Biblia Todo Logo
Bìoball air-loidhne

- Sanasan -

Proverbios 21 - New Testament Psalms and Proverbs in Mixtec Magdalena Peñasco

1 Sukan kundee jichi nuu jika ndute ma jasi i ndute ma ja ma ki'in ya'a ki'in yukan de ma onde kenda de nuu ki'in de ma, sukan kúu Su'si Iya Tátnuni ma ji'in rey ma, vaa ñatuu wa'a ya tnu'u ja kani ini de ja ko sa'a de ja u'vi ma.

2 Ndaka ja jani ini ñayii ma te sa'a i ma, kua'a ja va'a kúu jani ini maa i, kovaa maa Su'si ma kúu iya ndáka'an nú ja va'a kúu xi ja u'vi kúu ja ñu'u ini i ja sa'a i ma.

3 Ja sa'a o ja va'a ma te ku'un kaji ku'un va'a ini o ja kandija o ya ma kúu ja játna ini Su'si ma, sana ja ndakua'a o in kiti ka'mi o nuu ya.

4 Ñayii nde'ya kini in‑ka ñayii ma xi kuvixi maa i ja jani ini i ja maa i kúu‑ka ma xi jani ini i ja sa'a i ja u'vi ma, chi ja sukan sa'a i ma chi jâ ni jiso kuechi i nuu Su'si ma.

5 Ñayii jakin tna'a vivii nawa jani ini i ja sa'a i ma chi kee va'a ja jani ini i ja sa'a i ma, kovaa ñayii ñatuu ndása'a kuenda i ma chi jani yachi‑ni ini i te sa'a i nde a kúni i ma, kovaa ja sukan kúu i ma chi ndunda'vi ndukee i.

6 Ñayii ndimaa xnda'vi in‑ka ñayii ma te ve kuxiku i ma chi masu na'a‑ni te ndi'i kuiti ja neva'a i ma naa, sani te skenaa i maa i.

7 Ja u'vi ka sa'a maa ñayii ka játna ini jin sa'a i ja u'vi ma nukun‑tuu ña'a, te jin skenaa maa i maa i, kuechi ja ñatuu ni ka kuu ini maa i ja jin sa'a i ja va'a ja ndaa ma.

8 Ja sa'a ja kúu ñayii sa'a ja u'vi ma chi ndimaa ñu'u ini i ja xnda'vi i in‑ka ñayii ma kúni i, vaa ni a in ja va'a masu sa'a i, kovaa ñayii iyo va'a nuu Su'si ma chi ndimaa ja va'a ñu'u ini i ja sa'a i.

9 Ja va'a‑ka kúu visi in ve'e nda'vi ve'e kee kúu te koo maa in‑ni o, sana ja koo o in ve'e ka'nu ve'e va'a ji'in in ña'a ndimaa kúni ña ja kanaa ña.

10 Ñayii sa'a ja u'vi ma chi yika ja ñu'u ini i kúu ja sa'a i ja u'vi in‑ka ñayii ma, te ni masu nde kúnda'vi ini i ñayii yukan.

11 Suchi ñatuu ka jandetu nuu yuva i ma te káni de i ma chi jin kuni jaku‑ka i ma te jin koyu'u i, te ma jin sa'a‑ka i ja u'vi ma, vaa suchi ndichi ma chi ndaka ja na ndaka'an‑so'o o nuu i ma, sani te jaku'ni ini i ja sa'a i ja va'a ma.

12 Su'si iya sa'a ndaa sa'a ndija ma chi nde'ya nde'ya‑ni ya ve'e ñayii ka sa'a ja u'vi ma, te kua'a ya tnu'u te jin ndunda'vi jin ndukee maa i ja kuechi ja sukan ka sa'a maa i ja u'vi ma.

13 Ñayii ñatuu nde ndí ini ja chindee i ñayii nda'vi ma ora jikan‑ta'vi ñayii yukan ja na chindee ña'a i ma chi kenda ja jiniñu'u tna i na in chindee ña'a, te masu na in kenda ja chindee ña'a i.

14 In ja masu ndetu ñayii ma, te sanaa sanaa‑ni jin skuta'vi ña'a i ma chi visi ndákiti xeen ini maa i ora yukan, kovaa ndusii ini xeen i ja sukan ni kuta'vi i in ja masu ndetu i ma.

15 Ora ka ja'nde ndaa i tniñu ñayii ma chi ñayii sa'a ja va'a ja ndaa ma chi kúsii ini xeen i, kovaa ñayii sa'a ja u'vi ma chi yu'u i, vaa sani te skenaa i maa i.

16 Ñayii ñatuu ndása'a kuenda naxe ko kuu i in ñayii va'a ma te kúneé kú‑uun‑ni maa i ma chi ichi nuu kûu i te skenaa i maa i kua'an i.

17 Ñayii ñatuu nde ni'i tna'a i ma te játna ini i ja va'a ja jaxiko asi ma ja chi'i i maa i ma te játna ini i ja ko'o i ndixi ma te ndeva'a ndekuu‑ni kúu i ma chi ni ma kuxiku maa i ja ko ni'i ko tna'a i.

18 Ñayii sa'a ja u'vi ma te xnda'vi i tna'a i ma chi ndo'o neni maa i sukan kúni i ja ndo'o neni ñayii sa'a ja va'a ja ndaa ma.

19 Ja va'a‑ka kúu ja koo nda'vi koo kee o in nuu ñatuu kuiti nawa iyo ma sana ja koo o ji'in in ña'a kúneé kú‑uun ma te yachi xeen ndákiti ini ña ma.

20 Tee ñu'u kaji ñu'u va'a ini ma chi ve'e de ma chi ñatuu nawa ja'ni ña'a i te vivii ka kuu de, kovaa tee ñatuu ñu'u kaji ini ma chi ndi'i ja neva'a de ma ndáxiko de te xnaa de kua'an de.

21 Kovaa ñayii ndúku ja koo va'a koo ndaa i nuu Su'si ma te iyo tnu'u nda'vi ini i ma, chi skuta'vi ña'a Su'si ma ja vii ja va'a ma, te koo jayiñu'u i, te koteku kani i.

22 Ñayii ndichi ma chi kúndee i nuu ñayii ka jani ini ja ka iyo tnu'u ndee tnu'u ndatnu i ja ka jito va'a i ñuu i ma te ka kukanu ini i ja masu na in kundee nuu i ma.

23 Ñayii jito va'a i yu'u i ma yaa i ma ja ñatuu nde ká'an i tnu'u masu nde kuatniñu ma chi iyo sii ini i, vaa masu na nde kívi nduu kívi ni'ni i nuu tnundo'o ma.

24 Ñayii kúvixi maa i ja maa i kúu‑ka ma chi kúneé kú‑uun‑ni maa i, vaa ñayii ndee ini kúu i.

25 Ñayii kuxi ma, ndíyo xeen ini i nawa ni'i i ja kaa i, kovaa ñatuu kúu ini i ja satniñu i visi na kûu maa i ja kuxi i ma.

26 Ka iyo ñayii ja nii nduu ma ka ndiyo ini i ja jin ni'i i ja jin kuu maa i, kovaa ñayii sa'a ja va'a ja ndaa ma chi sii ini‑ni wa'a i nawa ka jiniñu'u ñayii ka kunda'vi ka kukee ma.

27 Ja ka ndakua'a ñayii ka sa'a ja u'vi ma nuu Su'si ma chi saxiko ya, vaa masu ka jani va'a ini i ja ka sa'a i ma.

28 Ñayii ká'an ja ni jini i nawa ni kuu ma te masu ndija i ja ni jini i ma chi masu na'a‑ni te ni masu ni'i ini‑ka i nawa ka'an i, kovaa ñayii ni jini ndija ma chi núkuiñi lili i ja ká'an i ma.

29 Ñayii sa'a so'o nuu Su'si ma chi ndákiti ini i nawa ka ndaka'an‑so'o i nuu i ma, kovaa ñayii sa'a ja va'a ja ndaa ma chi ndása'a i kuenda te ndákaka va'a i nuu Su'si ma.

30 Tnu'u ndichi jani ini ñayii ma ja neva'a i ma xi ja jani ini i ja maa i kúu‑ka ma chi ni masu kundee i nuu Su'si ma,

31 vaa onde caballu ma chi visi iyo tu'va tna ti ja koso ña'a tee ki'in ja kanaa de ma, kovaa maa Su'si ma kúu iya chindee ña'a sana kuu kundee de ma. Visi kiti ndee kúu ti, kovaa masu nawa kuu sa'a maa ti.

© 2013, Wycliffe Bible Translators, Inc. All rights reserved.

Wycliffe Bible Translators, Inc.
Lean sinn:



Sanasan