Proverbios 3 - New Testament Psalms and Proverbs in Mixtec Magdalena Peñasco

Jín katanuu o tnu'u ndichi Su'si ma, sukan‑va'a jin ko kuu o ñayii ndichi

¹ Sa'ya maa ri, máko ndunaa ro ndaka ja káxtnu'u ri nuu ro a, su'va tava'a onde ini anua ro a, te ku'un ini ro ja ko sa'a ro sukan ká'an tnu'u tátnuni ri a.

² Vaa sukan, te koteku ro kua'a xeen kuiya, te koo sii ini xeen ro, te koo va'a ro.

³ Másu ko ndunaa kuiti ro ja ko sa'a ro ja ndaa ja ndija ma. Te ko kutoo ndija ro in‑ka ñayii ma, te ku'un ku'un‑ni ini ro ja sukan ko sa'a ro ndaka kivi nde kua'an nde vee ro. Ûni másu ko ndunaa ro.

⁴ Te sukan, te kuatnu'u ini ña'a Su'si ma ja va'a‑ni sa'a ro, te suni jin ka'an vii jin ka'an va'a ñayii ja kuu ro.

⁵ Ni‑yu'u ni‑ini ro kukanu ini ro Su'si ma nawa sa'a ro ma, te máko kukanu ini ro ja ja jani ini maa ro ma te kuu sa'a ro nawa kúni ro ma.

⁶ Ndakunitnuni ro ja maa Su'si ma, sana kuu sa'a ro nawa kúni ro ja sa'a ro ma, te maa ya chindee ña'a ndaka nawa jiniñu'u ro ma.

⁷ Máko kani ini ro ja maa ro kúu ñayii ndichi‑ka, su'va koyu'u Su'si iya ndákan kuenda ma, te kakayata nuu ja u'vi ma.

⁸ Te ja sa'a ro sukan chi kuenda tnu'u ja in jatatna ko kuu nuu yikikuñu ro a, te koo sii ini ro, te koo va'a ini anua ro a.

⁹ Te ndaka nawa ni'i tna'a ro ma ji'in ndaka ja xinañu'u kée itu ro ma ndakua'a nuu Su'si ma.

¹⁰ Te sukan, te ku'un chitu yaka ve'e ro ma ja kaa ja ko'o ro ja taa Su'si ma.

¹¹ Sa'ya maa ri, máko saxiko ro ja ndáka'an so'o ni'i Su'si ma nuu ro ma, te máko ndakiti ini ro ja káxtnu'u ya ja masu va'a‑ni sa'a ro nuu ya ma.

¹² Vaa Su'si ro Iya Tátnuni ma chi ñayii kútoo ya ma chi ndonda ya nuu i ja ndáka'an so'o ni'i ya nuu i nú masu va'a‑ni sa'a i ma. Vaa sukan sa'a tee ma ji'in sa'ya de ma, ja ndónda de nuu i nú ñatuu sa'a i ja va'a ma, vaa kútoo de i ma.

¹³ Naka vii naka va'a kúu ñayii ni'i tnu'u ndichi wa'a Su'si ma, vaa jáku'ni ini i te kúu i in ñayii ndichi.

¹⁴ Vaa ja va'a‑ka kúu ja ni'i o tnu'u ndichi ma sana ja ni'i o xu'un plata ma. Te chíndee xeen‑ka ña'a tnu'u ndichi ma sana oro ma.

¹⁵ Ja va'a xeen‑ka kúu tnu'u ndichi Su'si ma sana yuu vivii ka ndaa ma te ka ndeya'vi xen‑xeen ma. Tnu'u ndichi Su'si a chi ûni ñatuu nawa iyo ñuu ñayivi a ja inuu kúu ji'in i.

¹⁶ Nuna kandija o sukan ká'an tnu'u ndichi Su'si o ma chi sa'a i ja koteku kani o; te sa'a i ja ko ni'i ko tna'a o te ko jin ka'an vii jin ka'an va'a ñayii ma ja kuu o.

¹⁷ Ja vii xeen kúu ja kondikin o sukan ká'an tnu'u ndichi Su'si o a, vaa sa'a i ja koo sii ini o.

¹⁸ Tnu'u ndichi Su'si a chi sa'a i ja koteku ñayii tnii vava'a ma. Naka vii naka va'a kúu ñayii jan‑ta'vi ndaka sukan ká'an tnu'u Su'si ma te ñatuu xndoo i ma.

¹⁹ Vaa Su'si Iya Tátnuni ma chi ni ka'an ya‑ni, te ni kuva'a ñu'ú a te iyo vava'a. Te ja ni ka'an ya ma‑ni, te ni kuva'a andivi ma, te ni jinkuiñi vava'a i. Vaa iya ndichi kúu ya.

²⁰ Te ja sukan ndichi ya ma, te ni sa'a ya ja ni ka ndusiin ndute ma nuu ka ñu'u kuakua'a de ma. Te suni ni sa'a ya ja ndúu viko ma, sani te kúun savi ma.

²¹ Sa'ya maa ri, ku'un kaji ku'un va'a ini ro, te konde'ya vava'a ro sukan ká'an tnu'u ndichi Su'si a, te ko sa'a ro sukan ká'an ya ma,

²² te sa'a i ja koteku ro te vivii kona'a ro nde kua'an nde vee ro,

²³ te ñatuu nawa ko ndi ini ro nde kua'an nde vee ro, vaa masu nawa sa'a ja kotuu ro ichi Su'si ro a.

²⁴ Te ora jínkavatuu ro ma, te masu nawa koyu'u ro, te sii ini xeen kusu ro.

²⁵ Te ni masu nawa koyu'u ro ja koo yika ro ja sanaa sanaa‑ni, te kenda in ja u'vi nuu iyo ro a, sukan jin ndo'o ñayii ñatuu ka kandija Su'si ma ja ndimaa ja u'vi ka sa'a i ma.

²⁶ Vaa Su'si ma kúu iya kúkanu ini ro, te maa ya kasi ndee kasi ndoso ña'a ja masu kenda ro nuu ja u'vi ni ka satu'va i ma ja jin tnii ña'a i ma.

²⁷ Nú iyo in ñayii nawa jiniñu'u i ma te nú kuu chindee ro i, máko kondetu ro.

²⁸ Te máko kuña'a ro: “Kua'an, te yutnee te kii ro te chindee ña'a ri”, ora neva'a ro ja kuu chindee ro i ma.

²⁹ Te máko ku'un ini ro ja sa'a u'vi ro ñayii iyo yatni ji'in ro ma, vaa kúkanu ini ña'a i ja masu na ja u'vi ko sa'a ro i.

³⁰ Te máko nduku ro ja ko kanaa ro ji'in ni‑in ñayii, nú ñatuu na ja u'vi ka sa'a ña'a i ma.

³¹ Te máko kukueñu ini ro ja sa'a ja kúu maa ñayii sa'a ja u'vi ma ja ndimaa xnda'vi i ñayii ma. Te má kondikin ro ja ko sa'a ro sukan sa'a i ma.

³² Vaa Su'si ma chi saxiko ya ñayii ka sa'a sukan ma, kovaa kétna'a xeen ini ya ji'in ñayii ka sa'a ja va'a ja ndaa ma,

³³ Vaa Su'si ma chi kua'a ya tnu'u, te kenda koo maa ja u'vi ma ve'e ke'e maa ñayii sa'a ja u'vi ma. Kovaa nuu ka iyo ñayii ka sa'a ja va'a ma chi tetniñu Su'si ma ja vii ja va'a ma.

³⁴ Ja ndaa ndija ja sukan sa'a ya ji'in ñayii ka ka'an yichi ka ka'an su'va‑ni i tnu'u ká'an ya ma, kovaa ñayii ka ka'an ja masu nawa kuu jin sa'a maa i ma nú masu ja onde ja maa ya ma sana kuu nawa jin sa'a i ma chi skuta'vi ya i ja vii ja va'a.

³⁵ Su'si ma chi jayiñu'u kua'a ya nuu ñayii ndichi ma, vaa sa'a i sukan kúni ya ma. Kovaa nuu ñayii ñatuu jaku'ni ini ma te sa'a so'o i nuu ya ma chi ja kan‑nuu ndakua'a ya i.