Proverbios 18 - New Testament Psalms and Proverbs in Mixtec Magdalena Peñasco

¹ Ñayii ndiyo ini ma chi ñu'u ini i ja koo va'a maa i ma‑ni, te ni ñatuu jan‑ta'vi i ja ka ka'an‑so'o ñayii ma nuu i ma.

² Ñayii so'o xeen kaa ma chi ñatuu nde ndí ini i naxe jakun‑tnuni‑ka ini i te ko kuu i in ñayii ndichi ma, yika‑ni ja nde a jini i ma te kúvixi i.

³ Ñayii sa'a ja u'vi ma chi ka saxiko ña'a ñayii ma, te ndátna'a maa i ja kan‑nuu ja sukan vixi kaa i ma.

⁴ Tnu'u ká'an ñayii ndichi ma, sukan kúu nuu ñu'u kua'a ndute ma xi sukan kúu nuu tóo kua'a de ma, sukan ka kuu tnu'u ká'an i ma.

⁵ Masu va'a‑ni ja tee ja'nde tniñu ñayii ma, te kuji'in de ji'in ñayii iyo kuechi ma, te xtekuechi de ñayii ñatuu na kuechi ma.

⁶ Ñayii so'o xeen kaa ma chi tnu'u ká'an i ma‑ni, te sa'a i ja skiti tna'a ini i ji'in ñayii ma, te maa tnu'u ká'an i ma sa'a ja jin sa'a ndeva'a ña'a ñayii ma.

⁷ Ja ká'an ñayii so'o xeen kaa ma chi nukun‑tuu maa i ndaka ja u'vi ká'an i ma, te ndando'o ndaneni maa i.

⁸ Ñayii tnu'u ma, ñayii ndúku cuentu ma chi ûni vivii ká'an i ja ndákani i nuu in‑ka ñayii ma, te sa'a i ja kénda onde ini anua ñayii ma ja jiña'a i ma.

⁹ Ñayii kuxi te ñatuu satniñu va'a i ma chi inuu kuiti kúu i ji'in ñayii ndákana in ja iyo va'a ma.

¹⁰ Su'si ma chi sukan kúu in ve'e núkuiñi vava'a kúu ya nuu ñayii sa'a ja va'a ja ndaa ma, vaa nuu maa ya ma jinu i kua'an i, ja na kaku i nuu ja u'vi ma te koo va'a i nuu ya.

¹¹ Ñayii xiku ma chi kúkanu ini xeen i ja neva'a i ma, te jani ini i ja sukan kúu in ñuu nuu ndesi vava'a ni‑ka'nu yu'u ñuu ma ja ñatuu na in kuu kivi ma, sukan jani ini i ja kúu ja kúxiku i ma.

¹² Ñayii kúvixi xeen ma chi ja ndetu ña'a kúu ja skenaa ndi'i i ja neva'a i ma, kovaa ñayii jani ini ja masu ñayii kanuu kúu i ma chi ja ndani'i i ma kúu jayiñu'u i.

¹³ In ja kan‑yu'u ja kan‑nuu kúu ja ndákone'e yachi ñayii ma te ñatuu ndetu i ja koniniso'o i te jinu ka'an in‑ka ñayii ma.

¹⁴ Ñayii ndimaa iyo sii ini i ma te ñatuu nde ndaa ndivi ini i visi ku'u i ma chi ñatuu xtaya i, kovaa ñayii ja'nde ini ja ma kuu‑ka i ma chi masu na‑in kuu chindee ña'a ja ndani'i i tnu'u kanu ini.

¹⁵ Ñayii jáku'ni ini ma chi ndí ini i ja kutu'va‑ka i, te ñukuun‑ka niniso'o i tnu'u ndichi ka ka'an ñayii ndichi ma.

¹⁶ Ñayii yinda'a yija'a ja kua'a i ñayii jito ye'e ma chi chindee ña'a ñayii yukan ja kenda i onde nuu ka iyo ñayii ka ndanuu ndánduku i ma.

¹⁷ Ñayii kénda xinañu'u nuu tee ja'nde tniñu ma te jiña'a i ja masu na kuechi i ma chi kuenda tnu'u ja ndija i ja ká'an i ma, kovaa nuna kenda in‑ka ñayii ma te ndaka'an i ja masu ndija ñayii ni kenda xinañu'u ma, sani te ndatuu ndaa maa i ja masu ndija i.

¹⁸ Nú uu tee ka ndanuu te ka skiti tna'a ini de ja ndunduu de ka jani ini ja va'a‑ni ka ñu'u ini de ja jin sa'a de ma, kovaa nuna jin chu'un de suerte kóto nde de kundee ma, sani te jin kendoo va'a ini nduu de.

¹⁹ Suchi ndákiti xeen ini ja ni skiti ña'a ini ñani i ma chi masu ndakune i anua i ma ja jin ndumani i, su'va sa'a ndee‑ka i ini anua i ma sukan ndesi va'a in ñuu ma, te ja sukan ka kuu i ma chi su'va jin kujika nuu tna'a‑ka i.

²⁰ Ndeva'a‑ni na tnu'u ká'an maa ñayii ma te sukan ndani'i i, nú ká'an i tnu'u va'a te ndani'i i ja vii ja va'a, te nú ká'an i ja u'vi te ndani'i i ja u'vi.

²¹ Vaa nuna ka'an maa ñayii ja va'a ma te koteku kani i, kovaa nú ma ko koto va'a maa i tnu'u ká'an i ma chi maa tnu'u ká'an i ma sa'a ja kûu‑ni i.

²² Suchi jaa ní'i ñasi'i ma chi in ja vii ja va'a ni kuta'vi i, vaa ni kunda'vi ini Su'si ma i, te ni skuta'vi ya i ñasi'i i ma.

²³ Ñayii kúnda'vi kúkee ma chi ká'an vii ká'an va'a ká'an kuee i, kovaa ñayii kúxiku ma chi ndákone'e jatu ndákone'e kini i nuu ñayii ma.

²⁴ Ñayii iyo in ñayii kétna'a ini ji'in i ma chi vivii ka chindee tna'a i, te iyo nuu kúu chi va'a‑ka ka iyo i ji'in suchi ka ketna'a ini ji'in i ma sana in ñani maa i.