Proverbios 19 - New Testament Psalms and Proverbs in Mixtec Magdalena Peñasco

¹ Va'a‑ka visi kúnda'vi kúkee o ma te ndimaa sa'a o ja va'a ja ndaa ma, sana ja kava ndee xeen ini o ma te ko kuu o in ñayii tnu'u ja ndimaa xnda'vi o ñayii ma.

² Masu nde jiniñu'u nú ma kani va'a ini ñayii ma te keja'a i sa'a i nawa ñu'u ini i ja sa'a i ma, vaa nú ñama ñama‑ni sa'a o sukan ñu'u ini o ma chi masu kee va'a ja sa'a o ma.

³ Ñayii ndee xeen ini ma chi ja sukan kúu maa i ma, te ñatuu kée va'a ndaka ja sa'a ja kúu i ma, te ndákiti ini i te ndáxtekuechi i Su'si ma ja kuechi ya kúu ja sukan ndó'o i ma.

⁴ Ñayii ni'i tna'a ma chi ûni kua'a xeen ñayii ka ketna'a ini ji'in i, kovaa ñayii kúnda'vi kúkee ma chi onde ñayii ka ketna'a ini ji'in i ma ka xndoo ña'a.

⁵ Ñayii ka kukanu ini ñayii ja ndakani ndaa i nawa ni jini i ma te ma ndaka'an ndaa i ma chi ma kaku maa i chi ndo'o neni i ja sukan sa'a i ma. Suni ñayii ká'an tnu'u ma chi masu yanduu ja onde ndo'o neni maa i.

⁶ Ñayii kúxiku ma te wa'a i nawa ka jiniñu'u ñayii ma chi ûni ndaka ñayii ma ka kuni ja jin ketna'a ini i ji'in ñayii xiku ma.

⁷ Nú ñayii kúnda'vi kúkee ma, te onde tna'a i ma ka saxiko ña'a, kuiti ka'vi‑ka jin sa'a ña'a ñayii ka ketna'a ini ji'in i ma, vaa visi na kakan‑ta'vi maa i nuu ñayii yukan ja jin chindee ña'a i, kovaa su'va jin kujika‑ka i jin koo i.

⁸ Ñayii ni jaku'ni ini tnu'u ndichi ma te sa'a i sukan ká'an ma chi ja kútoo i maa i kúu ja ndí ini i ja koo va'a i ma.

⁹ Ñayii ñatuu ndakani ndaa nawa ni jini i ma chi ma kaku maa i chi onde ndo'o neni i ja sukan sa'a i ma, te suni ñayii játna ini ja ka'an tnu'u i ma chi masu yanduu ja onde ndo'o neni tna maa i ja sukan sa'a i ma.

¹⁰ Masu va'a‑ni ja ñayii so'o xeen kaa ma, te ko ni'i ko tna'a i kua'a ja vii ja va'a ma, te ni masu va'a‑ni ja ko tatnuni i nuu sa'ya tee ka ndanuu ma.

¹¹ Ñayii ndichi te ndasa'a i kuenda ma chi kutu'va i ja kava kuee ini i, te jayiñu'u i kúu ja ni sakanu ini i ja u'vi ni sa'a ña'a in‑ka ñayii ma.

¹² Sukan kúu yu'u ndika'a ma sukan kúu rey ma nuna ndakiti ini de ma, kovaa nuna kunda'vi ini de ñayii ma chi sukan kúu ora núu yuyu xtnee ma, sukan na'a ja nda'vi ini de ma.

¹³ Tee neva'a sayii de ma te so'o xeen kaa i ma chi sa'a i ja kendoo nda'vi kendoo kee ve'e de ma, te tee neva'a ñasi'i de ja ndimaa kanaa ña'a ji'in yii ña ma chi sukan kúu nuu jí'in ve'e ma te xtivi i ndatniñu ma, sukan kúu ña.

¹⁴ Xu'un ma ji'in ve'e ma chi ja nduta'vi tee ma nuu yuva de, nuu si'i de ma kúu, kovaa ja ñasi'i de ma te in ña'a ndichi kúu ña ma chi maa Su'si ma ni skuta'vi ña'a.

¹⁵ Ñayii kuxi ma chi játna ini i ja kusu xeen i, te ja sukan kúu i ma chi ko kokon ko yichi i.

¹⁶ Ñayii kandija te sa'a i sukan ni tatnuni Su'si ma chi kaku i nuu ja u'vi ma te koteku i, kovaa ñayii saxiko tnu'u ni tatnuni Su'si ma chi kûu i te skenaa i maa i.

¹⁷ Ja chíndee o ñayii nda'vi ma chi kuenda tnu'u ja in ja wanuu o nuu Su'si ma kúu, te maa ya ja kúu ya Iya Tátnuni ma ndataa nuu o ja va'a ni sa'a o ma.

¹⁸ Ndaka'an‑so'o ni'i ni nuu sa'ya ni ma vitna ja iyo‑ka i ja koniniso'o i tnu'u kuña'a ni ma, te máko ko kasiyu'u ni ja u'vi sa'a i ma, te ko kuu kuechi tna ni ja kûu i ma te skenaa i maa i ma.

¹⁹ Ñayii yachi‑ni ndákiti ini i ma chi ndo'o neni maa i, te nuna chindee o i ja na ya'a i nuu tnundo'o yukan ma, masu va'a‑ni ja sa'a o sukan ma chi ja chindee o i ja na ndasa'a‑ka tuku i in‑ka jichi ja u'vi ma kúu.

²⁰ Ñayii kuan‑ta'vi ja ka ndaka'an‑so'o i nuu i ma te ma ndakone'e xiko i ja sukan ni ka jiña'a ñayii ma chi kutu'va i ja ko kuu i in ñayii ndichi.

²¹ Kua'a xeen ja jani ka'vi ini ñayii ma ja sa'a i, kovaa yika‑ni ja ja kúu ini maa Su'si ma kúu ja ko kuu.

²² Ja játna ini ñayii ma kúu ja ndaka o, te kava va'a kava nda'vi ini o, te va'a‑ka ja ko kunda'vi ko kukee o sana ja kava tnu'u o ma.

²³ Ja koyu'u o Su'si ma te ma ko sa'a o ja u'vi ma chi chindee ña'a i ja koteku o ni‑kani ni‑jika, te maa ya sa'a ja kusu sii ini o te ndatatu o, te ni‑in tnundo'o ma kenda nuu iyo o ma.

²⁴ Ñayii kuxi ma chi chúnee‑nka tna i nda'a i nuu ko'o ma, kovaa ni masu ndí ini i nawa ni ni'i i ma.

²⁵ Suchi ñatuu ka jandetu nuu yuva i ma te kani de i ma chi jin kuni jaku‑ka i ma, te jin koyu'u i, te ma jin sa'a‑ka i ja u'vi ma, vaa suchi ndichi ma chi ndaka ja na ndaka'an‑so'o o nuu i ma, sani te jaku'ni ini i ja sa'a i ja va'a ma.

²⁶ Suchi sakui'na yuva i te chúnee i si'i i ma ichi ma chi ja kan‑nuu xeen kúu ja sukan sa'a i ma, vaa masu nde jiniñu'u ja sa'a ja kúu i ma.

²⁷ Sa'ya maa ri, nuna saxiko ro tnu'u va'a ka ka'an‑so'o i nuu ro a chi ma ni'i ini ro naxe ko kuu ro kivi ki'in o a.

²⁸ Ñayii masu ndákani ndaa sukan ni jini i ja ni kuu ma, ja sukan sa'a i ma chi ja jakundendee‑ni i tee ka ja'nde tniñu ma kúu, te ja sukan sa'a i ma chi chisa'vi i ñayii ka sa'a ja u'vi ma, te ka sa'a‑ka maa ñayii ma ja u'vi ma.

²⁹ Jâ iyo tu'va ja jin ndo'o jin neni ñayii ka jatna ini ja ma jin ka'an ndaa i ma, te suni jâ iyo tu'va yutnu xii ja jin ndo'o jin neni ñayii inundee ini ma.