Salmos 103 - New Testament Psalms and Proverbs in Mixtec Magdalena Peñasco

Salmo 103 Sukan ndakuan‑ta'vi o nuu Su'si ma ndaka ja va'a táa ya ma

¹ Ini anua o a na ka'an ja vii ja va'a ja kuu Su'si o ma, te ni‑ka'nu yikikuñu o a na ndachiñu'u iya ii ma.

² Na ka'an o ja vii ja va'a nuu Iya Tátnuni ma, te máko ndunaa o ndaka ja vii ja va'a táa ya ma.

³ Vaa maa ya kúu iya sákanu ini ndaka kuechi ni yo sa'a o ma, te maa ya kúu iya ndásava'a ña'a ndenu u'vi o ma.

⁴ Te maa ya kúu iya ndátava ña'a nuu ja u'vi ñunee o ma, kuenda tnu'u ja ini yavi ma ñunee o, te ja sukan kútoo ña'a ya ma te vivii kúnda'vi ini ña'a ya ma, te táa kua'a ya nawa jiniñu'u o ma.

⁵ Te maa ya táa ndaka nawa kaa nawa ko'o o, te maa ya sa'a ja ndujaa o sukan kúu ya'a tioko ma.

⁶ Maa Su'si Iya Tátnuni ma kúu iya sa'a ndaa, te chíndee ya ñayii ka ndo'o ka neni ja ka sa'a ndeva'a ña'a in‑ka ñayii ma.

⁷ Vaa ichi maa ya ma ni kaxtnu'u ya nuu Moisés ma, te ni kaxtnu'u ya nuu ñayii ñuu Israel ma ndaka sukan sa'a sukan kúu ya ma.

⁸ Iya nda'vi xeen ini kúu ya, te ka'nu xen‑xeen ini ya te kuee ini ya, vaa ñatuu ndákiti yachi ini ya.

⁹ Te ni masu chú'un ini ya ja sa'a so'o ñayii ma, te ni masu ndakiti ini ya ni‑kani ni‑jika.

¹⁰ Visi ka sa'a o ndaka ja u'vi ma, kovaa masu nde ndása'a ña'a ya sukan iyo ja jin ndando'o jin ndaneni o ma, vaa kua'a xeen ja u'vi ka sa'a o nuu ya, kovaa kánda ya.

¹¹ Vaa sukan sukun andivi a, sukan ka'nu ini ya te kúnda'vi ini ya ñayii ka yu'u i ya ma te ñatuvi‑ka na ja u'vi ka sa'a i ma.

¹² Te jika jika ni jan skana ya ja u'vi ni ka yo sa'a o ma, sukan jika onde nuu kána kandii ma te onde nuu kée kandii ma.

¹³ Te sukan kúnda'vi ini ñayii sa'ya i ma, sukan kúnda'vi ini Su'si Iya Tátnuni ma nuu ndaka yo'o ja ka yu'u o ya te ñatuu‑ka na ja u'vi ka sa'a o a.

¹⁴ Vaa maa ya chi jini ya sukan‑ni ka kuu o a, te maa ya chi na'a siki ya ja ñuyaka‑ni ka kuu o.

¹⁵ Vaa ñayii ma chi sukan‑ni kúu yi'i ma‑ni kúu i, te sukan‑ni kúu i ndaka kivi iyo i ñuu ñayivi a. Vaa yi'i ma chi jáa ita i ma yuku ma,

¹⁶ te yá'a in tachi yi'i nini'i, sani te náa ita i ma nuu núkoo i ma, te masu na in‑ka ndáka'án‑ka ña'a.

¹⁷ Kovaa Su'si ma chi ni‑kani ni‑jika kúnda'vi ini ña'a ya ndaka yo'o ja ka yu'u o nasa yukan, te jin sa'a o in ja u'vi te ndakan ya kuenda nuu o ma. Te tnu'u ndaa tnu'u ndija ya ma koo nuu sa'ya tata o ma ni‑kani ni‑jika,

¹⁸ nuu ndaka ñayii ka sa'a sukan ni tatnuni ya ma te ka ndi ini i ja jin sa'a i ndaka sukan ni tatnuni ya ma.

¹⁹ Vaa Su'si Iya Tátnuni ma, onde sukun ma ni sa'a ya nuu núkoo ya ma, te tátnuni ya nuu ndaka ja iyo ñuu ñayivi a.

²⁰ Ndaka ro ja ka kuu ro ángel ka kandija sukan tátnuni Su'si ma te ka sa'a ro sukan ká'an ya ma te ka iyo tnu'u ndee tnu'u ndatnu ro a, jin ndachiñu'u Su'si Iya Tátnuni ma.

²¹ Ndaka ni ja ka jinukuechi ni nuu Su'si Iya Tátnuni ma te ka sa'a ni sukan kúni ya ma, jin ndachiñu'u ni ya.

²² Ndaka ni ja ni sa'a ña'a ya ji'in nda'a ya ma, jin ndachiñu'u ni ya ndaka nuu ka ndatna'a ni ma. Te ndijin ja ka kukanu ini ni ja maa ya kúu Iya Tátnuni ma, jin ndachiñu'u ni ya. Ini anua, ndachiñu'u ndija Su'si Iya Tátnuni ma.