Proverbios 9 - New Testament Psalms and Proverbs in Mixtec Magdalena Peñasco

Ñayii ñatuu jan‑ta'vi tnu'u ndichi Su'si ma chi ndimaa ja u'vi sa'a i

¹ Tnu'u ndichi Su'si ma chi kuenda tnu'u ja ni sa'a i in ve'e te ni chituu i uja si'in,

² sani te ni ja'ni i kiti i ma te ni satu'va i ja jin kaa ñayii ma, te ni satu'va i ndute nde'ya uva ma te ni sonee i ndaka nuu mesa ma.

³ Sani te ni tetniñu i ñayii ka jinukuechi nuu i ma ni jan koo i onde nuu sukun‑ka ini ñuu ma, te ni ka keja'a i ka kana i ñayii ka jiniñu'u tnu'u ndichi ma.

⁴ Te sa'a ka jiña'a i: “Ndeva'a‑ni nde ni ñatuu na tnu'u ndichi ka neva'a ni ma te ñatuu ka ni'i ini ni naxe jin ko sa'a jin ko kuu ni ja va'a ma, ne'e koo ni ya'a,

⁵ te jin kaa ni xita tila ni satu'va sa ma te jin ko'o ni ndute nde'ya uva ma ja ni satu'va sa ma.

⁶ Jin xndoo ni ja ka kuneé ka ku‑uun ni a te jin koteku ni te jin kondikin ni jin ko sa'a ni sukan ká'an tnu'u ndichi ma”, ka kuu i ka jiña'a i.

⁷ Ñayii ndáka'an‑so'o nuu ñayii jakundee ña'a ma, ja ni'i i kokuu ja ndonda ñayii yukan nuu i ma, te ñayii ndáka'an na kuechi ñayii sa'a ja u'vi ma chi ja ni'i i kokuu ja saxiko ña'a ñayii ma.

⁸ Va'a‑ka ja máko ndaka'an ni na kuechi ñayii sa'a ja u'vi ma te ko saxiko ña'a i, vaa masu nawa chindee ni i. Va'a‑ka ndaka'an‑so'o ni nuu ñayii ndichi ma te kuni ni ja kutoo ña'a i.

⁹ Kaxtnu'u‑ka ni nuu ñayii ndichi ma, te kundichi‑ka i, vaa ñatuu‑ka na ja u'vi sa'a i ma, te jaku'ni‑ka ini i naxe ko sa'a ko kuu i,

¹⁰ Vaa ja ko kuu o in ñayii ndichi ma chi xinañu'u kuiti‑ka ja koyu'u o Su'si ma te másu ko sa'a o ni‑in ja u'vi te sukan te ko kuu o in ñayii ndichi. Te nuna jin kutu'va o ja jin ko sa'a o sukan ká'an Su'si o iya ñatuu na u'vi sa'a ya ma chi jin ndani'i o janitnuni va'a te jin ni'i ini o nawa jin ko sa'a o.

¹¹ Vaa nuna kandija o te sa'a o sukan ká'an tnu'u ndichi Su'si ma chi sa'a i ja koteku kani‑ka o ñuu ñayivi a.

¹² Chukan kúu ja nuna ko kuu ro ñayii ndichi ma chi ja va'a maa ro ko kuu, kovaa nuna ko kuu maa ro ñayii ndee ini te jakundee ro ñayii ndáka'an‑so'o nuu ro ma chi ja u'vi sa'a ro maa ro te ndachunaa maa ro ja sukan sa'a sukan kúu ro ma.

¹³ Ña'a kúneé kú‑uun ma chi ñatuu ndása'a ña kuenda ja masu ja va'a kúu ja sa'a ña ma,

¹⁴ te jínkoo ña ye'e ña ma, vaa ndúku ña ja ndito ndito‑ka kuni ña na in ka ya'a ichi ma,

¹⁵ te nú ni jini ña ñayii ka jika ndaa ichi Su'si ma ja ñatuu‑ka na u'vi ka sa'a i ma, te kána ña i,

¹⁶ te sa'a jiña'a ña suchi ka kuneé ka ku‑uun ma ja ñatuu ka ni'i ini i naxe jin sa'a i ja va'a ma: “Ne'e koo, te jin kuni ro

¹⁷ ja ndute sakui'na o ma chi va'a‑ka ji'i de sana ndute maa o ma, te jin kuni ro ja kaa yu'u o xtatila ma chi jaa asi‑ka”, kuu ña jiña'a ña.

¹⁸ Kovaa ñatuu ka jini suchi ka kandija ja ká'an ña ma ja ve'e ña ma kúu nuu jin kûu i te jin skenaa i maa i ma, vaa ndaka suchi ka kivi koo ve'e ña ma chi kuenda tnu'u ja onde nuu kunu‑ka andeya ma ka ñunee i.