Salmos 108 - New Testament Psalms and Proverbs in Mixtec Magdalena Peñasco

Salmo 108 Sukan kakan‑ta'vi o nuu Su'si ma ja na chindee ña'a ya ja na kaku o nuu ñayii ñatuu ka kúnimani nuu o ma

¹ Su'si maa sa, ini anua sa a iyo tu'va ja kata sa salmo te ndachiñu'u ña'a sa, vaa ûni iyo sii ini xen‑xeen sa.

² Te xtnee ne'e ma ndoto sa, te tee sa guitarra, te ndachiñu'u ña'a sa, vi Su'si.

³ Te onde ne'un ñayii ka iyo ñuu ñayivi a iyo sa, te kata sa salmo nuu maa ni, te ndachiñu'u ña'a sa, vi Su'si Iya Tátnuni.

⁴ Vaa ja nda'vi ini ni a ka'nu‑ka sana andivi ma, te tnu'u ndaa tnu'u ndija ni a chi onde ya'a te onde andivi ma ka'nu ja ndaa ja ndija ká'an ni a.

⁵ Te na jin ndachiñu'u ña'a i andivi ma, vi Su'si, te ni‑ka'nu ñuu ñayivi a na koo jayiñu'u ni.

⁶ Te nda'a ni a na sa'a ja jin kaku sa, te chindee ña'a ni, sukan‑va'a na jin kaku ndaka ñayii kútoo ni ma.

⁷ Su'si ma, onde nuu iyo ya ma, sa'a ni ka'an ya: “Saña chi ndusii ini xeen sa, te ndaka'nde sa ñuu Siquem ma, te chikua'a sa ndu'va Sucot ma.

⁸ Vaa kuenda maa sa kúu ñuu Galaad ma ji'in ñuu Manasés ma. Te Efraín ma kúu ja ñu'u xini sa a ja ndesi i, te Judá ma kúu bastón yinda'a sa ja tátnuni sa ya.

⁹ Te Moab ma kúu nuu ñu'u ndute ndánda'a sa, te siki Edom ma kúu nuu sonee sa ja yi'i ja'a sa ya, te ûni káyu'u sa ja ni ndusii ini sa ja ni kundee sa nuu ñuu Filistea ma”, kúu ya ká'an ya.

¹⁰ ¿Na in skaka ña'a ñuu nuu iyo tnu'u ndee tnu'u ndatnu ma? ¿Na in skaka ña'a onde ñuu Edom ma?

¹¹ Te kuiti maa ni, vi Su'si, vaa maa ni ni skendoo ña'a, te ñatuu ni kee‑ka ni ja chindee ña'a ni nuu ka iyo ndaka sa ja ka kanaa sa ma.

¹² Su'si, chindee ña'a ni vitna, te na jin kaku sa nuu ñayii ka kuni u'vi nuu sa ma, vaa masu na nde jiniñu'u ja visi kua'a ñayii ma na jin chindee ña'a.

¹³ Kovaa nú maa ni na chindee ña'a, chi jin kundee sa nuu ñayii ñatuu ka kunimani nuu sa ma, vi Su'si.