Salmos 10 - New Testament Psalms and Proverbs in Mixtec Magdalena Peñasco

Salmo 10 Sukan kakan‑ta'vi o nuu Su'si ma ja na sa'a ya ja kaku o nuu ñayii ka sa'a ja u'vi ma

¹ Iya Tátnuni, ¿nava'a iyo jika ni te chú'u ni ora kénda tnundo'o tnuneni ma nuu iyo sa ya?

² Ñayii ka sa'a ja u'vi ma, ûni ka ndikin i ñayii nda'vi ma, sukan‑va'a jin sa'a ndeva'a i ñayii yukan ma. Kovaa maa i jin ndani'i jin ndatna'a sukan ka ñu'u ini i ja jin sa'a i ñayii nda'vi ma.

³ Vaa ñayii sa'a ja u'vi ma chi kúvixi maa i ja ñu'u ini i ja sa'a i ma, te ká'an i ja vii ja va'a ja kuu ñayii ndiyo ini ma, te saxiko i Iya Tátnuni ma.

⁴ Ñayii sa'a ja u'vi ma, ja jani ini i ja maa i kúu‑ka ma, ká'an i ja ñatuu na Su'si ma iyo. Va ni a vala masu nde ndakune'e i Su'si ma ndaka ja jani ini i ma.

⁵ Te ndaka ja sa'a ja kúu i ma visi va'a‑ni kée ma, kovaa masu ichi va'a ichi ndaa ma kua'an i, vaa ûni saxiko i ñayii ñatuu kétna'a ini ji'in i ma, te másu nde'ya i sukan jani ini maa ni ma, vi Su'si.

⁶ Vaa jani ini i te ká'an i: “Yo'o chi masu na in kundee ja skanda ña'a i nuu iyo o a, ni a masu nama kuiti kuni o tnundo'o tnuneni”, kúu i ká'an i.

⁷ Te yu'u i ma ñu'u chitu ja u'vi ká'an i ma, ji'in sukan sa'a i ja xnda'vi i ñayii ma. Chii yaa i ma ka yinee tnu'u ndeva'a ká'an i ma ja ká'an u'vi i ja jin kuu in‑ka ñayii ma.

⁸ Te kua'an i ichi yu'u ñuu ma, núkoo i chú'u i, sukan‑va'a ka'ni i ñayii nda'vi ñatuu na ja u'vi sa'a i ma ora ya'a ñayii yukan ma, te ni masu nde yá'a nuu i ñayii nda'vi masu nawa kúu sa'a ma,

⁹ vaa kívi i in nuu iyo yu'u ma. Sukan sa'a ndika'a ma ja chú'u ti ini yavi ti ma, sukan iyo tu'va i ja tnii i in ñayii nda'vi ma. Te nú ni tnii i ñayii ma, te ñú'u i ñayii ma kua'an i ji'in ñayii ma onde nuu iyo i ma.

¹⁰ Vaa jínkoo i, te jákindeyi vava'a i, te iyo tu'va i ja ki'in i jin tnii vava'a i ñayii nda'vi ma.

¹¹ Jani ini i te ká'an i: “Su'si ma chi jâ ni ndunaa ña'a ya, te másu nde'ya‑ka ña'a ya, te masu kuni kuiti ña'a ya”, kúu i ká'an i.

¹² Ndokuiñi ni, vi Iya Tátnuni, te ndone'e ni nda'a ni a, te máko ndunaa ni ñayii nda'vi a.

¹³ ¿Nava'a saxiko ña'a ñayii sa'a ja u'vi ma maa ni ja kúu ni Su'si a? Te jani ini i te ká'an i: “Masu ndakan Iya Tátnuni ma kuenda nuu o ja sa'a o ya”, kúu i ká'an i.

¹⁴ Kovaa maa ni chi nde'ya ni ndaka ja u'vi ka sa'a ka kuu i ñayii nda'vi ma, te maa ni chi ndakan ni kuenda nuu ñayii ka sa'a ja u'vi ma, vaa nuu maa ni ka kukanu ini ñayii nda'vi ma, te maa ni chíndee suchi kuechi ñatuu na yuva na si'i‑ka i ma.

¹⁵ Ka'nu ni nda'a ñayii sa'a ja u'vi ma, te ndakan ni kuenda nuu i ndaka ja u'vi sa'a i ma, sukan‑va'a ni‑in‑ka ñayii sa'a ja u'vi ma koo‑ka.

¹⁶ Iya Tátnuni ma kúu Rey ni‑kani ni‑jika, te ndaka ñayii ñatuu ka kandija ya ma chi másu jin koo i ñuu ya ma.

¹⁷ Iya Tátnuni, koniniso'o ni ndaka ja ka jikan‑ta'vi ñayii nda'vi ma, vaa maa ni sa'a ja ka ndusii ini ini anua i ma, te katanuu ni ja ka ka'an i ma.

¹⁸ Vaa maa ni chi chíndee ni ñayii ñatuu na yuva na si'i‑ka i ma, sukan‑va'a ñayii ni sa'a ni ji'in ñu'ú a, máko sa'a‑ka i ja u'vi ma.