Proverbios 26 - New Testament Psalms and Proverbs in Mixtec Magdalena Peñasco

¹ Masu va'a‑ni ja kuun yu'va tiempu jite viyu ma, te ni masu va'a‑ni ja kuun savi tiempu iyo ja ndaxtutu o itu o ma, vaa ndi'i xtivi savi ma, te suni sukan kúu ji'in ñayii ndee xeen ini i ma, masu iyo i ja koo jayiñu'u i ma.

² Sukan kúu in lasaa kiti ni ski'in maa ti ma, xi sukan kúu in lasaa ja ndimaa ndava ndava‑ni ti ichi andivi ma te ñatuu nde jinkuiñi ti ma, sukan másu kenda ja kaki'i ñayii sa'a ja va'a ma ja u'vi ká'an in‑ka ñayii ma ja kuu i ma.

³ Ka yinda'a o yutnu xii ma ja kua'a o caballu ma, te ku'ni o yu'u burru ma sana jaku'ni ini ti ma, te suni sukan yutnu xii ma chi ja ke'en o yata ñayii ndee ini ma kúu.

⁴ Ñayii so'o kaa i ma chi visi ká'an neé ká'an uun i nuu o ma, kovaa máko ndakone'e o nuu i sukan ká'an maa i ma. Nú ña'a te ko kuu tna o sukan kúu i ma.

⁵ Ñayii so'o kaa i ma chi ora ká'an neé ká'an uun i nuu o ma, te ndákone'e o nuu i sukan ká'an maa i ma, sukan‑va'a na ndasa'a i kuenda ja ká'an i ma te máko kani ini i ja in ñayii ndichi kúu i ja sukan jani ini i ma.

⁶ Ja kukanu ini o ñayii ndee xeen ini ma te tetniñu o i ja ki'in i jin xsia'a i in xesoo chi kuenda tnu'u ja ni ja'nde o ja'a o ma te ndo'o neni o ja u'vi ma kúu.

⁷ Sukan kúu ja'a ñayii ma ja ñatuu ka kanda ma te masu nde kúu kaka i ma, sukan ka kuu tnu'u ndichi ká'an suchi ñatuu ndása'a kuenda ma, vaa masu jin kandija ñayii ma sukan ká'an i ma.

⁸ Ja chíñu'u o ñayii ndee ini te so'o xeen kaa i ma chi kuenda tnu'u ja ni ju'ni o in yuu nuu yo'o nchuu ma te skuita nuu o kúni o ma kúu.

⁹ Tnu'u ndichi ká'an ñayii ndee ini ma chi ni masu nde jáku'ni ini maa i, sukan kúu in tee ndajini ja ni masu jinitnuni maa de ja ni jiso nda'a de ma iñu ma, sukan‑ni kúu i.

¹⁰ Sukan kúu in tee yinda'a kuji de ma ja xtnakue'e de ndeva'a‑ni ñayii ní'i de ma, sukan kúu ñayii ni nduku tee ndee ini ma ja kunukuechi de nuu i ma.

¹¹ Sukan kúu la‑ina ma ja ndákaa ti ja ni kana ndo'o ti ma, sukan kúu ñayii ndee ini ja ndátnii tuku i ichi u'vi ma, te vitna ja jâ ni kundee i ja ni xndoo i ichi u'vi yukan ma nkuu.

¹² Iyo ñayii jani ini ja ndaka ja ká'an i ma te ndimaa ja va'a ka kuu te in ñayii ndichi kúu i jani ini maa i, kovaa ja ndaa kúu ja onde ñayii ndee ini ma chi iyo‑ka tnu'u kanu ini ja ndachu'un ini i te kee va'a i sana ñayii jani ini ja ñayii ndichi kúu i ma.

¹³ Sa'a ká'an ñayii kuxi ma: “Iyo in ndika'a ichi ma te kua'an vee ti kúu ti, va'a‑ka ma ki'in o jin satniñu o, nú ña'a te ka'ni ña'a ti”, kúu i ká'an i.

¹⁴ Sukan koyava yutnu ye'e ma sukan‑ni ndákokava ndákokuiñi kuxi ma nuu jito kixi i ma.

¹⁵ Vaa ñayii kuxi ma chi xtnii i xita i ma nuu ko'o i ma, te onde ja ndone'e i nda'a i ma ja chi'i i yu'u i ma ku‑kuxi i.

¹⁶ Ñayii kuxi ma chi jani ini i ja maa i jini‑ka sana uja‑ka ñayii inundichi ndija ma ja kuu jin ndaka'an‑so'o i nuu suchi kuxi ma.

¹⁷ Ñayii jika i kua'an i ma te ni kivi nduu i nuu ka iyo ñayii ka kanaa ma chi kuenda tnu'u ja kúu ñayii tnii so'o la‑ina ma kúu i.

¹⁸ Sukan kúu ñayii ni nduneé kuiti maa i te kani i flecha i ma vaa ûni ñu'u ini i ja ka'ni i ñayii ma,

¹⁹ sukan kúu ñayii xnda'vi ñayii ma sani te jiña'a tuku i ja ká'an ñanka‑ni i kúu ja ni jiña'a i ma.

²⁰ Nú ñatuu na tutnu‑ka ñu'u nuu ñu'u ma chi ndá'va maa i, te sukan kúu tna nú ñatuu ka nduku‑ka ñayii cuentu ma chi ñatuu na in kánaa‑ka.

²¹ Nú ñu'u tikayi ma chi ñu'u ñu'u‑ni ñu'u ma, te nuna ndatnaa o tutnu ma chi sani te ndandu'va vava'a ñu'u ma, te suni sukan kúu tna ñayii játna ini ja kanaa kanaa‑ni i ma chi nuu‑ni nuu‑ni sa'a i ja ka kanaa ñayii ma.

²² Ñayii ká'an tnu'u ma xi ndúku i cuentu ma chi kuenda tnu'u ja in ja asi xeen jaa te kenda i onde ini anua ñayii ma, sukan ka kuu tnu'u ká'an i ma,

²³ te sukan kúu in kisi ñu'ú ja vivii ni ndaskuchi i ji'in plata ma te vivii ni nduu ichi yika i ma, sukan kúu ñayii vivii ká'an i ma, kovaa ini anua i ma chi nanimaa ja u'vi ñu'u.

²⁴ Vaa ñayii kiti ini nuu in‑ka ñayii ma chi ora ká'an i ma chi sa'a i tnu'u ja masu ndákiti ini i, kovaa ini anua i ma chi jani ini i naxe sa'a u'vi i ñayii yukan.

²⁵ Visi na'a ja ja ká'an i ma ja va'a kúu, kovaa ja jani ini i ma chi nanimaa ja u'vi kúu ja ñu'u ini i ja sa'a i ma.

²⁶ Visi na nduku i naxe chu'u i tna'a ja u'vi ñu'u ini i ma, kovaa ndaka ndatuu, te ndaka ñayii ma jin kuni.

²⁷ Ñayii jate in yavi sukan‑va'a kêe in‑ka ñayii ma chi maa i ndêe nuu ni jate i ma, te ñayii skana in yuu ja xnduva i in‑ka ñayii kúni i ma, chi maa i ndaxnduva ña'a yuu ma.

²⁸ Ñayii tnu'u ma chi sa'a u'vi i ñayii xnda'vi i ma, te suni sukan kúu ñayii sa'a tnu'u ja ká'an vivii i ma chi sa'a u'vi i ndaka ñayii ka jiniso'o sukan ká'an i ma.