Proverbios 29 - New Testament Psalms and Proverbs in Mixtec Magdalena Peñasco

¹ Ñayii ndee ini ma, te nuna ndaka'an‑so'o o nuu i ma, te su'va sa'a ndee‑ka i ini i ma chi sanaa sanaa‑ni, te kenda in tnundo'o nuu i ma, te ni ma nduva'a‑ka i.

² Nú ñayii ka sa'a ja va'a ja ndaa ma te ndimaa ke koo va'a ja ka sa'a i ma chi ndaka ñayii ñuu ma chi ka iyo sii ini i, kovaa ora ka kundee maa ñayii ka sa'a ja u'vi ma chi ka tnana u'vi‑nka ñayii ñuu ma ja ka jini i sukan ma.

³ Suchi kándija te jan‑ta'vi i tnu'u ndichi ma chi sa'a i ja iyo sii ini yuva i ma, kovaa suchi kívi nduu kívi ni'ni ji'in ña'a ka kuneé ka ku‑uun ma chi skenaa i ndaka ja jâ neva'a i ma.

⁴ Rey tee ja'nde ndaa tniñu ñayii ñuu de ma chi sa'a de ja núkuiñi va'a ñuu ma, kovaa tee yika‑ni ja ndí ini de ja na kivi‑ka xu'un ma chi xnaa de ñuu yukan.

⁵ Ñayii ká'an vii ja kuu ñayii ketna'a ini ji'in i ma te masu ûni ndija i ja ká'an i ma chi ja ndúku i kúu ja ñayii nda'vi yukan te kendeka i te skenaa i maa i ma.

⁶ Maa ja u'vi sa'a ñayii ndee ini ma, te nukun‑tuu ña'a i, kovaa ñayii sa'a ja va'a ja ndaa ma chi sii ini‑ni iyo i te sii ini‑ni jita i.

⁷ Ñayii sa'a ja va'a ma chi ja ndí ini i kúu ja chindee i ñayii nda'vi ma, kovaa ñayii sa'a ja u'vi ma chi masu ndí ini kuiti i ja kuu ñayii nda'vi ma.

⁸ Ñayii ka jatna ini ja jin ka'an i tnu'u in‑ka ñayii ma chi ûni ka kundee maa i ka skanaa i ni‑ka'nu ñuu ma, kovaa ñayii ndichi ma chi ka kundee i ka ndasa'a kuee ini i ñayii ka ndakiti ini ma.

⁹ Nú in ñayii ndichi ma, te jakituu tna'a i ji'in in ñayii ndee ini ma, chi masu nawa kundee kuiti i, vaa ñayii ndee ini ma chi kuu ndakiti ini i xi jakundee i ñayii ndichi ma‑ni.

¹⁰ Ñayii játna ini ja ka'ni i in‑ka ñayii ma chi ndákiti ini i nuu ñayii masu na kuechi ndiso ma, kovaa ñayii ka sa'a ja va'a ja ndaa ma chi ka kuni i ja ndusii ini ñayii yukan.

¹¹ Ñayii kúkuee xeen ma ja ñatuu jáku'ni ini i ma chi ûni wa'a maa i tnu'u ja ndákiti xeen ini i te sa'a ndeva'a i ma, kovaa ñayii ndichi ma chi kúndee i tátnuni i nuu maa i, te ndúkuee ini i, te ñatuu sa'a i ja u'vi ma.

¹² Nú tee tátnuni ma, te kándija de tnu'u xnda'vi tna'a ma, chi sa'a de ja ndaka tee ka jinukuechi ji'in de ma ka sa'a tna ja u'vi sukan kúu maa de ma.

¹³ Su'si ma chi inuu‑ni ni sa'a ya ja kuu ñayii nda'vi ma ji'in ja kuu ñayii xndo'o xneni ñayii nda'vi ma, vaa ni sa'a ya nduchinuu nduu i ma, sukan‑va'a nduu i jin kuni te jin ndasa'a i kuenda nawa ka sa'a i ma.

¹⁴ Nú in rey ma, te sa'a ndaa sa'a ndija de ja jin kuu ñayii nda'vi ma, konukuiñi va'a de te kani kivi ko tatnuni de ñuu de ma.

¹⁵ Nú nawa ni sa'a sa'ya o ma, te ke'en o i ji'in yutnu xii ma ja ndakani ichi o i ma, chi kutu'va i naxe ko kuu i ñayii ndichi, kovaa nú ndimaa kuji'in o ji'in i chi ndimaa ja kan‑nuu ndakua'a i si'i i ma.

¹⁶ Nuna kukua'a ñayii ka sa'a ja u'vi ma chi kúnuu maa‑nka ja u'vi ma ñuu yukan, kovaa ñayii ka sa'a ja va'a ja ndaa ma, chi jin konde'ya nde'ya‑ni i sukan jin skenaa maa ñayii ka sa'a ja u'vi ma.

¹⁷ Ka'an‑so'o ni nuu sa'ya ni ma ja na ku'un kaji ku'un va'a ini i, te sukan, te sa'a i ja ndatatu anua ni te koo sii ini ni.

¹⁸ Nú ñatuu na ñayii ndakaxtnu'u tnu'u Su'si ma iyo in ñuu ma chi ma jin sunkani ñayii ñuu ma ja ma jin sa'a‑ka i ja u'vi ma, kovaa ñayii sa'a sukan tátnuni Su'si ma chi chindee ña'a ya te koo vava'a i.

¹⁹ Ñayii jinukuechi ma chi visi na ka'an na ka'an o nuu i kovaa masu ndasa'a i kuenda, vaa visi jaku'ni ini i ja jiña'a o ma, kovaa sa'a so'o i maa i te ñatuu kándija i ja ká'an o ma.

²⁰ ¿Jâ ni kuu jini ni in ñayii ja ni masu jani ini i te yachi‑ni ká'an i ma? Ja ká'an sa kúu ja iyo‑ka tnu'u kanu ini ja ndasa'a ñayii kúkuee ma kuenda sana ñayii ya'a.

²¹ Nú onde luluu suchi ko kunukuechi ma, te ndimaa ko kuji'in jito'o i ma ji'in i chi kenda kivi, te suu i ndunda'a ndaka ja neva'a de ma.

²² Tee ndimaa ndákiti ini ma chi ndimaa ja kanaa de kúni de, kovaa ja sukan kúu de ma chi ndimaa jiso kuechi de.

²³ Ñayii kúvixi ma te jani ini i ja maa i kúu‑ka ma chi masu na'a‑ni te jin sa'a ñayii ma ja ndatna'a i ja kan‑nuu, kovaa ñayii jani ini ja masu nawa kuu sa'a i ja maa in‑ni i ma chi su'va masu na'a‑ni te ndani'i i jayiñu'u nuu ñayii ma.

²⁴ Ñayii chísa'vi ñayii kui'na ma chi sa'a u'vi i maa i, vaa nuna kenda i nuu tee ja'nde tniñu ma chi visi na ka'an de ja kuechi tna i kúu, kovaa koyu'u i te masu ka'an kuiti i.

²⁵ Ñayii koyu'u in‑ka ñayii ma chi ja xnda'vi ña'a ja u'vi ma kúu, kovaa ñayii kúkanu ini Su'si ma chi koo va'a i te koo jayiñu'u i.

²⁶ Kua'a xeen ñayii ndúku ja ketna'a ini i ji'in gobiernu ma, sukan‑va'a chindee ña'a de te koo va'a i, jani ini i, kovaa yika‑ni ja Su'si o Iya Tátnuni ma kúu iya ka'nde ndaa tniñu o a.

²⁷ Ñayii ka sa'a ja va'a ja ndaa ma chi masu ka jatna ini kuiti i sukan ka sa'a ka kuu ñayii ka sa'a ja u'vi ma, te ñayii ka sa'a ja u'vi ma chi ka saxiko i ñayii ka sa'a ja va'a ja ndaa ma.