Proverbios 20 - New Testament Psalms and Proverbs in Mixtec Magdalena Peñasco

¹ Ñayii ji'i ndixi ma chi ndúu ndee ini i te sa'a ndeva'a i kua'an i, te kánaa i ji'in ndeva'a‑ni ñayii ma. Ñayii wa'a tnu'u ja sukan xnda'vi ña'a ndixi ma chi masu jini‑ka maa i nawa sa'a i.

² Nuna ndakiti ini rey ma chi masu kaku maa ñayii ni sa'a ja ni ndakiti ini de ma, vaa sukan ndúxeen ndika'a ma, sukan iyo de ja kuu sa'a de.

³ In jayiñu'u kúu nuu ñayii ñatuu játna ini ja ndi tetna'a ndi tetna'a i jin ko kuu i ma, kovaa ñayii ñatuu jáku'ni ini ma chi ni masu kanda i chi ndeva'a‑ni ora chi skeja'a maa i ja kanaa i ji'in in‑ka ñayii ma.

⁴ Ñayii kuxi ma chi ñatuu ndáta'vi ndásaka i itu i ma tiempu vijin ma, te kivi kenda ja skee ñayii ma itu i ma, te visi na ki'in maa i jin koto i itu i ma, kovaa masu nawa ndani'i i.

⁵ Sukan kúu ndute ñu'u in soko kunu ma, sukan kuu ja jani ini ñayii ma ini anua i ma, te ñayii ndichi ma chi jakun‑tnuni‑ni ini i nawa kúni ñayii ma ka'an i ma.

⁶ Kua'a xeen ñayii ka kuvixi i ja inuva'a ini i, kovaa masu kuu kukanu ini o ni a in ñayii yukan.

⁷ Ñayii sa'a ja va'a ja ndaa ma chi ni‑in ja u'vi ñatuu sa'a i, te jika ndaa i ichi Su'si a, te naka vii naka va'a ka kuu sa'ya ñayii ya'a, vaa jin ndandikin i sukan ni ka yo sa'a yuva i ma.

⁸ Ora jínkoo rey ma nuu ndákan de kuenda nuu ñayii ma chi yika‑ni ja nde'ya de ma, te ka jikayata maa ñayii ka sa'a ja u'vi ma.

⁹ Masu na in kuu ka'an: “Iyo vii iyo ndoo ini anua sa, ñatuu kuiti na kuechi sa.”

¹⁰ Ñayii ñukuun sa'a i ma te masu chíkua'a ndaa i nawa xíko i ma chi saxiko Su'si ma ja sukan sa'a i ma.

¹¹ Onde in suchi luluu ma chi ja jini o sukan sa'a i ma, te ndasa'a o kuenda na nde suchi ko kuu i, nú suchi sa'a ja va'a xi suchi sa'a ja u'vi ko kuu i.

¹² Su'si ma ni sa'a so'o o a sukan‑va'a koniniso'o o, te ni sa'a ya nduchinuu o a sukan‑va'a konde'ya va'a o. ¡Vivii kúu ja ni sa'a ya a!

¹³ Máko tnaa xeen ro ñuma'na nuu ro, nú ña'a, te ko kunda'vi ko kukee ro, su'va ko ndoto ne'e ro te koo kua'a ja kaa ro.

¹⁴ Ñayii jaan ma chi ndáa xeen i tnu'u ja ya'vi xeen ja yikuu i jaan i ma, kovaa nú jâ ni jaan i ma, te kuvixi maa i ja ja va'a kúu te masu ya'vi ni wa'a i.

¹⁵ Ja va'a‑ka kúu ñayii káji tnu'u va'a ká'an i ma sana ja ñayii neva'a kua'a xeen oro xi yuu vivii ka ndaa te ka ndeya'vi xeen ma.

¹⁶ Ñayii kúu nuu ñayii jikan yika ma chi skenaa i onde su'nu i ma, nú ma ndachunaa ñayii yukan ma.

¹⁷ Ñayii xnda'vi in‑ka ñayii ma te ni'i i ja kaa ja ko'o i ma chi visi jani ini i ja asi xeen jaa ma, kovaa kenda kivi ja ndakokon ndayichi i.

¹⁸ Kuan‑ta'vi o tnu'u va'a ká'an‑so'o in‑ka ñayii ma te kani va'a ini o nawa sa'a o ma, vaa nawa kúu ja tee ki'in jin kanaa de ji'in in‑ka ñuu ma chi xinañu'u‑ka jakin tna'a va'a de naxe ki'in de ma sukan‑va'a kundee de ma.

¹⁹ Ñayii tnu'u ma chi masu kuu kukanu ini o i chi ndi'i kuiti ndáxtuu i kua'an i ma, chukan kúu ja masu kuu ketna'a ini o ji'in ñayii masu kutu yu'u i ma.

²⁰ Ñayii ká'an u'vi ja kuu yuva i si'i i ma chi masu na tnu'u kanu ini ja koo va'a i, vaa koo maa i nuu nee ma‑ni.

²¹ Ñayii masu na tnundo'o te ní'i kua'a i ja koneva'a i ma chi ndaka maa ja neva'a i ma sa'a ja kenda kivi te ndanda'yu i.

²² Máko ku'un ini ni ja maa ni ndachunaa nawa ni sa'a ndeva'a ña'a in‑ka ñayii ma, su'va kukanu ini ni Iya Tátnuni ma, te maa ya ndachunaa te koo va'a maa ni.

²³ Su'si Iya Tátnuni ma chi saxiko ya ñayii ñatuu chíkua'a ndaa nawa xíko i ma, vaa masu játna ini ya ja xnda'vi tna'a o ma te ma chikua'a ndaa o ma.

²⁴ Maa Su'si ma kúu iya jâ jini naxe ko kuu in in ñayii ma, te ni‑in ñayii ma masu kuu jaku'ni ini i naxe iyo ja ko kuu ji'in ndi‑in ndi‑in o ma, vaa maa in‑ni Su'si ma kúu iya jâ jini ndi'i.

²⁵ Másu va'a‑ni ja ka'an uun‑ni o te skuiso o nuu Su'si ma nawa sa'a o ma te kuee‑ka ma te ndakani ini o ja masu kundee o sa'a o ma.

²⁶ Rey tee ndichi ma chi sa'a siin de ñayii ka sa'a ja u'vi ma, te xnaa de i sukan sa'a yoso mulinu ma triu ma ja vii jaxi i ma.

²⁷ Onde ini anua ñayii ma xtnuu Su'si ma ñu'u maa ya ma, vaa maa ya chi jini ya nawa jani ini ñayii ma, te masu nawa kuu kuyu'u nuu maa ya ma.

²⁸ Tnu'u nda'vi ini ma ji'in tnu'u ndaa tnu'u ndija ma kúu ja chíndee chítuu rey ma ja núkoo va'a de tátnuni de ma.

²⁹ Jayiñu'u suchi jaa ma kúu tnu'u ndee tnu'u ndatnu i ma, jani ini i, te tee nija'nu ma chi jayiñu'u de kúu vixi xini de ma, vaa ka jandetu‑ka ñayii ma nuu de ma.

³⁰ Ja ka xndo'o ka xneni i ñayii sa'a ja u'vi ma ji'in yutnu xii ma chi kuenda tnu'u ja jatatna kúu, vaa sukan, te ndasa'a i kuenda te xndoo i ja u'vi sa'a i ma.