Proverbios 7 - New Testament Psalms and Proverbs in Mixtec Magdalena Peñasco

Sukan sa'a ña'a kuneé ku‑uun ma ja xnda'vi ña tee ma

¹ Sa'ya maa ri, kandija te sa'a ro sukan tátnuni ri a, te máko ndunaa kuiti ro ndaka ja tátnuni ri a.

² Ko koto va'a ndaka ja tátnuni ri a sukan jito va'a ro nduchinuu ro a, sukan‑va'a koteku ro.

³ Tava'a va'a ini anua ro a, te kinda'a kua'an kinda'a vee ro.

⁴ Kutoo tnu'u ndichi a sukan kútoo ro ku'va ro ma, te ndimaa kóo tnu'u ni kutu'va ro ma ini ve'e ro ma, kuenda tnu'u ja in tna'a maa ro kuu i,

⁵ sukan‑va'a jin kasi ndee jin kasi ndoso ña'a i nuu ña'a vivii ká'an ma ja kúni ña ja kivi nduu ña ji'in in‑ka tee ma.

⁶ Vaa in kivi te nde'ya nde'ya ri ventana ri ma,

⁷ te ni jini ri ja ne'un suchi jaa suchi ñatuu ka jaku'ni ini tnu'u ndichi ma, te iyo in i ja ka'vi‑ka kuu i sana ndaka‑ka i ma,

⁸ te yu'u yu'u‑ni kua'an i ichi ve'e ña'a kúneé kú‑uun ma,

⁹ vaa ñukuun kua'an i ora ve kunee ma, sukan‑va'a ñatuu na‑in kuni ña'a.

¹⁰ Sani te ni kee ña'a kúneé kú‑uun ma ja jin ndatna'a ña ji'in i ma, te na'a ña ja ña'a xiko maa ña kúu ña, te skuiko yu'u skuiko nuu ña sukan kúu ña'a yukan ma.

¹¹ Ña'a ndee xeen ini kúu ña, vaa ñatuu jandetu ña nuu yii ña ma, chukan kúu ja ñatuu kúu koo ña ve'e ña ma,

¹² te ndimaa kua'an vee ña ichi ma ji'in nuya'vi ma kúu ña nduku ña na in kundee ña xnda'vi ña.

¹³ Te ni ndani'i tna'a ña ji'in suchi jaa ñatuu na tnu'u ndichi neva'a i ma, te ni kanuni'ni ña i te ni chitu ña yu'u i, te jiña'a ña nawa kúni ña ma, vaa masu na ja kan‑nuu ña.

¹⁴ Te jiña'a ña: “Vitna ni ndakua'a ri nuu Su'si ma ja ni skuiso ri ma, sukan‑va'a jin ndumani ri ji'in ya.

¹⁵ Chukan kúu ja vee ri ve ndi nduku ñukuun ña'a ri, te vitna ni ka ndani'i tna'a o a.

¹⁶ Vaa vivii jâ ni satu'va ri nuu jin kusu o ma ji'in sa'ma vee ñuu Egipto ma,

¹⁷ te jâ ni ndachi'i ri ve'e ri ma ndute jáxiko asi ja ni kuva'a ji'in mirra ji'in áloe ji'in canela ma.

¹⁸ Ne'e, te jín koo o te jín koo sii ini xeen o niñu onde jin ndatuu jin ndandii o yutnee ma.

¹⁹ Vaa yii ri ma chi ñatuu na tee iyo ve'e ri ma chi ni kee de kua'an jika de,

²⁰ te kua'an de ji'in in bolsa xu'un, te kukuee de kua'a kivi sana ndenda de”, kúu ña jiña'a ña.

²¹ Te vivii ká'an ká'an ña onde ni kundee ña ni xnda'vi ña suchi jaa ma,

²² te ni masu ni jini maa i ja ni xnda'vi ña'a ña ma, te ni ndikin i ña sukan kúu in xndiki kua'an nuu kûu ti ma, xi sukan kúu ñayii ndee xeen ini ma te kua'an i vekaa ma ja na ndo'o neni i ma,

²³ xi sukan kúu in lasaa ja masu jini ti nawa ndo'o ti ma, te kivi ñukuun ti nuu ni ka satu'va i ja jin tnii i ti te jin ka'ni i ti ma, sukan kúu suchi jaa ñatuu na tnu'u ndichi neva'a i ma.

²⁴ Chukan kúu ja ro'o ja kúu ro sa'ya ri a, koniniso'o ñukuun ja ká'an káchi ri nuu ro a,

²⁵ te máko ndunaa ro ichi va'a a te ko kondikin ro ichi kaxtnu'u ña'a yukan, te máko ko ku'un ini ro ña te ko kondikin ro ña,

²⁶ vaa jâ ni kukua'a xeen tee ja'ni ña ja sukan kúu ña ma.

²⁷ Vaa ichi nuu jin kûu ñayii kúu ichi ve'e ña ma, te ichi nuu jin skenaa i maa i kúu.