Salmos 109 - New Testament Psalms and Proverbs in Mixtec Magdalena Peñasco

Salmo 109 Sukan ni jikan‑ta'vi David ma nuu Su'si ma ja maa ya na ndakan kuenda nuu ñayii ka sa'a ja u'vi ja kuu de ma

¹ Su'si iya ndáchiñu'u sa, máko kasi yu'u ni.

² Vaa ñayii ka sa'a ja u'vi ma te ka xnda'vi i ñayii ma, ka ka'an i ja u'vi ja kuu sa, te masu ndija ja ka ka'an i ma chi ñayii inutnu'u ka kuu i.

³ Vaa ni ka ndakonduu ña'a i ja jin kanaa i ji'in sa, te ûni ka kiti ini i te ka ka'an i nuu sa, te vitna ja masu na kuechi sa.

⁴ Saña chi kútoo sa ñayii ñatuu ka kunimani nuu sa ma, kovaa maa i chi ndimaa ja u'vi ka ndasa'a ña'a i, te chukan kúu ja ndimaa xndoo sa nuu nda'a maa ni sukan ka sa'a ña'a i ma.

⁵ Vaa ja va'a sa'a sa i, te ka ndasa'a ña'a i ja u'vi. Kútoo sa i, te ka ndakiti ini i nuu sa, vi Su'si.

⁶ Sa'a ni ja ñayii sa'a ña'a ja u'vi ma, te ndándo'o ndáneni maa i nuu in‑ka ñayii sa'a ja u'vi ma, te tachi suchi ndimaa xtekuechi ña'a ma, na koo xiñi kua'a i ma,

⁷ sukan‑va'a kivi kundaa tniñu i ma, te ndátuu i ja kuechi i kúu, te ja u'vi jikan‑ta'vi i nuu ni ja kuu in‑ka ñayii ma na ndani'i na ndatna'a maa i.

⁸ Te sa'a ni ja jaku‑ni kivi koteku i, te in‑ka ñayii na ndatnii tniñu sa'a i ma.

⁹ Te sa'ya i ma, jín kendoo nda'vi i ja ñatuu na yuva‑ka i ma, te ñasi'i i ma, kéndoo ña ja ñatuu‑ka na yii ña iyo ma.

¹⁰ Te sa'ya tata i ma, kuan koo ve koo i jín ko kuu i ja jin kakan i karidaa, sukan‑va'a jin ni'i i ja jin kaa i, kovaa masu jin ni'i i ja jin kaa i ma, te onde jika jin koo i ja jin nduku i nawa jin kaa i ma.

¹¹ Te ñayii kua'a nawa jin kaa i ma, na ndunda'a i ndaka nawa ka neva'a i ma, te in‑ka ñayii na jin ndunda'a tna'a ja ni ka ni'i i ja ni ka satniñu i ma.

¹² Te máko kua'a ni tnu'u ja koo ñayii kunda'vi ini sa'ya ñayii yukan nuna jin ndoo nda'vi i ma, ni a jin ko ndi ini ñayii ma ja jin kuu sa'ya tee yukan.

¹³ Te sa'ya tata de ma na jin naa, te onde sañani de ma, masu na in ndaka'án nawa ni ka yo nani i ma.

¹⁴ Su'va ndaka'án ni ja u'vi ni ka yo sa'a, ni ka yo kuu yuva i ma, vi Su'si Iya Tátnuni, te ja u'vi ni ka yo sa'a si'i i ma, máko naa nuu ni a,

¹⁵ te ni‑kani ni‑jika kóo nuu maa ni, vi Su'si Iya Tátnuni. Te sa'a maa ni ja masu na in ko ndaka'án‑ka ña'a nuu ñu'ú a, te xnaa ni i.

¹⁶ Vaa kuechi ja ñatuu nde ni ndaka'án i ja kunda'vi ini i ñayii nda'vi ndó'o néni ma, saa su'va ni sondikin ña'a i ja ka'ni ña'a i saña ja kúxii kúnda'vi ini sa ya.

¹⁷ Vaa ni kutoo‑ka i ja u'vi ma, te ja u'vi ma ni kenda siki i. Ñatuu ni kuni i ja vii ja va'a ma, te ñatuu na ja vii ja va'a ni kenda nuu iyo i ma.

¹⁸ Su'va ni jakisa'vi ña'a ja u'vi ma, kuenda tnu'u ja in sa'ma ndii ñayii ma, te kuenda tnu'u ja ndute ni kivi ja u'vi ma onde ini anua i ma, te kuenda tnu'u ja aceite ni kivi ja u'vi ma onde yiki i ma.

¹⁹ Te na ko kuu ja u'vi ma kuenda tnu'u ja sa'ma ndii i ma, te ja u'vi ma, kó kuu i kuenda tnu'u ja nu'ni chii i ma.

²⁰ Te maa ni ja kúu ni Iya Tátnuni ma, sa'a ni ja jín ndachunaa maa ñayii ka ka'an tnu'u sa ma te ka ka'an u'vi i ja kuu ini anua sa ya.

²¹ Te maa ni, vi Su'si Iya Tátnuni, kunda'vi ini ña'a ni, te sa'a ni ja kaku sa, vaa va'a ini ni, te sa'a ña'a ni ja va'a, sukan‑va'a jín kuni ñayii ma ja maa ni kúu Su'si iya jito ña'a.

²² Vaa saña chi ndó'o néni sa, te jiniñu'u ña'a sa ja na chindee ña'a ni, vaa ini anua sa ya chi kúxii kúnda'vi ini sa.

²³ Te ve naa sa sukan kúu kuanda'vi ma, te sukan xndechi tachi yi'i ma tika langosta ma, sukan kúu sa nuu tnundo'o ya.

²⁴ Te ko'ndo sa ya chi ni ka kuita‑nka i ja kuechi ja ñatuu jaa sa xita ma, te yikikuñu sa ya chi ni ka kuita‑nka i, vaa ni kuxii sa.

²⁵ Te nuu ñayii ma chi kuenda tnu'u ja sukan kúu in ja masu nde jiniñu'u‑ka kúu sa, vaa ka nde'ya ña'a i, te ka skuiko xini i, te ka jakundee ña'a i.

²⁶ Su'si maa sa, Iya Tátnuni, kunda'vi ini ña'a ni ja na kaku sa nuu ñayii ka sa'a ja u'vi ma,

²⁷ sukan‑va'a na jin kuni ñayii ma ja nda'a maa ni a kúu ja chíndee ña'a, te maa ni kúu iya sa'a ja kaku sa nuu ñayii ma.

²⁸ Te visi na jin ka'an u'vi maa i ja kuu sa, kovaa maa ni chi taa ni ja vii ja va'a ja kuta'vi sa, te jín ndatna'a maa ñayii ma ja kan‑nuu, kovaa saña chi koo sii ini sa nuu maa ni a, vi Su'si.

²⁹ Te ndaka maa ñayii ñatuu ka kunimani nuu sa ma, na jin ndatna'a maa i ja kan‑nuu, te ûni na jin nukun‑tuu maa i ja kan‑nuu ma kuenda tnu'u ja kúu in sa'ma ndii o ma.

³⁰ Kovaa saña chi kata sa te ndachiñu'u ña'a sa, vi Su'si Iya Tátnuni, te me'ñu ndaka ñayii ma, te kata sa te ndachiñu'u ña'a sa.

³¹ Vaa maa ni chi koo ni xiñi kua'a ñayii kúnda'vi kúkee ja ñatuu na in kunimani nuu i ma, sukan‑va'a sa'a ni ja na kaku i nuu ñayii ka ka'an ja u'vi ja kuu i ma.