Proverbios 25 - New Testament Psalms and Proverbs in Mixtec Magdalena Peñasco

Kani vava'a ini o sukan ko kuu o ñuu ñayivi ya, nasa yukan, te ndatna'a o ja kan‑nuu

¹ Cha'a ka kuu tnu'u ndichi Salomón ma ja ni ka ndatee tee ka jinukuechi nuu Ezequías tee ni yo kuu rey ñuu Judá ma.

² Jayiñu'u Su'si ma kúu ja ni sa'a ya ja ka iyo yu'u jaku‑ka ja masu ka jaku'ni ini o ma, kovaa jayiñu'u tna rey ma kúu nú ndaka ndánduku de kua'an de sukan‑va'a jaku'ni ini de ma.

³ Ja jani ini rey ma ini anua de ma chi masu na in jáku'ni ini, vaa yii xeen iyo, sukan kúu andivi ma xi onde ichi chii ñu'ú ya, vaa masu na in ndáni'i te ndaka'an naxe iyo.

⁴ Xtandiyo o ndaka ja tne'e ja masu nde jiniñu'u yi'i ne'un plata ma, te nduvii nduu nanimaa‑nka i, te tee sa'a ndatniñu ka kuu plata ma chi ndasa'a de in ja ko kuu nanimaa plata ma.

⁵ Te suni sukan jín xtandiyo o ñayii ka sa'a ja u'vi ma nuu núkoo rey ma ja tátnuni de ma, sukan‑va'a tátnuni va'a maa de.

⁶ Máko ko kani ini ni ja in tee kanuu tna kúu ni nú ni kenda ni nuu iyo rey ma, te ni a ko ndiyo ini ni ja koo ni nuu ka iyo ñayii ka ndanuu ma.

⁷ Va'a‑ka ja maa ñayii kanuu ma na kana ña'a ja kaa ni te kunukoo ni nuu iyo i ma, sana ja jin ka'an i: “¿Nawa ndúku ni ja vee ni nuu iyo tee tátnuni ya?”, te kukan‑nuu ni vaa ka nde'ya ña'a de ma.

⁸ Nú nawa ni jini ni ja ka sa'a ñayii ma, te máko ki'in kunu ni jin kua'a ni kuenda nuu tee ka netniñu ma, nasa yukan, te kenda in‑ka ñayii te ka'an i ja suni ni jini tna i te ka'an i ja masu ja ndaa kúu ja ká'an ni ma, te ma ni'i ini‑ka ni naxe sa'a ni te tna'a ni ja kan‑nuu.

⁹ Nú na in nawa xtekuechi ña'a, te ndatnu'u ni ji'in maa in‑ni ñayii yukan naxe kendoo ni, kovaa máko ndaxtuu ni nawa ni kukanu ini ña'a in‑ka ñayii ma ja máko ka'an ni ma.

¹⁰ Vaa nuna ndaka'an ni ma te kuniso'o in‑ka ñayii ma, te ndaka'an i nuu ndaka‑ka ñayii ma sukan sa'a sukan kúu ni ma, chi ndatna'a ni ja kan‑nuu, te ni masu naa chukan.

¹¹ Ja ka'an o in tnu'u ndaa tnu'u kuatniñu ma maa ora jiniñu'u ñayii ma, chi sukan kúu in nde'ya manzana ñutuu nanimaa oro te yoxtnee i in nuu ko'o nanimaa plata kúu.

¹² Sukan kúu in xe'e nanimaa oro xi in siki sukun nanimaa oro, sukan kúu ja ndáka'an‑so'o ñayii ndichi ma nuu ñayii niniso'o ñukuun ma.

¹³ Ñayii ûni sa'a nawa ni kukanu ini ña'a in‑ka ñayii ma ja sa'a i ma chi ûni sa'a i ja ndátatu ñayii ni tetniñu ña'a ja ki'in i jin kaxtnu'u i nuu in‑ka ñayii ma, vaa ûni sa'a ndija i ma. Te sukan kúu ndute vijin vijin ni'i o ja ko'o o ora i'ni xeen ma, sukan kúu ñayii sa'a ja ni tatnuni jito'o i ma.

¹⁴ Te sukan kúu viko tachi ma ja iyo i te masu na savi kúun ma, sukan‑ni kúu ñayii ká'an ja ñayii va'a ini kúu i ma te onde skuiso i ja kua'a i nawa jiniñu'u ñayii nda'vi‑ka ma kovaa ni masu nde wa'a i ma.

¹⁵ Ja ka'an kuee o nuu tee netniñu ma chi sa'a i ja ma ndakiti ini de te kuu kunda'vi ini ña'a de nawa jikan o ma.

¹⁶ Nú ni ni'i ni nduxi ma, te máko kaa xen‑xeen ni, vaa nú ña'a, te kana ndo'o ni ja kuechi ja ni jaa xeen ni ma.

¹⁷ Nú ki'in ni jin koto ni ñayii ka ketna'a ini ji'in ni ma, kovaa masu nuu‑ni nuu‑ni ko ki'in ni, nasa yukan, te kuñaña ña'a i te ndakiti ini i nuu ni.

¹⁸ Kuenda kúu yuchi ma xi in martillu xi in flecha, sukan kúu ñayii ká'an tnu'u in nuu te'nde tniñu ma.

¹⁹ Ora kúxii kúnda'vi ini o ja ndó'o néni o ma te kukanu ini o in ñayii masu va'a ini i ma te ke'en su'va ña'a i ma, chi kuenda tnu'u ja kúu in ñayii jika cojo xi in ñayii yikuu jaa xita te u'vi nu'u i ma, sukan kúu ja kukanu ini o ñayii yukan.

²⁰ Ja kata o yaa nuu ñayii kúxii ini ma, chi kuenda tnu'u ja chíso o ndute iya in nuu ni tnakue'e i ma kúu, xi kuenda tnu'u ja xtavichi o i ora vijin xen‑xeen ma kúu.

²¹ Te nú ñayii ñatuu kétna'a ini ji'in ni ma, te kokon i, te kua'a ni ja kaa i, te nú yichi i, te kua'a ni ndute ko'o i,

²² te ja sa'a ni sukan ma chi sa'a ni ja ndakukan‑nuu xeen maa i, te maa Su'si ma ndachindee ña'a ndaka ja sa'a ni ma.

²³ Ora yi'i tachi ma ichi ninu ma te sa'a i ja kúun savi ma, te sukan kúu ji'in ñayii nde'ya kini ña'a ma, vaa sani te ká'an kini ká'an ndeva'a i nuu o ma.

²⁴ Va'a‑ka ja visi titi'i na koo o in ve'e yoxtnee onde xini ve'e ma sana ja koo o in ve'e ka'nu ji'in in ña'a ndimaa ndónda ña nuu o ma.

²⁵ Sukan sa'a ndute vijin vijin iyo ma nuna ni'i o de ja ko'o o de ora yichi xen‑xeen o ma, sukan kúu tnu'u jiniso'o o ja ka iyo vii ka iyo va'a tna'a o ñayii ka iyo in‑ka ñuu onde jika ma.

²⁶ Sukan kuu nuu tóo ndute tiñu'u xi nuu ñu'u ndute tne'e ma, sukan kúu ñayii masu na kuechi nkuu ma, te ja jiniso'o i sukan ká'an ñayii sa'a ja u'vi ma, te jákondee i sa'a tna i ja u'vi ma.

²⁷ Masu va'a ja kaa xeen o nduxi ma, te ni masu ja va'a kúu ja ndaka'an o ja in jayiñu'u kúu ja ni sa'a maa o ma.

²⁸ Sukan kúu in ñuu ja masu nawa ndesi va'a ña'a ma, sukan kúu in ñayii ñatuu kúu tatnuni nuu maa i sukan‑va'a ma sa'a i ni‑in ja u'vi ma.