Salmos 100 - New Testament Psalms and Proverbs in Mixtec Magdalena Peñasco

Salmo 100 Ndimaa jin ndakuan‑ta'vi o nuu Su'si ma

¹ Ndaka o ja ka iyo o ni‑ka'nu ñuu ñayivi a, jín ndachiñu'u sii ini o Su'si ma,

² te jín kunukuechi sii ini o nuu Su'si o Iya Tátnuni ma. Ne'e koo sii ini ni nuu iyo ya a.

³ Te jín kona'a o ja Su'si ma ni sa'a ndi‑in ndi‑in o a, te kuenda maa ya ka kuu o, te ñuu maa ya ka kuu o, te ndikachi korraa maa ya ka kuu o. Chukan kúu ja jin ndakunitnuni ni ja maa ya kúu Su'si o Iya Tátnuni ma.

⁴ Te jín kivi koo o ye'e veñu'u nuu iyo ya ma, te jín kata o nuu ya, te jín ndachiñu'u o ya, te jín ndaka'an jín ndakachi o ndaka ja vii ja va'a sa'a ya ma. Te sukan jín ndakuan‑ta'vi o nuu ya ndaka ja va'a táa ya ma.

⁵ Vaa Su'si o Iya Tátnuni ma chi iya va'a ini kúu ya, te ni‑kani ni‑jika kúnda'vi ini ña'a ya, te nuu ndaka sa'ya tata ñayii ma iyo tnu'u ndaa tnu'u ndija ya ma.