Proverbios 17 - New Testament Psalms and Proverbs in Mixtec Magdalena Peñasco

¹ Va'a‑ka kúu ja visi xita yichi‑ni na kaa o te koo sii ini o ve'e o ma sana ja koo kua'a ja kaa ja ko'o o te ndimaa koo tnu'u jatu tnu'u ndi'vi.

² In ñayii ndichi ma, te visi suchi jinukuechi kúu i ma chi kuu tatnuni‑ka i sana sa'ya jito'o i ma ja so'o xeen kaa i nuu de ma, te ora jin ni'i sa'ya jito'o i ma ta'vi i ma chi suni ni'i tna suchi jinukuechi ma ja kuu ta'vi i.

³ Oro ma ji'in plata ma chi nuu ñu'u ma ja'an i sukan‑va'a kuni o nú iyo nanimaa i, kovaa Su'si ma chi ora ndó'o néni o ma, te jini ya naxe ka iyo ini anua o a.

⁴ Ñayii sa'a ja u'vi ma ji'in ñayii tnu'u ma chi játna ini i ja koniniso'o i ja ka ka'an ñayii ka sa'a ja u'vi ma.

⁵ Ñayii jákundee ñayii nda'vi ma chi sa'a i ja ndákiti ini Su'si iya ni sa'a ña'a ma, te ñayii kúsii ini ja jini i sukan ndó'o néni in‑ka ñayii ma chi masu yanduu ja ndaxndo'o ndaxneni ña'a Su'si ma.

⁶ Jayiñu'u ñayii nija'nu ma ka kuu sañani i ma, vaa ka sa'a suchi kuechi ma ja ka iyo sii ini ta'nu i ma. Te suchi kuechi ma chi ka iyo sii ini i ja ka iyo yuva i ma te ka sa'a de ja va'a ma.

⁷ Ñayii masu ndása'a kuenda ma te vivii ká'an i te ndúku i ja xnda'vi i in‑ka ñayii ma, chi ma kee va'a i. Te ni a tee tátnuni ma te ma ka'an ndaa de te xnda'vi de ñayii ma, masu kee va'a tna de.

⁸ Ñayii ni kaan ja ndimaa wa'a i xu'un in‑ka ñayii ma te ní'i i nawa kúni i ma, chi jani ini i ja iyo xeen tnu'u ndatnu i, vaa ndimaa kúndee i ní'i i ndaka nawa kúni i ma.

⁹ Ñayii sákanu ini ñayii ni sa'a ndeva'a ña'a ma chi ja ndúku i kúu ja koo mani i ji'in ñayii yukan, vaa kútoo i ñayii ma, kovaa ñayii nuu‑ni nuu‑ni ndákune'e i ja ni sa'a ña'a in‑ka ñayii ma chi masu kua'a‑ni, sani te masu na in ketna'a‑ka ini ji'in i.

¹⁰ Ñayii ndása'a kuenda ma chi ja ka ndaka'an‑so'o ñayii ma nuu i ma, sani te jáku'ni ini i, kovaa ñayii ndee ini ma chi visi cientu jichi na jin kua'a ña'a i yutnu xii chi masu jaku'ni ini i.

¹¹ Ñayii kívi nduu kívi ni'ni ma chi ndimaa ndúku i na in kanaa ji'in i, te ja sukan sa'a sukan kúu i ma chi kenda in ñayii kene'e ta'vi ña'a.

¹² Va'a‑ka ja nukun‑tna'a o ji'in in kiti yuku kiti xeen ma sana ndatna'a o ji'in in ñayii ñatuu nini nawa ka'an o ma te ûni sa'a maa i ja u'vi ñu'u ini i ma.

¹³ Ñayii ndasa'a ja u'vi ja kuu ñayii sa'a ña'a ja va'a ma, nanimaa ja u'vi koo ve'e i ma.

¹⁴ Ñayii skeja'a ja kanaa i ma chi kuenda tnu'u ja ni ndakune i in nuu ñu'u ndute kua'a xeen ma te kua'a ja xnaa de ma, sukan kúu i, kovaa yo'o chi va'a‑ka ja kakayata o nuu ñayii yukan sana ja kuka'nu‑ka te kanaa o ji'in i.

¹⁵ Saxiko Su'si ma ñayii kúji'in ji'in ñayii sa'a ja u'vi ma xi ñayii xtekuechi ñayii ñatuu na kuechi ma ja na chunaa i in ja masu ni sa'a i ma.

¹⁶ Ñayii ndee xeen ini ma chi masu nde jiniñu'u ja neva'a kua'a xeen i xu'un i ma, vaa ni masu kuu kuaan i tnu'u ndichi Su'si a ji'in xu'un i ma, vaa ni masu jaku'ni ini i ma.

¹⁷ Ñayii kétna'a ndija ini ji'in in‑ka ñayii ma chi ni‑kani ni‑jika kútoo i ñayii yukan, te kivi kénda tnu'u xii ini ma chi ka chindee tna'a i kuenda tnu'u ja ndi-tna'a ñani i.

¹⁸ Ñayii kúu yunuu in‑ka ñayii jikan yika nawa kúni i ma chi in ñayii ñatuu jáku'ni ini kúu i ja sa'a i sukan, vaa nú ma ndachunaa ñayii ma chi maa i kuiso.

¹⁹ Ñayii játna ini ja kanaa i ma te su'va su'va ndúku i ñayii xtna'a i ma, te ja sukan kúu maa i ma chi masu ndóñu'u na in kene'e ta'vi ña'a.

²⁰ Ñayii nde'e xeen kaa ini ma chi masu kee nawa ñu'u ini i ja sa'a i ma, te ja sukan ká'an tnu'u i ma, te jákun‑nee i nuu ja u'vi ma.

²¹ Ñayii kúu yuva suchi so'o xeen kaa ma chi ndimaa tnu'u xii ini koo i sa'a sa'ya i ma, te ñatuu na tnu'u sii ini koo nuu i ja sukan ndee ini sa'ya i ma.

²² Ja koo sii ini ini anua o ma chi kuenda tnu'u ja in jatatna kúu i nuu yikikuñu o ma, kovaa nú nanimaa tnu'u xii ini koo ini anua o a chi onde yiki o ma xsichi i.

²³ Ñayii sa'a ja u'vi ma chi játna ini i ja yuyu'u‑ni tnii i xu'un ma, te masu ka'nde ndaa i tniñu ñayii ni sa'a ja u'vi ma.

²⁴ Ñayii jáku'ni ini ma chi ndí ini i naxe ni'i‑ka i tnu'u ndichi Su'si ma te ni'i ini i naxe koo i ñuu ñayivi a, kovaa ñayii sa'a so'o nuu Su'si ma chi jani ya'a jani yukan‑ni ini i, te masu ñu'u ini i ja koo va'a i nuu Su'si ma.

²⁵ Tee neva'a sa'ya de suchi so'o xeen kaa ma chi sa'a i ja ndákiti ini yuva i ma te kúkan‑nuu de ja sukan kúu i ma, te sa'a i ja kúxii xeen ini si'i i ma.

²⁶ Masu va'a ja xndo'o o ñayii masu na kuechi ma te sa'a o ja chunaa i in ja masu nawa ni sa'a i ma, ni a sa'a ndeva'a o ñayii kanuu ma te sa'a i ja va'a ma.

²⁷ Ñayii ndichi ma chi kánda i te masu ká'an yachi i te kaa kuee xeen ini i, vaa ñayii ndichi kúu i.

²⁸ Nawa kúu ja onde ñayii so'o xeen kaa i te ñatuu jáku'ni ini i ma te iyo ora nawa ndáku ma te ñatuu ká'an kuiti i ma, chi ka ka'an ñayii ma ja in ñayii ndichi kúu tna i. Chukan kúu ja ñayii kánda‑ka ma te jasiyu'u‑ka i ma chi ñayii ndichi kúu i.