Proverbios 4 - New Testament Psalms and Proverbs in Mixtec Magdalena Peñasco

Ñayii jan‑ta'vi tnu'u ndichi Su'si ma chi ko kuu i in ñayii ndichi

¹ Sa'ya maa ri, jin konini so'o ja ká'an ru'u ya ja kúu ri yuva ro a, te jin konde'ya va'a ro naxe jin ko sa'a jin ko kuu ro sukan tátnuni ri a, sukan‑va'a jin koo va'a maa ro ñuu ñayivi a.

² Vaa ru'u ya chi káxtnu'u vii káxtnu'u va'a ri naxe jin ko sa'a jin ko kuu ro, te máko jin ndunaa ro ndaka ja tátnuni ri a.

³ Vaa ru'u ya tna chi ni iyo ri nuu yuva ri ma te ni yo jatanuu ñukuun ña'a si'i ri ma.

⁴ Te sa'a ni yo ka'an yuva ri ma nuu ri: “Tava'a ini anua ro a ndaka tnu'u ká'an tnu'u káchi ri a, te ko sa'a ro sukan tátnuni ri a, te koteku ro.

⁵ Ûni ku'un ini ro ja kutu'va ro tnu'u ndichi ká'an ri a, te ni'i ini ro naxe ko sa'a ko kuu ro, te máko ndunaa ro ndaka ja ká'an ja káchi ri a, su'va ku'un ini ro ja ko sa'a ro,

⁶ te másu ko xndoo ro tnu'u ká'an ri a sukan‑va'a sa'a i ja koo va'a ro, te ko kuu sii ini ro ja ko sa'a ro ma, sukan‑va'a kaku ro nuu ja u'vi ma.

⁷ Ja kanuu xeen‑ka kúu ja kutu'va ro tnu'u ndichi ma te ko kuu ro in ñayii ndichi ma, sana ndeva'a‑ni nawa ko ni'i ko tna'a ro ñuu ñayivi a.

⁸ Nuna katanuu ro ja ko sa'a ro sukan ká'an tnu'u ndichi Su'si ma, te sa'a i ja koo jayiñu'u ro, te sukan ko kuu nuna tnii vava'a ro te katanuu ro.

⁹ Ja vii ja va'a ko kuu nuu ro nde kua'an nde vee ro. Sukan vii kaa in ja yoxtnee xini rey ma, sukan ko kuu ja taa tnu'u ndichi Su'si ma.”

¹⁰ Sa'ya maa ri, konini so'o te kuan‑ta'vi ro tnu'u ndichi ká'an ri a, te sa'a i ja koteku kani ro ñuu ñayivi a,

¹¹ vaa ru'u ya chi ichi va'a ichi ndaa ma ni skaka ña'a ri, sukan‑va'a ko kuu ro in ñayii ndichi ma.

¹² Te nú ndenu kua'an ndenu vee ro ma chi ñatuu nawa kenda ja kasi i ichi ro ja skenaa ro maa ro, vaa jâ jini ro tnu'u ndichi a.

¹³ Te kuta'vi ndaka ja ká'an káchi ri nuu ro a, te ku'un ku'un‑ni ini ro te máko xndoo ro, vaa suu i sa'a ja koteku ro.

¹⁴ Másu ko ndikin ro ichi ñayii ka sa'a ja u'vi ma te ko sa'a ro sukan ka sa'a i ma.

¹⁵ Visi ni kenda ro nuu ka iyo i ja ka sa'a i ja u'vi ma, kovaa má ki'in ro, su'va kuiko te yanduu ro.

¹⁶ Vaa ñayii yukan chi masu ka kixi i nú ñatuu jin kundee‑ka i ja jin sa'a i ja u'vi ma, te ni masu ka kixi tnuni i nú ñatuu na‑in ka ni'i i ja jin sa'a i ja skenaa ñayii ma maa i ma.

¹⁷ Vaa kuenda tnu'u ja ndeyu i ma kúu ja ka sa'a ndeva'a i ñayii ma, xi xita i ma kúu ja ka sakui'na i ma.

¹⁸ Kovaa ñayii ka jika ichi va'a te ka sa'a i ja ndaa ma chi jin ko kuu i sukan kúu ja ve ndii ma, vaa xinañu'u kukuijin ma, sani te ve ndii ve ndii‑ka ma onde kenda ja ndii vava'a‑ka ma.

¹⁹ Kovaa ñayii ka sa'a ja u'vi ma chi kuenda tnu'u ja nee kuiti ichi kuan koo i ma, vaa ni masu ka jini maa i, te ka kendeka ka kee ni'ni i kuan koo i.

²⁰ Sa'ya maa ri, ndasa'a vava'a kuenda tnu'u ndichi ká'an ri a, te konini so'o vava'a ro sukan jani ini ri a,

²¹ te tava'a va'a ro ini anua ro a ja ká'an káchi ri nuu ro a te ndasa'a vava'a ro kuenda naxe ko sa'a ko kuu ro.

²² Vaa ñayii ni ndani'i tnu'u ndichi a chi kuenda tnu'u ja jatatna kúu nuu yikikuñu i ma, te sa'a tnu'u ndichi ma ja koteku i ma.

²³ Ko koto vava'a‑ka ini anua ro a sana ndaka‑ka ja neva'a ro a, vaa ini anua ro a kúu ja chindee ña'a ja koteku ro nuu Su'si ma.

²⁴ Te ku'un ini ro ja másu ko ka'an ro tnu'u ndeva'a tnu'u kini ma, te másu ko kua'a ro tnu'u ja ko kuiso kuechi ro ja kuechi ja ká'an ro ma.

²⁵ Te ndimaa konde'ya konde'ya‑ni ro ja va'a ma ja ko sa'a ro, te ûni ku'un ini ro ja kundee ro sa'a ro.

²⁶ Te ndimaa ndasa'a ro kuenda nawa sa'a nawa kúu ro ndenu kua'an ndenu vee ro. Sukan, te kuni ro ja ndaka ja sa'a ro ma chi kee va'a.

²⁷ Ku'un ini ro ja ichi va'a ni tnii ro a‑ni ko kaka ro, te másu ko ndatnii ro ichi u'vi ma ja ko kaka ro.