Salmos 102 - New Testament Psalms and Proverbs in Mixtec Magdalena Peñasco

Salmo 102 Sukan kakan‑ta'vi o nuu Su'si ma ora ni kenda in tnundo'o ma te kúxii kúnda'vi ini o ma

¹ Su'si Iya Tátnuni, koniniso'o ni ja jikan‑ta'vi sa ya, sukan‑va'a na kenda ja ká'an nda'vi ká'an kee sa ya nuu iyo ni a.

² Te máko chu'u ni kivi kúxii kúnda'vi ini sa ma, su'va ndakone'e kunu ni nawa jikan‑ta'vi sa ma.

³ Vaa kivi iyo ja koteku sa ya chi ve ndi'i sukan naa ñu'ma ma, te yiki sa ya chi kuenda tnu'u ja nuu ñu'u tikayi ma ka kayu i.

⁴ Te ini anua sa ya chi ve kuita i sukan kúu yi'i ma, vaa masu na nde jaa‑ka sa xita.

⁵ Te ja kuechi ja tnána u'vi sa ma te ni kuxii xeen sa, te ûni kuu ka'vi o yiki sa a.

⁶ Vaa ndó'o sa sukan ndó'o in lasaa kiti ndute ma te ni kenda ti nuu ñu'ú yichi ma nuu ñatuu nawa iyo ma, xi sukan kúu tiñumi ma ja kúu maa kúu in‑ni ti ma.

⁷ Te ni ñatuu kúu kusu sa, te sukan kúu lasaa kiti núkoo maa núkoo in‑ni ti xini ve'e ma, sukan kúu sa.

⁸ Te ndi‑kivi ndi‑kivi ka ka'an ndeva'a ñayii ñatuu ka kunimani nuu sa ma ja kuu sa, te ñayii ka ndakiti ini nuu sa ma, ni ka ndatna'a i, te ni ka ndatnu'u tna'a i naxe jin sa'a ña'a i ja u'vi.

⁹ Te chukan kúu ja saña chi kuenda tnu'u ja xita sa ndeyu sa kúu yaa nuu ñu'u ma, te ndute nuu sa ma, ndásakanuu de ji'in ndute ji'i sa ma.

¹⁰ Te kuechi ja ni ndakiti ini ni nuu sa ma kúu ja ni ndokani ña'a ni, te ni ndaskana tuku ña'a ni nuu ñu'ú a.

¹¹ Te chukan kúu ja kivi iyo ja koteku sa ma chi kua'an i sukan kúu kati kuanda'vi ma, te kuenda tnu'u ja sukan ve yichi yi'i ma, sukan‑nka‑ni kúu sa.

¹² Kovaa maa ni, vi Su'si, chi ni‑kani ni‑jika koo ni, te jin ndaka'án ña'a ndaka sa'ya tata ñayii ma.

¹³ Te ndijin, vi Su'si, chi ndokuiñi ni, te kunda'vi ini ni ñuu Sion ma, vaa jâ ni kenda kivi ja kunda'vi ini ni ñayii ñuu yukan, te jâ ni kenda kivi ja ni jani ini ni ma.

¹⁴ Vaa ñayii ka jinukuechi nuu ni ma chi ka kuxii ini i ja ni tnana ñuu i ma, te ka nde'ya i ja ni nukoxtna'a ndaka yuu ma kaa i ma, te ka kunda'vi ini i.

¹⁵ Te ndaka ñayii ka iyo ni‑ka'nu ñuu ñayivi a, jin koyu'u i maa ni, vi Iya Tátnuni, te tee ka kuu rey ma, jin koyu'u de ja jin kuni de jayiñu'u ni ma.

¹⁶ Vaa nuna ndakani va'a ni ñuu Sion ma, te ndaka ñayii ma jin kuni jayiñu'u ni ma.

¹⁷ Vaa kuniso'o ni ja ka jikan‑ta'vi ñayii nda'vi ñayii kee ka iyo yukan ma, te masu saxiko ni ja ka ka'an ka kachi i ma.

¹⁸ Te ndaka cha'a jakondee nuu tutu ni a, vi Su'si, sukan‑va'a jin kuni ndaka ñayii kenda koo‑ka ma, te jin ndachiñu'u ña'a i, te jin ko kuu i ñuu maa ni, vi Yuva sa Su'si.

¹⁹ Vaa Su'si ma, onde sukun ma onde veñu'u ii ya ma iyo ya, te nde'ya ya nuu ñu'ú ya,

²⁰ sukan‑va'a kuu kuniso'o ya ja ka tnana u'vi ñayii ka iyo ja sani te jin ka'ni ña'a ñayii ma,

²¹ sukan‑va'a ñayii ka iyo ñuu Sion ma, jin ndaka'án i sukan sa'a ya ma, te koo jayiñu'u ya ñuu Jerusalén ma.

²² Kivi jin ndututu ñayii ndaka ñuu kuechi‑ka ma ji'in ñayii ka iyo ñuu na'nu‑ka ma, te jin kunukuechi i nuu Su'si ma kuenda tnu'u ja in‑nka‑ni ñayii ka kuu i.

²³ Maa ya ni sa'a ja ni kuita sa ichi kua'an sa a te jaku‑ni kivi koteku sa.

²⁴ Ni jiña'a sa ya: “Su'si maa sa, máko ndaka'nu sava ni kivi koteku sa ma, vaa ndijin chi ni‑kani ni‑jika iyo ni”, kúu sa jiña'a sa ya.

²⁵ Vaa onde xinañu'u ma, te nda'a maa ni, ni sa'a ni ñu'ú a, te nda'a maa ni, ni sa'a ni andivi ma, te nda'a maa ni a, ni sa'a ni ndaka ma.

²⁶ Te ndaka cha'a chi jin naa i, kovaa maa ni chi koo ni ni‑kani ni‑jika. Te ndaka cha'a chi jin yii i kuenda kúu sa'ma ne'nu sa ma, te kuenda sukan ndáxsama sa sa'ma sa ma‑ni, sukan‑ni ndaxsama ni, te jin ndujaa i.

²⁷ Kovaa maa ni chi suni maa ni koo, te masu nama ndi'i kuiya ni a, vaa ni‑kani ni‑jika koo ni.

²⁸ Te sa'ya ñayii ka jinukuechi nuu ni a chi jin koo va'a i, te ndaka sa'ya tata i ma, jin koo i nuu ni a ni‑kani ni‑jika.