Proverbios 30 - New Testament Psalms and Proverbs in Mixtec Magdalena Peñasco

Tnu'u ndichi ni ka'an tee kúu Agur ma

¹ Cha'a ka kuu tnu'u ndichi ni ka'an tee kúu Agur sa'ya Jaqué ma nuu Itiel ma ji'in Ucal ma.

² Saña chi kúkuee xeen‑ka sa sana ndaka‑ka tee ma, vaa ni ñatuu jaku'ni ini sa sukan ka jaku'ni ini ñayii ma,

³ vaa ni ñatuu kutu'va‑ka sa ja ko kuu sa in ñayii ndichi, te ñatuu jáku'ni ini sa sukan kúu Su'si ma, iya ñatuu na ja u'vi sa'a ma.

⁴ ¿Na in ni kaa onde andivi ma te ni nuu i? ¿Na in ni kuu ni tnii tachi yi'i ma ji'in nda'a i ma? ¿Na in ni kuu ni ndaxtutu ndute ma in nuu pañu te ni ju'ni i de? ¿Na in ni sa'a nuu ni ka jakituu ñu'ú iyo ni‑ka'nu ñuu ñayivi a? ¿Naxe nani iya ni sa'a ndaka cha'a, te naxe nani sa'ya ya ma?

⁵ Ndaka tnu'u ká'an Su'si a chi tnu'u ndaa tnu'u ndija, tnu'u nanimaa kúu, te kuu kukanu ini o ya, vaa jasi ndee ña'a ya nuu ja u'vi ma ja ma kaki'i ña'a i.

⁶ Chukan kúu ja máko nduku ni ja ndaxsama ni sukan ká'an tnu'u ya ma, nú ña'a te ndonda xeen Su'si ma nuu ni te xnani ña'a ya ñayii tnu'u.

⁷ Su'si Iya Tátnuni, uu ja jikan‑ta'vi xeen sa nuu ni, te skuta'vi ña'a ni nduu cha'a nani ndito téku sa ñuu ñayivi a.

⁸ In kúu ja máko ku'un‑ka ini sa tna'a ja masu nde jiniñu'u ma, ji'in ja máko ka'an‑ka sa tnu'u xnda'vi tna'a ma. Te in‑ka kúu ja chindee ña'a ni ja má ko kunda'vi ko kukee sa te ni a ko kuxiku xeen sa. Su'va ja jikan‑ta'vi sa nuu ni kúu ja na skuta'vi ña'a ni ja jiniñu'u sa ja koteku sa in kivi in kivi ma‑ni.

⁹ Vaa nuna ko ni'i ko tna'a sa ma chi nasa yukan, te ndunaa ña'a sa te ka'an sa ja masu jini ña'a sa, te nuna ko kunda'vi ko kukee sa ma chi nasa yukan, te sakui'na sa, te ja kuechi sa te jin ka'an ndeva'a ñayii ma ja kuu ni, vi Su'si.

¹⁰ Másu ko xtekuechi tnu'u ni ñayii jinukuechi ma nuu jito'o i ma, nasa yukan te ka'an u'vi i ja kuu ni te ndo'o neni ni ja ka'an i ja kuu ni ma.

¹¹ Ka iyo jaku ñayii ja ka ka'an u'vi i nuu yuva i ma te masu ka ka'an vii i ja kuu si'i i ma,

¹² te ka iyo jaku i ja ka jani ini i ja ñayii masu na kuechi ka ndiso ka kuu i, kovaa ja ndandaa kúu ja ñayii ka sa'a ja u'vi ka kuu i.

¹³ Suni ka iyo ñayii ka jani ini i ja maa i ka kuu‑ka sana jaku‑ka ñayii ma, te ka saxiko i ñayii yukan.

¹⁴ Ka iyo ñayii ja kuenda tnu'u ja in yuchi ka kuu nu'u i ma, xi nu'u kiti xeen ma ka kuu, te ûni ka sakui'na i ja ka neva'a ñayii nda'vi ka iyo ñuu ñayivi a, te ka xnaa i ñayii yukan.

¹⁵ Ka iyo uu sa'ya kiti nani sanguijuela ma, te ndimaa sa'a ka ka'an ti: “Taa ni, taa ni”, ka ka'an ti. Te suni sukan ka iyo uni kuun tna'a ja masu nde ka ndajinu ini i:

¹⁶ In kúu nuu ka yinee ndiyi ma, ja ku‑uu ma kúu ña'a ñatuu kúu koo sa'ya ña ma, ja ku‑uni ma kúu ñu'ú yichi ma ja jiniñu'u i ndute ma, te ja ku‑kuun ma kúu ñu'u ndú'va ma ja masu nde ndá'va i ma.

¹⁷ Suchi nde'ya yuva i ma te saxiko i de ma, te ñatuu kandija i ja ká'an si'i i ma, na jin tava lakaka ma nduchinuu i ma, te ya'a tioko ma, na jin kaa ña'a ti, te jín xnaa ña'a ti.

¹⁸ Ka iyo uni kuun tna'a ja ñatuu kúu jaku'ni ini sa:

¹⁹ In ja masu jaku'ni ini sa kúu naxe kúu ja ndava ya'a tioko ma andivi a, ja ku‑uu ma kúu sukan skanda koo ma maa ti ja kua'an ti nuu toto ma, ja ku‑uni ma kúu sukan jika barcu ma nuu ndute ma, ja ku‑kuun ma kúu naxe sa'a suchi yii ma, ja kútoo ña'a suchi si'i ma.

²⁰ Sa'a sa'a ña'a kívi nduu ji'in ndi‑in ndi‑in tee ma: Ja ni jinu ni sa'a ña ja u'vi ma, te vivii ndásavii ña yu'u ña ma, sukan‑va'a masu na in kuni nawa ni jaa ña ma, sani te sa'a ña tnu'u ja masu na ja u'vi ni sa'a ña.

²¹ Ka iyo uni kuun ja nde'e xeen ka kuu i nuu ñu'ú ya te masu nde ka kundee‑ka ini ñayii ka iyo nuu ñu'ú ya, vaa xndo'o xneni ña'a i:

²² In kúu ja in ñayii jinukuechi‑ni kúu i ma, te kénda i ja ko kuu i rey ma. Te in‑ka kúu ja in ñayii kúneé kú‑uun ma, te neva'a i ndaka ja kaa ja ko'o i ma.

²³ Ja ku‑uni ma kúu ja ña'a ñatuu na in kúnimani nuu ña ma, te tnánda'a ña ma. Te ja ku‑kuun ma kúu ja in suchi si'i jinukuechi ma te kúndee i núkuiñi i nuu tniñu ña'a xi‑nuu satniñu i ma.

²⁴ Te ka iyo tna kuun kiti inulilikin ñuu ñayivi a kovaa kiti ndichi xeen ka kuu ti, te inundichi xeen‑ka ti sana ñayii inundichi ka iyo a:

²⁵ In ti kúu tioko ma ja kiti lilikin xeen ka kuu ti ma, masu na tnu'u ndee tnu'u ndatnu ka neva'a ti, kovaa kivi iyo kuikuii ma, te ndaka ti ka xtutu te ka satu'va ti ja jin kaa ti kivi ñatuu nawa iyo ma.

²⁶ In‑ka ti kúu iso ma ja masu na tnu'u ndee tnu'u ndatnu ka neva'a ti, kovaa onde me'ñu toto ma ka sa'a ti ve'e ti ma.

²⁷ Kiti ku‑uni kúu tika langosta ma ja masu na rey tátnuni nuu ti, te tutu tutu‑ni ka ndava ti kuan koo ti.

²⁸ Kiti ku‑kuun ma kúu lana'ña ma ja kánda nuu nda'a o ma kun‑nee ti, kovaa onde ini palaciu rey ma iyo ti.

²⁹ Ka iyo uni kuun ja ka jini o ja vivii kuan koo ve koo ka kuu i nuu ñu'ú a, te ja ku‑kuun ma chi ûni kua'an vee maa i kúu i:

³⁰ In kúu ndika'a ma ja iyo‑ka tnu'u ndee tnu'u ndatnu ti sana ndaka‑ka kiti ma, te másu yu'u ti vaa masu nawa kundee ja ndaskakayata ña'a i.

³¹ In‑ka ti kúu li'li kiti lili lili jika ma. Kiti ku‑uni ma kúu tilu ma ja ûni kunuu maa ti kua'an ti ma. Ja ku‑kuun ma kúu tee kúu rey ma ja yoxtnuu de nuu ndaka‑ka tee ka kuu soldado ma, te másu na in kundee nuu de ma.

³² Nú jani ini ni ja in ñayii kanuu‑ka kúu ni, sukan sa'a suchi ndee ini ma kúu ni, xi nú ni jani ini ni ja sa'a ni ja u'vi in‑ka ñayii ma, va'a‑ka kasi nda'a ni yu'u ni a te máko ka'an ni,

³³ vaa ja ndaa kúu ja ñayii káva nuu káva nuu lechi ma chi kúndee i sa'a i ja jáa mantequilla ma, te ñayii ju'ni ni'i xitni i ma chi sa'a i ja kee niñi xitni i ma, te ñayii skiti ini in‑ka ñayii ma chi ja sa'a i kúu ja jin kanaa jin kanaa‑ni ñayii ma.