Salmos 101 - New Testament Psalms and Proverbs in Mixtec Magdalena Peñasco

Salmo 101 Jín ku'un ini o ja ni a in ja u'vi jin ko sa'a o nuu Su'si ma

¹ Su'si, ndaka'an ndakachi sa sukan nda'vi ini ni ma, ji'in sukan sa'a ndaa sa'a ndija ni ma. Sukan kata sa nuu maa ni ja ndachiñu'u ña'a sa.

² Su'si, ¿na kivi kii ni nuu iyo sa ya, sukan‑va'a jaku'ni ini sa naxe koo va'a sa nuu ni, te onde ve'e sa ma, te ko kuu vii ko kuu va'a sa nuu ni?

³ Te ni masu ku'un ini sa ja ko sa'a sa ni‑in ja u'vi ma. Su'va saxiko sa ndaka ja ka sa'a ka kuu ñayii ka skendoo ichi ni a, te ni masu kua'a sa tnu'u ja ketna'a ini sa ji'in i.

⁴ Te ni masu kua'a sa tnu'u ja ko kani ini sa ja u'vi ma, te ni masu kua'a sa tnu'u ja ko kituu yatni ña'a i.

⁵ Te ñayii ká'an tnu'u in tna'a i ma chi sa'a sa ja na kasi yu'u i, te ñayii sa'a vixi ja maa i kúu‑ka ma te ñu'u ini i tna'a ja masu nde jiniñu'u ma chi masu kua'a sa tnu'u ja ka'an‑ka i.

⁶ Kovaa nuna kuni sa ñayii ka iyo va'a nuu ni ma chi kuan‑ta'vi sa i, te jin koo i nuu iyo sa ya. Te ñayii jika ichi ndaa ma chi ñayii yukan kunukuechi nuu sa a.

⁷ Kovaa ñayii xnda'vi tna'a i ma te ní'i i xu'un ma, masu kua'a sa tnu'u ja koo i nuu iyo sa ya, ni a ñayii ká'an tnu'u ma te masu ja ndaa kúu ma, masu kua'a sa tnu'u ja koo i ini ve'e sa ma.

⁸ Te xtnee ne'e ma xnaa sa ndaka ñayii ka sa'a ja u'vi ma ja ka iyo i ni‑ka'nu ñuu ñayivi a, sukan‑va'a jín naa ndaka i ne'un ñayii kúu ñuu Su'si Iya Tátnuni ma.