Salmos 106 - New Testament Psalms and Proverbs in Mixtec Magdalena Peñasco

Salmo 106 Sukan ka jikan‑ta'vi ñayii ñuu Israel ma ja na sakanu ini ña'a Su'si ma

¹ Aleluya. Jín ndachiñu'u o Su'si Iya Tátnuni ma, vaa iya va'a xeen ini kúu ya, te ni‑kani ni‑jika kúnda'vi ini ña'a ya.

² ¿Na in kundee ja ndaka'an i ndaka tu'u ja sa'a Su'si Iya Tátnuni ma te ndachiñu'u i Su'si o ma, sukan iyo ja ndachiñu'u o ya ma?

³ ¡Naka vii naka va'a ko kuu ñayii ja ndimaa ja va'a ja ndaa sa'a i ni‑kani ni‑jika ma!

⁴ Ndaka'án ña'a ni, vi Su'si Iya Tátnuni, sukan kúnda'vi ini ni ñayii ñuu ni ma, te sa'a tna ni ja kaku sa nuu ja u'vi ma,

⁵ sukan‑va'a kuni sa ja vii ja va'a ja jin ni'i ñayii ñuu ni ndakaji ni ma, te jín ndusii ini sa ji'in ñayii ni nduta'vi ni ma.

⁶ Chi vaa saña tna chi ni ka jiso kuechi tna sa sukan ni ka jiso kuechi tna'a sa ñayii jana'a ma, ja ni ka sa'a i ja u'vi ja ñatuu játna ini ni ma, vi Su'si.

⁷ Vaa tna'a sa ñayii jana'a ma, másu nde ni ka jaku'ni ini i ndaka milagru ni sa'a ni ñuu Egipto ma, te ni masu nde ni ka ndaka'án i sukan kútoo xeen ni i ma. Su'va ñatuu ni ka kandija i ja ká'an Moisés ma nuu ka iyo i yu'u Mar Rojo ma.

⁸ Vaa ja maa ni, te ni sa'a ni ja ni ka kaku i ma, sukan‑va'a na jin kuni ñayii ma tnu'u ndee tnu'u ndatnu ni ma.

⁹ Ni tatnuni ni nuu mar ma, te ni ka ndusiin in in nuu ndute ma, te ni nduu ñu'ú yichi kuiti nuu ni ka ya'a ndaka tna'a sa ma.

¹⁰ Te ni sa'a ni ja ni ka kaku i nuu ñayii ñatuu ka kuni va'a nuu i ma, te ni sa'a ni ja ni ka ndayaa i nuu nda'a ñayii ñatuu ka kunimani nuu i ma.

¹¹ Te ndaka ñayii ñatuu ka kunimani nuu tna'a sa ma, ka ndikin i kuan koo i. Sani te ni ndatna'a nuu ndute ma, te ni ka kandee i, te ni ka ji'i i, te ni‑in‑ka i ñatuu ni kaku.

¹² Te onde sukan, saa ni ka kandija ndaka tna'a sa ma ja ká'an ni ma, vi Su'si. Te ka jita i, te ka ndachiñu'u ña'a i ja sukan ni chindee ni i ma.

¹³ Ûni yachi xeen ni ka ndunaa i ndaka ja sa'a ya ma, te ñatuu ni ka yo ndetu i ja jin kuni i sukan ka'an‑so'o ya nuu i naxe jin ko sa'a jin ko kuu i ma.

¹⁴ Vaa su'va ichi kuan koo i ma, te ni ka sa'a i sukan ka jatna ini maa i ma, te ni ka jitotnuni i Su'si ma nuna kúu sa'a ya ndaka ja ka kuni i ma.

¹⁵ Te ni wa'a ya ndaka ja ni ka jikan i nuu ya ma, kovaa sani te ni tetniñu ya in kue'e, te ni ka ji'i i ma.

¹⁶ Vaa nuu ni ka kenda koo i nuu jin ndatatu i jaku kii ma, te jaku ñayii ma, ni ka kukueñu ini i nuu Moisés ma ji'in nuu Aarón tee ni kaji Su'si ma ja kunukuechi de nuu ya ma.

¹⁷ Sani te ni ndakune Su'si ma nuu ñu'ú ma, te ni kokon ñu'ú ma tee kúu Datán ma ji'in ndaka tna'a tee kúu Abiram ma,

¹⁸ sani te ni jikin ñu'u ma, te ni ka kayu ndaka ñayii ka sa'a ja u'vi ma.

¹⁹ Te suni nuu ni ka iyo i yuku nani Horeb ma, ni ka ndaxtutu i ndaka oro ka yinda'a i ma, te ni ka ndaxndute i, te ni ka sa'a i in xndiki jaa ko kuu su'si i ma, te ni ka ndachiñu'u i.

²⁰ Te sukan ni ka ndaxsama i jayiñu'u Su'si ma, vaa saa su'va nuu xndiki ma ja yi'i ma‑ni jaa ti ma ka ndachiñu'u‑ñu'u‑ni i.

²¹ Te ni ka ndunaa i ja Su'si ma kúu iya ni sa'a ja ni ka kaku i nuu ja u'vi ma te suni maa ya ni sa'a kua'a milagru ñuu Egipto ma.

²² Te kua'a seña ni sa'a ya ñuu sa'ya tata tee kúu Cam ma ji'in sukan ni sa'a ya nuu Mar Rojo ma.

²³ Te Su'si ma chi ni jani ini ya ja xnaa ya ñayii ñuu ya ma nkuu, kovaa Moisés ma tee ni kaji maa ya ma, ni ka'an nda'vi, ni ka'an kee de nuu ya, sukan‑va'a ndiko ini ya te máko xnaa ya ñayii ma.

²⁴ Kovaa ni ka saxiko i ñu'ú va'a nuu ni ka'an ya ja jin koo i ma, vaa másu nde ni ka kandija i ja ká'an ya ma.

²⁵ Su'va ni ka ka'an yichi i ja kuu ya nani ka iyo i ini ve'e sa'ma ma, te ñatuu ni ka yo niniso'o i ja ká'an Iya Tátnuni ma.

²⁶ Te chukan kúu ja ni ndakiti ini ya, te ni ndone'e ya nda'a ya siki i ma, sukan‑va'a jin kûu maa i te jin kavatuu maa i nuu ñatuu kuiti nawa iyo ma.

²⁷ Te ni sa'a ya ja ni ka ndo'o, ni ka neni i ne'un ñuu ñayivi a, te ni jatenuu ya i ni‑ka'nu ñuu ñayivi a.

²⁸ Sani te ni ka jan nu tna'a i ja nani Baal‑peor ma tna'a ja kúu su'si ñayii ka kuu ñuu moabitas ma, te ni ka jaa i tna'a ja ka jakin‑tuu ñayii ñuu yukan ma nuu altar tna'a ja masu Su'si ka kuu ma.

²⁹ Te sukan, te ni ka sa'a i ja ni ndakiti ini Su'si o ma, te ni tetniñu ya kue'e ja ni ka ndo'o, ni ka tna'a i ma, te ni ka ji'i i.

³⁰ Sani te ni ndokuiñi tee kúu Finees ma, te ni ja'ni de ñayii ñatuu ka kandija sukan tátnuni Su'si ma. Sani te ni naa kue'e ni ka ndo'o, ni ka tna'a ñayii ma.

³¹ Te Su'si ma, ni ka'an ya ja ja va'a kúu ja ni sa'a Finees ma, ja kuechi ja ni ndakiti ini de nuu ñayii ñatuu ka kandija ja tátnuni Su'si ma. Te chukan kúu ja jin ndakani i nuu ndaka sa'ya tata i ma ni‑kani ni‑jika sukan ni sa'a de ma.

³² Te suni ni ka sa'a ñayii ma ja ni ndakiti ini Su'si ma nuu ka iyo i nuu nani Meriba ma, nuu iyo in toto ma, vaa ni ka kuyika i nuu Moisés ma ja ñatuu na ndute jin ko'o i ma. Te kuechi ñayii ma, te ñatuu ni kendoo va'a Moisés ma nuu Su'si ma.

³³ Vaa ni ka sa'a i ja ni ndakiti ini Moisés ma, te ni masu ni ndasa'a de kuenda nawa kúu ja ni ka'an de ma.

³⁴ Te suni ñatuu ni ka kandija ñayii ma ja jin sa'a i sukan ni tatnuni Su'si ma, ja jin xnaa i ñayii ka iyo ñuu Canaán ma.

³⁵ Chi su'va ni ka ndasakanuu tna'a i ji'in ñayii ñatuu ka kandija Su'si ma, te su'va ni ka kutu'va i ni ka sa'a i sukan ka sa'a ñayii yukan ma.

³⁶ Te ni ka jakondee i ka ndachiñu'u tna i tna'a ja masu Su'si ka kuu ma, te kuechi ja sukan ni ka sa'a i ma, te ni ka xtivi i maa i te ni ka skenaa i maa i.

³⁷ Vaa saa nuu tachi ma ni ka yo ndakua'a i sa'ya i ma, vaa ni ka yo ja'mi i sa'ya i ma nuu tna'a ja masu Su'si ka kuu ma.

³⁸ Te sukan ni ka jati i niñi ñayii masu na kuechi ma, vaa sa'ya maa i ma ni ka yo ja'mi i nuu tna'a ja masu Su'si ka kuu ma, tna'a ja ni ka yo ndachiñu'u ñayii ka iyo ñuu Canaán ma, te ñu'u yukan, ja u'vi ni kuu i, kuechi ja yukan ni ka jati i niñi ñayii ma.

³⁹ Te ja sukan ni ka sa'a, ni ka kuu i ma, te ni ka jiso kuechi maa i, vaa ka jini i na in kúu Su'si o ma, te ni ka kivi nduu i ji'in tna'a ja masu Su'si ka kuu ma.

⁴⁰ Te ni ndakiti ini Su'si ma nuu ñayii kúu ñuu ya ma, te ni nduxiko ini ya nuu ñayii ni kaji ya ja jin ko kuu i ñuu ya ma.

⁴¹ Chukan kúu ja ni wa'a ya tnu'u ja ni ka kunda'a ña'a maa ñayii in‑ka ñuu ma ñayii ni ka yo kuni u'vi nuu i ma, sukan‑va'a jín tatnuni ñayii yukan ma nuu i ma.

⁴² Te ñayii ñatuu ka kunimani nuu ñayii kúu ñuu Su'si ma, ni ka sa'a ndeva'a i ñayii yukan ma, vaa ni ka xndo'o, ni ka xneni i ñayii kúu ñuu ya ma.

⁴³ Te kua'a xeen jichi ni sa'a Su'si ma ja ni ka kaku ñayii kúu ñuu ya ma nuu tnundo'o tnuneni ma, kovaa masu nde ni ka kandija i ja ká'an ya ma. Te maa ja u'vi ni ka sa'a i ma ni sa'a ja ni ka ndatna'a maa i ja kan‑nuu.

⁴⁴ Kovaa visi ndaka sukan ni ka yo sa'a, ni ka yo kuu i ma, kovaa Su'si ma chi ni yo jito ya i, te ni yo niniso'o ya sukan ka tnana u'vi i ka jikan‑ta'vi i nuu ya ma.

⁴⁵ Te ni yo ndaka'án ya sukan ni skuiso ya nuu i ma, te ni yo ndunda'vi ini ya i, vaa iya va'a xeen ini kúu ya.

⁴⁶ Te ni sa'a ya ja ñayii ka tatnuni nuu i ma, ni ka ndunda'vi ini‑ka ña'a i.

⁴⁷ Te vitna vi, Su'si maa sa, ndene'e ña'a ni ne'un ñayii in‑ka ñuu ya, sukan‑va'a na jin ndachiñu'u ña'a sa te jín kata sii ini sa nuu ni, vaa iya ii kúu ni.

⁴⁸ Su'si iya tátnuni ñuu Israel a, iya va'a iya vii ini kúu ya. Ni‑kani ni‑jika iyo jayiñu'u ya, te ndaka o ja ka kuu o ñuu maa ya a, jín ketna'a ini o, te sukan jín ndachiñu'u o ya. ¡Jayiñu'u kóo nuu maa Iya Tátnuni ma!