Proverbios 22 - New Testament Psalms and Proverbs in Mixtec Magdalena Peñasco

¹ Ja va'a‑ka kuu ja jin ka'an vii jin ka'an va'a ñayii ma ja kuu o kuechi ja sa'a o ja va'a ja ndaa ma sana ja koneva'a kua'a o xu'un te ni‑in ñayii ma masu jin kunimani nuu o.

² Ñayii xiku ma ji'in ñayii kúnda'vi ma, inuu‑ni ka kuu i, vaa nduu i ma chi maa Su'si ma ni sa'a ña'a.

³ Ñayii ndichi ma chi nú jini i ja iyo yika i ma chi su'va jikayata i, kovaa ñayii ñatuu jáku'ni ini ma chi yituu yine'e i te onde ni'i maa i ja u'vi sa'a ja ndo'o neni i ma.

⁴ Ñayii kaa vii kaa kuee ini ma te ñatuu kúvixi i ja maa i kúu‑ka vaa yu'u i Su'si ma vaa jini i ja iya ndákan kuenda kúu ya ma, ja ndani'i ndatna'a i kúu ja ko ni'i ko tna'a i ja koneva'a i, te koo jayiñu'u i, te koteku i ni‑kani ni‑jika,

⁵ kovaa ichi kua'an ñayii sa'a ja u'vi ma chi nanimaa tnundo'o tnuneni kenda koo nuu i ma, vaa jani ini i ja va'a‑ni kúu ja sa'a i ma, kovaa ndimaa ja skenaa i maa i kúu.

⁶ Kaxtnu'u ni nuu sa'ya ni a ichi va'a káxtnu'u maa Su'si ma, sukan‑va'a kivi kuu nija'nu i ma te masu xndoo i ichi Su'si ma.

⁷ Ñayii ka kuxiku ma chi ka tatnuni maa i nuu ñayii nda'vi ma, te ñayii ka wanuu xu'un ma chi suni ka tatnuni maa i nde a ka kuni i ja jin sa'a ñayii ni ka jikan‑nuu xu'un nuu i ma.

⁸ Ñayii sa'a ja u'vi in‑ka ñayii ma chi tna'a ja ni sa'a i ma ndani'i ndatna'a maa i, te ndando'o ndaneni maa i, te sukan, te xnaa ya ñayii ka sa'a ja u'vi ma.

⁹ Ñayii va'a ini ma te kúnda'vi ini i ñayii nda'vi ma te wa'a i ja kaa ñayii nda'vi ma chi skuta'vi ya i ja va'a te ko ni'i ko tna'a i.

¹⁰ Máko kuan‑ta'vi ni ñayii ndee ini te so'o kaa i ma nuu iyo ni a, sukan‑va'a na naa maa ja u'vi ma te masu na in kanaa‑ka, te ni a ko skiti tna'a‑ka ini i.

¹¹ Ñayii játna ini ja koo vii koo luu ini anua i ma, chi ja sukan vivii ká'an i ma, te ketna'a ini tee kúu rey ma ji'in i.

¹² Iya Tátnuni ma chi jito ñukuun ya ñayii ndichi ma, kovaa sákanuu sákani'ni ya ja jani ini ñayii tnu'u ma.

¹³ Ñayii kuxi ma chi ja ma satniñu i ma chi ndúku yu'u i naxe kundee i ja ma satniñu i ma‑ni, te ká'an i: “Vaa ichi ma iyo in ndika'a, te kaa ña'a ti nuna ki'in o jin satniñu o.”

¹⁴ Ja ká'an ña'a kívi nduu ji'in tee ja masu yii ña kúu de ma chi sukan kúu in soko kunu kunu kúu, te tee kúndee ña xnda'vi ña ma chi ndákiti ini Su'si ma nuu de naku kándija de ja ká'an ña ma.

¹⁵ Suchi jaa ma ûni ndikin tna'a xeen i ji'in ja sa'a ndee ini i te sa'a so'o xeen i maa i, kovaa nuna ndaka'an‑so'o o nuu i te skonduu o yutnu xii yata ka'a i chi ndatnii i kuenda te ko kuu i in ñayii va'a.

¹⁶ Ñayii ndúku ja kuxiku i ma te sa'a ndeva'a i ñayii nda'vi ma ji'in ñayii skuta'vi nawa neva'a i ma nuu ñayii xiku ma, chi ja ndetu ña'a kúu ja ndunda'vi ndukee maa i.

¹⁷ Koniniso'o ñukuun ni ja ka ka'an ñayii inundichi ma te ndasa'a ni kuenda ndaka ja káxtnu'u sa ya.

¹⁸ Chi ja va'a xeen ko kuu nuna tava'a ni ini anua ni a te ndaka'án ni te kuu ndaka'an ni nuu ndaka‑ka ñayii ma.

¹⁹ Vitna te ndákaxtnu'u sa nuu ni a, sukan‑va'a kukanu ini‑ka ni Su'si o Iya Tátnuni ma.

²⁰ Saña chi oko uxi jichi tnu'u ndichi ya ni kaxtnu'u sa, te ndimaa tnu'u va'a tnu'u kuatniñu o ka kuu,

²¹ sukan‑va'a kutu'va ni tnu'u ndaa tnu'u ndichi ni kaxtnu'u sa a, te kuu kaxtnu'u ndaa ni nuu ñayii jin kakan‑tnu'u ña'a ma.

²² Má sakui'na ni ñayii nda'vi ma te ni máko ka'an ndeva'a ni nuu ñayii ndó'o néni ma,

²³ vaa Iya Tátnuni ma chi kúnda'vi ini ya ñayii nda'vi ma te iyo ya ji'in i te chindee ya i te kaku i, te ñayii sakui'na nuu ñayii nda'vi ma chi maa Su'si ma xnaa ndaka ja neva'a i ma.

²⁴ Máko ketna'a ini ni ji'in ñayii yachi xeen ndákiti ini i ma,

²⁵ nasa yukan te kutu'va ni sukan sa'a sukan kúu i ma, te sa'a i ja skenaa ni maa ni ja sukan sa'a ni ma.

²⁶ Máko ko kuu ni yunuu ñayii jikan‑nuu ma te tavi i nuu in‑ka ñayii ma,

²⁷ vaa nú ma ni'i ni ja ndakua'a ni ma chi onde jito kixi ni ma jin ndaxtandee i.

²⁸ Máko ndaxsama ni nuu ka nukuiñi yuu xe'ñu ni ka jani tna'a ni jana'a‑ka ma.

²⁹ Ñayii satniñu va'a ma chi kuu i kunukuechi i nuu rey ma, te masu nuu ndeva'a‑ni ñayii kunukuechi i.