Salmos 104 - New Testament Psalms and Proverbs in Mixtec Magdalena Peñasco

Salmo 104 Su'si ma, jito va'a ya ndaka ja ni sa'a ya ma

¹ Ni‑yu'u ni‑anua sa ndachiñu'u sa Iya Tátnuni ma. Su'si maa sa, Iya Tátnuni, iya ka'nu xeen kúu ni, te kanuu xeen ni, te iyo xeen jayiñu'u ni.

² Te ndíi ni in sa'ma yé'e ni'ni, te kuenda tnu'u ja ni skuili ni in sa'ma jite xeen, sukan‑ni ni sa'a ni andivi a.

³ Te siki ndute iyo onde andivi ma ni sunkani va'a ni ve'e ni ma, te siki viko ma yoxtnee ni kua'an vee ni kúu ni, ja kánaa ni ji'in ja ñatuu kúnimani nuu ni ma, te sukan yi'i kajin ma, sukan kua'an vee ni kúu ni.

⁴ Te sa'a ni ja kajin yi'i ma káxtnu'u nawa kúni ni ja káxtnu'u ni nuu ñayii ma, te sa'a ni ja ñu'u i'ni ma chi ka kandija i ja ká'an ni ma nú nawa iyo ja jin ka'mi i.

⁵ Te vivii sa'a ni, vi Su'si, vaa ni sa'a ni ja ni jinkuiñi vava'a ñuu ñayivi a, te masu na in skanda ña'a i nuu iyo i a.

⁶ Te ni sa'a ni ja ni chitu ndute ma ñuu ñayivi a, te ni ka sa'vi ndaka yuku ma, kuenda tnu'u ja in sa'ma ni jasi ni siki ndaka i ma.

⁷ Sani te nuu ni tatnuni ni ja na yichi ndute ma, te ja ni jiniso'o ndute ma sukan ni ka'an ni ma, te ñama ñama ni yichi de.

⁸ Sani te ni ka ndatuu yuku ma, sani te ni ka ndatuu ndaka ñu'ú ma, te ni nduu tuku sukan ni sa'a ni onde xinañu'u ma.

⁹ Sani te ni jasi ni ndute ma, sukan‑va'a masu yanduu‑ka de ja ndii de in‑ka jichi te ndachitu de ñuu ñayivi a.

¹⁰ Te vivii ni sa'a ni, vi Su'si, vaa ni sa'a ni ja vivii jika ndute yute ma, te kívi nduu kívi ni'ni de ne'un yuku ma.

¹¹ Te ka ni'i ndaka kiti ka iyo yuku ma ndute ka ji'i ti, te onde burru yuku ma, kúndee ndute ma ja ka ya'a ini ti ja ka yichi ti ma.

¹² Te lasaa ma, ka sa'a ti taka ti ne'un nda'a yutnu ka nukoo yu'u yute ma, te ka jita ti ja ka iyo sii ini ti.

¹³ Te onde sukun nuu iyo ni a, te skuun ni savi te yoso ni ndute ni‑ka'nu yuku ma, te ndaka ja sa'a ja kúu ni a, te kúu sii ini ñu'ú a vaa masu nawa ja'ni ña'a i.

¹⁴ Te sa'a ni ja ka ja'nu ndaka yi'i ma, sukan‑va'a jin kaa kiti ma, te sa'a ni ja ka ja'nu ndaka ja súnkoo ñayii ma, sukan‑va'a jin ni'i i ja jin kaa i.

¹⁵ Te sa'a ni ja ka ni'i ñayii ma ndute nde'ya uva ma ka ji'i i te ka iyo sii ini i, te sa'a ni ja iyo aceite tnu olivo ma te ndúvii ndúsii ini yikinuu ñayii ma, te sa'a ni ja ka ni'i ñayii ma ja jin kaa i te ka iyo tnu'u ndee tnu'u ndatnu i.

¹⁶ Te maa ni, vi Su'si, sa'a ni ja jika ndute xuu tnu itni ni sunkoo ni ñuu Líbano ma, te ka iyo yute tnu ma.

¹⁷ Te yukan ka tnaa lasaa ma taka ti, te in‑ka jichi tnu itni ka nukoo yukan ma ka sa'a lasaa ka nani cigüeña ma taka ti.

¹⁸ Te suni ni sa'a tna ni ja onde yuku sukun‑ka ma ka iyo ndixi'yu yuku ma, te ne'un toto ma ka sa'a tna iso ma ve'e ti.

¹⁹ Te vivii ni sa'a ni, vi Su'si, vaa ni sa'a ni yoo ma ja xtnuu i jakuaa ma, te káxtnu'u i na tiempo na kivi kúu ma, te ni sa'a ni kandii ma, te na'a maa i na ora kána i na ora kée i ma.

²⁰ Te maa ni sa'a ja kúnee ora jakuaa ma, te ora yukan ka ke koo ndaka kiti ka iyo yuku ma, te ka sondikin tna'a ka sondikin tna'a ti kuan koo ti.

²¹ Te ndika'a kuechi ma, ka nda'yu nda'vi ka nda'yu kee ti ja ñatuu nawa ka ni'i ti ja jin kaa ti, sukan‑va'a kunda'vi ini ni ti, vi Su'si.

²² Sani te ora ve kana kandii ma, te ka ndututu ti, te ka ndivi koo ti yavi ti ma.

²³ Sani te kée ñayii ma kua'an i ja satniñu i nii nduu ma onde ñini kuiti ma.

²⁴ ¡Saa vi, Iya Tátnuni, te ûni kua'a xen‑xeen kúu ja ni sa'a, ni kuu ni! Te ndaka ni jani, ni ka'vi ini ni, te ni sa'a ni, te ni‑ka'nu nuu ñu'ú a iyo ja vii ja luu ni sa'a ni ma, vi Su'si.

²⁵ Te ka'nu ka'nu ni sa'a ni mar ma nuu ñu'u kua'a xen‑xeen ndute ma, te ka ñu'u kua'a xen‑xeen kiti ndute ma, ka kuu ti kiti na'nu, ka kuu ti kiti kuechi.

²⁶ Te yukan kuan koo ve koo barcu ma ka kuu tnu, te yukan ñunee kiti ka'nu kiti xeen nani leviatán ma, te maa ni sa'a ja kasiki ti nuu ndute ma.

²⁷ Te ndaka ti ka kukanu ini ña'a maa ni, ja kua'a ni ja jin kaa ti ora ka kokon ti ma.

²⁸ Maa ni wa'a ja jin kaa ti, te yika‑ni ja ka ndaxtutu ti. Ndákune ni nuu nda'a ni a, te ka ni'i ti ndaka ja ka jiniñu'u ti ma.

²⁹ Te nuna ma sanuu ni ja kua'a ni ja jin kaa ti ma, te ka ndi ini xen‑xeen ti. Te nuna kasi ni ja masu kuu jin xtatachi‑ka ti, sani te jin kûu ti, te jin nduu ti ñuyaka‑nka‑ni.

³⁰ Kovaa kivi tetniñu ni Xtumani maa ni ma, te ndujaa nuu ñu'ú ya, te jin nduva'a jaa ndaka tuku ti, vi Su'si.

³¹ Te jayiñu'u Iya Tátnuni ma na koo ni‑kani ni‑jika, te kóo sii ini ya nuu ndaka ja ni sa'a ya a.

³² Vaa nde'ya ya ñu'ú ya, te tnáa, te yika‑ni ja kaki'i nda'a ya yuku ma, te ka kana ñu'ma.

³³ Nuu maa Su'si Iya Tátnuni ma kata sa ndaka kivi nani téku sa a.

³⁴ Ora ndákani ndáka'vi ini sa ja sa'a ja kúu ya a, te na jatna ini ya sukan ndása'a sa kuenda ja ni sa'a ya ma, vaa maa sa chi kúu sii ini xeen sa nuu Iya Tátnuni ma.

³⁵ Te na xnaa maa Su'si ma ñayii ka sa'a ja u'vi ma, te máko jin koo‑ka i ñuu ñayivi ya. Kovaa ini anua sa a na ndachiñu'u Iya Tátnuni ma. ¡Jayiñu'u kóo nuu Iya Tátnuni ma!