Proverbios 5 - New Testament Psalms and Proverbs in Mixtec Magdalena Peñasco

Ñayii sa'a sukan ká'an tnu'u ndichi Su'si ma chi ñatuu sa'a i ja u'vi

¹ Sa'ya maa ri, katanuu tnu'u ndichi ká'an káchi ri a, te koniniso'o ñukuun ro,

² sukan‑va'a kutu'va ro tnu'u ká'an so'o ri nuu ro a te ndimaa tnu'u ndichi ko ka'an ro,

³ sukan‑va'a kaku ro nuu ña'a kúneé kú‑uun ma ja vivii ká'an ña ma. Vi'i‑ka saa nduxi ma xi xe'en, sukan ka kuu tnu'u ká'an ña ma.

⁴ Vaa tee kandija ja ká'an ña ma chi ja u'vi xeen ko kuu maa de, vaa vi'i‑ka saa in ja uwa xeen xi in yuchi xen‑xeen kúu ja ni ja'nde ña'a, sukan ko kuu ja ndo'o neni de ma.

⁵ Vaa masu ndása'a maa de kuenda ja ndita ndita kua'an de nuu kûu de ma te skenaa de maa de ma, vaa ñayii ka sa'a sukan sa'a ña'a kúneé kú‑uun ma chi jin kûu i te jin skenaa i maa i ma.

⁶ Vaa ña'a yukan chi masu ndí ini ña ja ko sa'a ña ja va'a ma te koteku ña ma, te ni masu ndása'a maa ña kuenda ja ichi kua'an ña ma chi ichi nuu skenaa ña maa ña kúu.

⁷ Sa'ya maa ri, koniniso'o va'a ja ká'an káchi ri nuu ro a, te máko ndunaa ro sukan jani ini ja ká'an ri a.

⁸ Kakayata ro nuu iyo ña'a yukan, te ni máko jin tu'va ro ye'e ña ma,

⁹ sukan‑va'a má jin sa'a ndeva'a ña'a tna'a ña ma te ma skenaa ro maa ro, ni a jin ko ka'an i ja masu ni sa'a ro ja va'a,

¹⁰ nasa yukan te in‑ka ñayii jin kaa jin ko'o ndaka ja ni ni'i ro ja ndo'o neni ro satniñu ro ma,

¹¹ te kenda kivi ja kuu nija'nu ro ma te ndakani ndaka'vi ini ro te ndanda'yu ro ja ni sa'a ro ja u'vi ma.

¹² Te ndaka'an ro: “Nava'a ni saxiko o tnu'u ndichi ni ka yo ka'an i nuu o ma, te naku ñatuu ni jan‑ta'vi ini anua o a ja ni ka yo ndaka'an so'o i nuu o ma,

¹³ te nava'a ñatuu ni yo niniso'o o tnu'u ni ka yo kaxtnu'u i nuu o ma sukan‑va'a ko sa'a o ja va'a ma. Nute ni jatanuu o chi koo va'a‑ka o nkuu.

¹⁴ Te vitna chi masu nawa kúu‑ka o nuu ñayii a, vaa kuechi ja nanimaa ja u'vi ni yo sa'a o ma, te masu na in kúnimani va'a‑ka nuu o”, ndaka'an ro.

¹⁵ Chukan kúu ja kandija sukan ká'an tnu'u ndichi Su'si a, te ko kuu ro in tee ku'un va'a ini, te ko'o ro ndute ñu'u va'a ve'e ro ma.

¹⁶ ¿Vaa naku ko kati ro ndute ro ma ndeva'a‑ni ichi ma xi nuu ka ndatna'a kua'a ñayii ma?

¹⁷ Vaa kona'a ro ja kuenda maa ro kúu, te ¿naku ko kuatniñu ro ji'in in‑ka ñayii ja masu ñayii ve'e ro ma kúu i ma?

¹⁸ Ja vii ja va'a kúu tnu'u ndee tnu'u ndatnu neva'a ro ma, te koo sii ini ji'in ñasi'i ro ma ña'a ni tnanda'a ji'in ro nuu ka iyo jaa ro ma.

¹⁹ Kani ini ja sukan kaa in isu vivii ma, sukan kaa ñasi'i ro ma, te ni‑kani ni‑jika ko jatna ini ro sukan vivii kúu ñasi'i ro ma nuu ro ma. Te ndunaa ndaka tnundo'o tnuneni iyo ma, te ndimaa ku'un ini sukan ka kutoo tna'a ro ji'in ñasi'i ro ma.

²⁰ Sa'ya maa ri, ndasa'a kuenda vaa masu kuaa ro, vaa ko kondikin ro ña'a kúneé kú‑uun ma te kunu ni'ni ro ña'a masu ñasi'i ro kúu ña ma.

²¹ Vaa kona'a ro ja Su'si ma chi nde'ya nde'ya‑ni ya ndaka ñayii ma nawa ka sa'a ka kuu i ma, te jini ya nú ja va'a xi ja u'vi kúu ja ka sa'a ka kuu i ma.

²² Vaa kona'a ro ja ñayii sa'a ja u'vi ma chi maa ja u'vi ni sa'a i ma ndatnii vava'a ña'a te konu'ni vava'a maa i, te kondiso maa i kuechi i ma.

²³ Te sukan kûu maa i, vaa ñatuu ni kandija i ja ni ka yo ndaka'an so'o ñayii ndichi ma, te skenaa i maa i ja sukan so'o ni kaa i ma.