Proverbios 6 - New Testament Psalms and Proverbs in Mixtec Magdalena Peñasco

Ñayii sa'a sukan ká'an Su'si ma chi ma ko kuu in ñayii kuxi, ñayii xnda'vi tna'a

¹ Sa'ya maa ri, nú na in ni jikan‑ta'vi nuu ro ja ko kuu ro yunuu i ja na kakan yika ro nawa kúni i ma xi nú jâ ni skuiso ro ja kuu ja ko kuu ro yunuu i ma,

² chi kuenda tnu'u ja ni ju'ni vava'a ro maa ro ja sukan ni ka'an ro ma,

³ te vitna chi sa'a sa'a ro, sukan‑va'a kaku ro nuu nda'a in‑ka ñayii ma, te máko kukan‑nuu ro, te kua'an te ka'an vii ka'an va'a ro ji'in ñayii ni yo kuu ro yunuu i ma, te kuña'a ro ja masu ndachunaa ro nuu tniñu i ma te na ndachunaa maa i.

⁴ Kovaa ni másu ko kusu tnuni ro, te ûni ki'in ro te kuña'a ro i sukan.

⁵ Tnuñu ja na kaku ro sukan kaku in isu ma nuu nda'a tee nduku ja ka'ni de ti ma, xi sukan kaku lasaa ma nuu nda'a tee ndúku ti ma.

⁶ Ro'o ja kuu ro ñayii kuxi xeen ma, konde'ya sukan sa'a tioko ma, te ndasa'a kuenda sukan sa'a sukan kúu ti ma, te ko kuu ro in ñayii ndichi.

⁷ Vaa tioko ma, masu na in tátnuni nuu ti naxe ko sa'a ko kuu ti sukan‑va'a koteku ti ma.

⁸ Kovaa maa ti chi tiempu kúun savi ma te iyo kua'a ja kaa ti ma te ndí ini ti ja tiempu yukan kúu ja ndáxtutu ndáxtutu ti te táva'a ti sukan‑va'a tiempu yichi ma te koo ja kaa ti ma.

⁹ Kovaa ro'o ñayii kuxi, ¿na saa‑ka kivi kavatuu kavatuu‑ni ro, te na saa‑ka kivi sana ndoto ro ja kixi kixi‑ni ro a?

¹⁰ Jâ ni kuu‑ni ja kixi ndeyi kixi ndichi ro a te ndachunenu tna'a tna'a‑ni ro nda'a ro te ndatatu ndatatu‑ni ro a.

¹¹ Vaa nú sukan‑ni kúu ro a chi yachi yachi‑ni kenda ja ko kunda'vi ko kukee ro te kundee i nuu ro.

¹² Ñayii sa'a ja u'vi ma masu jini‑ka maa i ja sa'a i ma, te nanimaa‑nka tnu'u ndeva'a tnu'u kini kée yu'u i ma.

¹³ Onde nuu i ma sa'a xiñi i, te ji'in nda'a i ma ji'in ja'a i ma sa'a i seña ja ká'an ndeva'a i ma.

¹⁴ Vaa nanimaa ja u'vi ñu'u ini anua i ma, te ndimaa ñu'u ini i ja sa'a i ja u'vi ma.

¹⁵ Chukan kúu ja sanaa sanaa‑ni, te kenda ja skenaa ndi'i kuiti i ja neva'a i ma, te ni masu nawa ndani'i‑ka i, te ja sukan ndo'o i ma, masu na in kasi ndee.

¹⁶ Vaa iñu ja sa'a ñayii ma masu jatna ini Su'si ma, te ja ku‑uja ma chi ûni onde ini anua ya ma saxiko ya.

¹⁷ Ñayii ndee xeen nuu i ma ja jani ini i ja maa i kúu‑ka ma, ñayii ka'an tnu'u ma, ñayii ja'ni ñayii ñatuu na kuechi ma,

¹⁸ ñayii jani ini naxe sa'a i ja u'vi ma, ñayii ûni jinu i kua'an i ja sa'a i ja u'vi ma,

¹⁹ ñayii ka'an ja ni jini nuu i ma te masu ja ndaa kúu ja ká'an i ma, ji'in ñayii sa'a ja ka ndakiti ini nuu tna'a ñayii ka ketna'a ini ma.

²⁰ Sa'ya maa ri, tava'a ndaka ja tátnuni yuva ro a, te máko xndoo ro ja ni kaxtnu'u si'i ro ma nuu ro a.

²¹ Ndimaa ku'un ini tnu'u ya'a te ûni kuenda tnu'u ja kondeku ro,

²² vaa ndaka tnu'u ka ka'an ka kachi yuva ro ma nuu ro ma, te ni'i ini ro naxe sa'a naxe kuu ro ndenu kua'an ndenu vee ro ma, te sa'a i ja kusu ro te ndatatu sii ini ro, te ora ndoto ro ma te kuenda tnu'u ja maa tnu'u yukan ká'an‑so'o nuu ro.

²³ Vaa tnu'u tátnuni ri a chi kuenda tnu'u ja in ñu'u ndú'va kúu i, te ja káxtnu'u ri a chi xtnuu i nuu ro sukan kúu ñu'u ndú'va ma, te ja ndáka'an‑so'o ri nuu ro ja ndákani ichi ña'a ri a chi sa'a i ja koteku ro,

²⁴ te sa'a i ja kaku ro ja ma xnda'vi ña'a ña'a kúneé kú‑uun ma ña'a vivii ká'an te masu ñasi'i ro kúu ña ma.

²⁵ Te máko ndiyo ini ro ja vivii kaa ña ma, te ni máko kua'a ro tnu'u ja kundee ña xnda'vi ña'a ña ji'in nduchinuu ña ma.

²⁶ Ña'a xiko maa ña ma chi ja kúni ña kúu ja na ni'i ña ja kaa ña ma, kovaa ña'a kúneé kú‑uun ma chi ndúku ña ja na xnda'vi ña tee ñu'u kaji ini ma.

²⁷ Vaa kona'a ro ja masu na‑in kuu chiso i ñu'u i'ni ma siki sa'ma ne'nu i ma te ma kayu sa'ma i ma,

²⁸ te ni masu kuu kaka tee ma siki ñu'u i'ni ma te ma kayu ja'a de ma.

²⁹ Vaa tee kívi nduu ji'in ñasi'i in‑ka tee ma chi másu yanduu ja ndachunaa de ja ni sa'a de ma.

³⁰ Vaa nawa kúu ja tee sakui'na sana ni'i de ja kaa de ma masu ka sanuu xeen ñayii ma.

³¹ Kovaa nuna jin ndani'i ñayii ma de ja sukan sa'a de ma chi uja‑ka jichi ndakua'a de sana ja ni sakui'na de ma, te ndakua'a de onde ndaka ja neva'a de ve'e de ma.

³² Kovaa vi'i‑ka ndachunaa tee kívi nduu ji'in in‑ka ña'a ma, vaa jini de te masu ndasa'a de kuenda, te xtivi de ini anua de ja sukan sa'a de ma.

³³ Ja ni'i de kúu ja jin ka'ni i de xi jin xtnakue'e i de, te ja kan‑yu'u ja kan‑nuu ni'i de ma chi masu naa kuiti.

³⁴ Vaa tee xi‑ñasi'i ma chi ja kukueñu de ña ma sa'a ja ûni ndakiti xen‑xeen ini de, te ni masu sakanu ini de tee ni kivi nduu ji'in ñasi'i de ma onde ndachunaa de.

³⁵ Te ni masu kuan‑ta'vi de nawa jin kua'a i ja jin ndaka'an mani i de, te ni masu kachi de ja sakanu ini de, visi na nduku tee ndiso kuechi ma kua'a xeen ja skuta'vi de tee ma.