Salmos 105 - New Testament Psalms and Proverbs in Mixtec Magdalena Peñasco

Salmo 105 Su'si ma chi ndimaa ja vii ja va'a sa'a ya ja jin kuu ñayii ñuu Israel ma

¹ Jin ndakune'e ni Su'si Iya Tátnuni ma, te jin ndachiñu'u ni ya, te jin kaxtnu'u ni nuu ndaka ñayii ka iyo ndaka ñuu ma ndaka sukan sa'a Su'si o ma.

² Jin kata ni nuu ya, te jin ndachiñu'u ni ya, te jin ndaka'an jin ndakachi ni ndaka milagru sa'a ya ma.

³ Jin koo sii ini ni ja iya ii kúu Su'si o a, te ndaka ni ja ka ndanduku ni Su'si o Iya Tátnuni ma, na jin koo sii ini ini anua ni a.

⁴ Te jin ndanduku‑ka ni ya, sukan‑va'a jin ni'i ni tnu'u ndee tnu'u ndatnu ya ma, te ndimaa jin koo ni nuu maa ya ma.

^5-6 Ndaka ndijin ja ka kuu ni sa'ya tata Abraham tee ni yo jinukuechi nuu Su'si ma, ja ka kuu ni sa'ya tata Jacob tee ni kaji maa ya ma, jin kona'a ni ndaka milagru ni sa'a ya ma, ji'in sukan ni ja'nde ya tniñu ñayii ma.

⁷ Te maa ya kúu Su'si ndaka o, te ni‑ka'nu ñuu ñayivi a iyo tnu'u tátnuni ya ma.

⁸ Te ni masu ndunaa ya sukan ni skuiso ya nuu ndaka jichi ñayii kenda koo‑ka ma.

⁹ Vaa sukan ni skuiso ya nuu Abraham ma, te suni sukan ni skuiso ya nuu tee ni yo kuu Isaac ma.

¹⁰ Te ni kundaa, ni kundija sukan ni skuiso ya ma nuu tee ni yo kuu Jacob ma. Te nuu ñayii ñuu Israel ma ni kendoo ni‑kani ni‑jika ja ni skuiso ya ma.

¹¹ Vaa sa'a ni ka'an ya ma: “Nuu ndijin ndataa sa ñuu Canaán ma, te nduta'vi maa ni, vaa chukan iyo ja ni'i ni ma”, ni ka'an ya.

¹² Vaa onde kivi nuu jaku‑ni ñayii ñuu ya ma kúu ma, te kuan koo ve koo ka kuu i nuu masu ñuu i kúu ma.

¹³ Te ndi‑in ndi‑in ñuu ma kuan koo ve koo i, nuu ka iyo in‑ka ñayii ka tatnuni ma.

¹⁴ Te ñatuu nde ni wa'a ya tnu'u ja ni‑in ñayii, te ko sa'a ndeva'a i ñayii ñuu ya ma. Te ja kuechi ja kútoo ya i ma, te ni xndo'o ni xneni ya rey ndi‑in ndi‑in ñuu ma.

¹⁵ Vaa ni jiña'a ya: “Masu ko jin kaki'i nda'a ni ñayii ni kaji maa sa a, te ni masu ko jin sa'a ndeva'a ni tee jin ndaka'an sukan tátnuni sa ma”, kúu ya jiña'a ya.

¹⁶ Te ni sa'a ya ja ni iyo tnama nuu ñu'ú ya, te ni xnaa ya ndaka nuu kée ja jin kaa ñayii ma.

¹⁷ Te maa ya ni sonuu José ma kua'an de ñuu Egipto ma kivi ni ka xiko ña'a ñani de ma nuu ismaelitas ma, ja ko kuu de tee kunukuechi ma.

¹⁸ Kovaa nuu ni ka jaan ña'a ñayii ñuu Egipto ma, te ni ndo'o, ni neni de, vaa ni ka ju'ni i ja'a de ma, te ni ka chinee i de vekaa ma.

¹⁹ Onde ni kenda kivi ja ni kuu sukan ni ka'an de ma, te ni ka ndakuni tnuni ñayii ma ja ja ndaa kúu ja ká'an José ma te Su'si ma iyo ji'in de.

²⁰ Saa ni tatnuni rey tee tátnuni ñuu yukan ma ja jín kene'e i José ma ini vekaa ma.

²¹ Sani te ni tatnuni rey ma ja na ko koto de ve'e tee ma te ko kuu de tee tatnuni nuu ndaka nawa iyo ñuu Egipto ma,

²² te ndaka'an ndakachi de nuu ndaka tee ka netniñu ma naxe jin ko sa'a jin ko kuu de ma, te kaxtnu'u de tnu'u ndichi nuu tee ka kuu ja'nu ma.

²³ Saa ni kenda kivi ja ni ka kenda koo sa'ya tata Israel ma ñuu Egipto ma, te ni ka iyo de ñuu sa'ya tata Cam ma.

²⁴ Te Su'si ma, ni sa'a ya ja ni kukua'a xeen‑ka ñayii ñuu ya ma, te ni ka iyo‑ka tnu'u ndee tnu'u ndatnu i sana ñayii ñatuu ka kunimani nuu i ma.

²⁵ Te ni ndaxsama Su'si ma ini anua ñayii ñuu Egipto ma, te ni ka kuni u'vi i nuu ñayii ka jinukuechi nuu i ma, te ni ka saxiko i nuu ñayii yukan ma ja ka kuu i ñuu ya ma.

²⁶ Te ni tetniñu Su'si ma Moisés ma tee jinukuechi nuu ya ma, ji'in Aarón ma tee ni kaji maa ya ma, kuan koo de.

²⁷ Te ni tatnuni ya naxe jin ka'an de ja jin koo de ma, te ni wa'a ya na milagru na seña sa'a ya ñuu sa'ya tata Cam ma.

²⁸ Te ni sa'a ya ja ni kunee kuiti ñuu yukan ma, kovaa ñatuu ni ka kandija ñayii ñuu yukan ma ja ká'an ya ma.

²⁹ Te ni sa'a ya ja ndute ma, ni nduu de niñi, te ni ka ji'i ndaka tiaka ka ñu'u ma.

³⁰ Te ni sa'a ya ja ni kana kua'a xeen sa'va, te onde nuu kixi tee kúu rey ma ni ka kenda koo ti.

³¹ Te ni tatnuni ya, te ni ka kenda koo kua'a xen‑xeen tiukun ni‑ka'nu ñuu ma.

³² Te ni sa'a ya ja jándute te kána savi ma, te nanimaa ñiñi ni kuun, te másu na savi ni kuun, te ni tetniñu ya ñu'u te ni kayu ndi'i kuiti ja iyo ñuu Egipto ma.

³³ Te ni ka naa ndaka tnu uva ma ji'in tnu higo ma, te ni ka tna'nu ndaka yutnu ka nukoo ni‑ka'nu ñuu yukan ma.

³⁴ Te ni tatnuni ya, te ni ka kenda koo kua'a xen‑xeen tika langosta.

³⁵ Te ni ka jaa ti ndaka ja kuii ni kendoo ñuu yukan ma, te ni ka xnaa ti ndaka nde'ya kúun ñuu yukan.

³⁶ Te ni sa'a ya ja ni ka ji'i ndaka sayii xinañu'u ñayii ñuu yukan ma, te sukan, te ni ka skenaa i ndaka tnu'u ndee tnu'u ndatnu ñuu i ma.

³⁷ Te ni ndene'e ya ñayii ñuu maa ya ma, te ni ka ni'i i plata ji'in oro. Te ndaka jichi ñayii ñuu ya ma, masu na in ni yo ku'u.

³⁸ Te ndaka ñayii ka iyo ñuu Egipto ma, ni ka kutachi xeen i ja ni ka nde koo ñayii ñuu Israel ma, vaa ni ka yu'u i ndaka ja kúu ja kuechi ñayii ñuu ya ma.

³⁹ Te ni sa'a ya ja in viko ni yo sa'a kati ñayii ñuu ya ma nduu ma, te in ñu'u ndu'va ni yoxtnuu nuu ñayii ñuu ya ma jakuaa ma.

⁴⁰ Te ni ka jikan ñayii ma kuñu ja jin kaa i, te ni tetniñu ya kiti ka kuu kañu'u ma ni ka jaa i, te ni wa'a ya xtatila vee onde andivi ma ni ka jaa i.

⁴¹ Te ni ndakune ya toto ma, te ni ka ni'i i ndute ni ka ji'i i ma, ûni ka jika ka jika‑nka ndute ma nuu ñu'ú yichi ma.

⁴² Vaa ni ndaka'án ya sukan ni skuiso ya nuu Abraham ma tee ni yo jinukuechi nuu ya ma.

⁴³ Te ni ndene'e sii ini ya ñayii ñuu ya ma, te sii ini xeen iyo ya, vaa ñayii ni kaji maa ya ka kuu i ma.

⁴⁴ Te ni ndaskuta'vi ya i ñu'ú nuu jâ ka iyo ñayii in‑ka ñuu ma nkuu, te ni ka ndunda'a maa i ja jâ ni ka satniñu siin‑ka ñayii ma,

⁴⁵ sukan‑va'a jín ndasa'a i kuenda na in kúu ya ma, te jín ko sa'a ndi'i jín ko sa'a tu'u i ja tátnuni ya ma. ¡Aleluya! ¡Jayiñu'u kóo nuu maa ya!