Salmos 107 - New Testament Psalms and Proverbs in Mixtec Magdalena Peñasco

Salmo 107 LIBRO V Su'si ma chi sa'a ya ja ka kaku ñayii ñuu ya ma nuu tnundo'o tnuneni ma

¹ Jín ndachiñu'u o Su'si o Iya Tátnuni a, vaa iya va'a ini kúu ya, te ni‑kani ni‑jika kúnda'vi ini ña'a ya.

² Te sukan tna jín kuña'a ndaka ñayii nuu Su'si Iya Tátnuni ma, vaa ni sa'a ya ja ni ka kaku i nuu ja u'vi ma, te ni ndene'e ya i nuu ñayii ñatuu ka kunimani nuu i ma.

³ Vaa ñayii ka iyo in in ñuu ma, kúu ichi nuu kána kandii ma, kúu ichi nuu kée kandii ma, ichi ninu ma xi ichi nuu vee ma, te ni ndaxtutu ya i.

⁴ Te ñayii ma, kuan koo ve koo i nuu ñatuu nawa iyo kuiti ma, te ka kuu maa ka kuu in‑nka i ichi ma nkuu, te ñatuu nde ka ndani'i i in ñuu nuu jin koo i ma.

⁵ Te ka kokon ka yichi i, te ka kuita ini anua i ma nkuu.

⁶ Te nuu ka ndo'o ka neni i ma, te ni ka ndakune'e i Su'si Iya Tátnuni ma, te maa ya chi ni sa'a ya ja ni ka kaku i nuu tnundo'o tnuneni ma.

⁷ Te ni ndaskaka ya i ichi ndaa ma onde ni ka kenda koo i ñuu nuu kuu jin koo i ma.

⁸ Te chukan kúu ja na jin ndakuan‑ta'vi i nuu Su'si o ma, ja sukan kútoo ña'a ya ma, ji'in ja sukan sa'a ya ja vii ja va'a ja jin kuu ndaka ñayii ma.

⁹ Vaa maa ya wa'a ndaka tu'u ja ka jiniñu'u ñayii ma, te wa'a ya ndaka nawa jin kaa i ma, te ñatuu nde ka kokon ka yichi i.

¹⁰ Te ka iyo ñayii ma kuenda tnu'u ja vekaa ka yinee i, ni ka iyo i nuu nee ma, te ni ka yo kuxii, ni ka yo kunda'vi ini i,

¹¹ kuechi ja ñatuu nde ni ka kandija i ja ni tatnuni Su'si o Iya Tátnuni, iya iyo onde sukun ma, su'va ni ka saxiko i ja ni ka'an ya ma.

¹² Te chukan kúu ja ni wa'a ya tnu'u ja ni ka ndo'o, ni ka neni i. Visi ni ka yo nduva i ma, kovaa masu na in ni yo chindee ña'a.

¹³ Te ne'un tnundo'o tnuneni ma, te ni ka ndakune'e i Su'si Iya Tátnuni ma, te maa ya ni sa'a ja ni ka kaku i nuu tnundo'o tnuneni ka iyo i ma.

¹⁴ Te ni ndene'e ya i nuu nee ni ka iyo i ma, te ni sakuechi, ni salikin ya yo'o kaa ni ka yo nu'ni i ma.

¹⁵ Te chukan kúu ja na jin ndakuan‑ta'vi i nuu Su'si o ma, ja sukan kútoo ña'a ya ma, ji'in ja sukan sa'a ya ja vii ja va'a ja jin kuu ndaka ñayii ma.

¹⁶ Te ni sa'a ya ja ni ka kukuechi, ni ka kulikin ye'e kaa nuu ni ka yo ndesi va'a i ma, ji'in kaa ka ñundijin ye'e ma.

¹⁷ Te ni ka iyo tna ñayii ni ka yo ku'u xeen, te ni ka yo ndo'o, ni ka yo neni i, ja kuechi ja ñatuu ni ka yo kandija i ja ká'an Su'si ma te ni ka yo sa'a‑ka maa i ja u'vi ma.

¹⁸ Te ni ka yo kukini ini i ja jin kaa i ma, te sani te jin kûu i ka kuni i, vaa ñatuu nde ni ka yo ku‑asi‑ka yu'u i ja jin kaa i ma.

¹⁹ Kovaa nuu ka ndo'o ka neni i ma, te ni ka ndakune'e i Su'si Iya Tátnuni ma. Te maa ya ni sa'a ja ni ka kaku i nuu tnundo'o tnuneni ka iyo i ma.

²⁰ Ni tatnuni ya ja jin nduva'a i, te ni ka nduva'a i, te ni ka kaku i ja ñatuu ni ka ji'i i ma.

²¹ Te chukan kúu ja na jin ndakuan‑ta'vi i nuu Su'si o ma, ja sukan kútoo ña'a ya ma, ji'in ja sukan sa'a ya ja vii ja va'a ja jin kuu ndaka ñayii ma.

²² Te tna'a ja jin ndakuan‑ta'vi i nuu Su'si ma ko kuu yaa ja ká'an sukan sa'a sukan kúu ya ma, te jín kaxtnu'u sii ini i nuu ñayii ma sukan sa'a ya ma.

²³ Te ka iyo ñayii kuan koo ve koo i nuu mar ma ji'in barcu i ma, ka nduku i nawa jin xiko i.

²⁴ Te ñayii yukan chi ka jini i naxe kaa ni‑ka'nu nuu mar ma onde ka'a mar ma ndaka nawa iyo ma, te ka ndasa'a i kuenda ja maa Su'si ma ni sa'a ndaka ma.

²⁵ Te suni maa ya tátnuni nuu mar ma, te yi'i xen‑xeen tachi ma, te ja'nu ja'nu‑nka nuu ndute ma.

²⁶ Te ka nda koo ka nu koo barcu ma nuu ndute ma ka kuu tnu, te ka yu'u ka yu'u‑nka ñayii ma, nasa yukan, te jin skenaa i maa i ma.

²⁷ Te ka ni'i ka ni'i‑nka i ja ka yu'u xen‑xeen i, kuenda tnu'u ja ka ndajini i ma, te visi inundichi xeen i ma, kovaa masu nawa kúu jin sa'a i ma.

²⁸ Nú masu ja onde ka ndakune'e i Su'si Iya Tátnuni ma, sana chíndee ña'a ya, te ka kaku i nuu tnundo'o tnuneni ma.

²⁹ Te sa'a ya ja tachi kuiñi kuiñi‑nka ni yi'i, te ndúkuee kuiti‑nka‑ni nuu ndute ma.

³⁰ Sani te ka ndusii ini i ja ni ndukuee nuu ndute ma, te maa ya skaka ña'a onde ka ndani'i i nuu jin koo i ka kuni i ma.

³¹ Te chukan kúu ja na jin ndakuan‑ta'vi i nuu Su'si o ma, ja sukan kútoo ña'a ya ma, ji'in ja sukan sa'a ya ja vii ja va'a ja jin kuu ndaka ñayii ma.

³² Ora ka ndatna'a ñayii ma, te jín ndachiñu'u i Su'si o ma, te nuu ka ndatna'a tee ka kuu ja'nu ma, te jín ndachiñu'u tna de ya.

³³ Vaa Su'si ma chi kuu sa'a ya ja yute ma, te ndayichi i, te masu na ndute‑ka ko kaka, te kuu sa'a ya ja nuu tóo ndute ma, te ndayichi kuiti i.

³⁴ Te ñu'ú nuu kúu xeen nawa ka saka i ma, te ndasa'a ya ja nduu i in ñu'ú ja masu nawa kuu kuiti‑ka, ja kuechi ja u'vi ka sa'a ñayii ka iyo ma.

³⁵ Te kuu ndasa'a ya ja nuu yichi nuu ñatuu kuiti nawa iyo ma, te nuku'un ndute, te ñu'ú yichi ma, te ndatoo kua'a xeen ndute.

³⁶ Te sa'a ya ja yukan jin koo ñayii ka kokon ka yichi ma, te jin ndasañuu maa i, te yukan jin koo i.

³⁷ Te jin saka maa i tnu uva ma, te kua'a xeen nde'ya ma jin ni'i i ja jin ndaxtutu i.

³⁸ Te vivii sa'a ya, sukan‑va'a jin ndukua'a xeen ñayii ma. Te kiti i ma, jín ndukua'a xeen tna ti.

³⁹ Kovaa nú ka ji'i ñayii ma, kuechi ja ka sa'a ndeva'a ña'a ñayii ka tatnuni‑ka ma kúu.

⁴⁰ Kovaa Su'si ma, saxiko ya ñayii ka sa'a ndeva'a tna'a ma, te sa'a ya ja kuan koo ve koo maa i jin ko kuu i nuu ñatuu kuiti nawa iyo ma.

⁴¹ Kovaa Su'si ma chi ndene'e ya ñayii ka ñunee nuu ka kunda'vi ka kukee i ma, te sa'a ya ja jin ndukua'a sa'ya tata i ma, sukan ka kuu ndikachi ma.

⁴² Jín konde'ya ndaka ñayii ja ka iyo va'a i nuu Su'si o ma, te jín ndusii ini i, te ndaka ñayii ka sa'a ja u'vi ma, na jin kasiyu'u i.

⁴³ Ñayii ndichi ma, na konde'ya va'a i sukan sa'a ya ma, te jáku'ni ini i sukan kútoo ña'a Su'si Iya Tátnuni ma.