i ma, te sa'a ya ja jaki'i tachi ma, sukan‑va'a ndakonduu ña'a ñu'u káyu kóko ji'in azufre ma, te sukan ndando'o ndaneni maa i.

⁷ Vaa Iya Tátnuni ma chi iya sa'a ja va'a ja ndaa kúu ya, te játna ini ya ja sa'a ya ja va'a ja ndaa ma. Chukan kúu ja ñayii sa'a ja va'a ma chi kenda kivi ja nuu nuu i jin konde'ya tna'a i ji'in ya.