Proverbios 16 - New Testament Psalms and Proverbs in Mixtec Magdalena Peñasco

Tnu'u ndichi Su'si ma chi chindee ña'a i ja ko kuu o in ñayii sa'a ja va'a ja ndaa

¹ Ñayii ma chi kua'a xeen ja jani ini i ja kuu sa'a i, kovaa maa Su'si ma kúu Iya ka'an nú ko kuu sukan jani ini i ma xi ña'a.

² Ndaka ja sa'a ja kúu ñayii ma chi jani ini maa i ja ja va'a‑ka kúu nuu Su'si ma, kovaa maa ya chi jini ndaa ya nú ja va'a kúu xi ña'a.

³ Va'a‑ka sonee o nuu nda'a Su'si ma nde a jani ini o ja sa'a o ma te maa ya sa'a ja ko kuu sukan jani ini o ma.

⁴ Ndaka ja ni sa'a ya ñuu ñayivi a chi jâ ni jani ini ya naxe jin ko kuu i te ni sa'a ya ma, nawa kúu ja onde ñayii sa'a ja u'vi ma chi jâ ndetu ña'a kivi ndachunaa i ja u'vi sa'a i ma.

⁵ Su'si ma chi saxiko ya ñayii inuvixi xeen ka ndaa i ma te ka jani ini i ja maa i ka kuu‑ka ma, te ja sukan ka sa'a i ma chi masu yanduu ja ndaxndo'o ndaxneni ña'a Su'si ma, vaa iya sa'a ndaa kúu ya.

⁶ Ñayii ûni kútoo ndija Su'si ma te sa'a i ja va'a ja ndaa ma chi ñatuu na kuechi kondiso i nuu Su'si ma. Ñayii yu'u Su'si ma ja iya ndákan kuenda kúu ya ma chi xndoo i ichi u'vi ma.

⁷ Vaa Su'si Iya Tátnuni ma, nuna játna ini ya ja sukan sa'a sukan kúu ñayii ma chi sa'a ya ja onde ñayii kúni u'vi nuu i ma ndumani ji'in i.

⁸ Va'a‑ka ja visi vala‑ni na ni'i o nú sa'a ndaa sa'a ndija o ma sana ja ni'i kua'a o ma te sakui'na o ma.

⁹ Ñayii ma, jani ini i nawa sa'a nawa kuu i ñuu ñayivi a, kovaa maa Su'si ma kúu iya ndaskaka va'a ña'a ichi ndaa ma.

¹⁰ Rey tee netniñu ma chi maa Su'si ma ni jani ña'a, te iyo de ja ka'nde ndaa de tniñu ñayii ma.

¹¹ Ja játna ini Su'si ma kúu ja chikua'a ndaa ñayii nawa xiko i ma, vaa maa ya ni sa'a sukan chikua'a o ma.

¹² Rey tee ka netniñu ma, masu ka jatna ini de ja u'vi ka sa'a ñayii ma, vaa nuu ka nukoo ka nukuiñi de ma chi ndimaa ja va'a ja ndaa iyo ja jin sa'a de, vaa sukan, te jin koo va'a de ñuu de ma.

¹³ Rey tee ka netniñu ma chi ka jatna ini de ja jin ka'an ndaa ñayii ma, te ûni ka kutoo de ñayii ñatuu ká'an tnu'u ma.

¹⁴ Rey tee netniñu ma chi nuna ndakiti ini de chi kuu tatnuni de ja jin ka'ni i ñayii ma, kovaa in ñayii ndichi ma chi kuu sa'a i ja ndukuee ini de.

¹⁵ Nú iyo sii ini rey tee tátnuni ma chi iyo tnu'u kanu ini ja jin koo va'a ñayii ñuu de ma, te ja sukan kúu de ma chi kuenda tnu'u ja in viko sa'a ja vivii kúun savi ma te vivii ndukuii ma, sukan kuu de.

¹⁶ Va'a‑ka kúu ja ko ndi ini o ja ko kuu o in ñayii ndichi ma sana ja ni'i o kua'a oro ma, te va'a‑ka kúu ja jáku'ni ini o sukan kúni Su'si ma sukan‑va'a ni'i ini o naxe ko sa'a ko kuu o sana ja ni'i kua'a o plata ma.

¹⁷ Ñayii sa'a ja va'a ja ndaa ma chi ûni ndí ini i ja kakayata i nuu ja u'vi ma, vaa ñayii jito va'a maa i ja ñatuu na ja u'vi‑ka sa'a i ma chi kaku i te ma skenaa i maa i.

¹⁸ Ñayii jani ini ja maa i kúu‑ka ma chi ja ndetu ña'a kúu ja skenaa i maa i ma, te ñayii kúvixi xeen ma chi ni masu kee va'a ja jani ini i ja sa'a i ma.

¹⁹ Va'a‑ka ja na kani ini o ja masu nawa kúu o te koo o ne'un ñayii nda'vi ma, sana ja ko ni'i ko tna'a o ma te koo o ne'un ñayii ka jani ini ja maa i ka kuu‑ka ma.

²⁰ Ñayii niniso'o ñukuun i tnu'u Su'si a chi ja jani ini i ja sa'a i ma chi kee va'a te koo va'a‑ka i. ¡Naka vii naka va'a kúu ñayii kúkanu ini Su'si o Iya Tátnuni a!

²¹ Ñayii ndichi ma chi ñayii jáku'ni ini kúu i, vaa tnu'u vii tnu'u va'a ká'an i ma, te sa'a i ja ka ndundichi‑ka ñayii ka niniso'o ja ká'an i ma.

²² Ñayii ndichi ma chi ja ndetu ña'a ja ni'i i kúu ja koteku kani i, kovaa ja ni'i maa ñayii so'o xeen kaa ma kúu ja ndando'o ndaneni i ja u'vi sa'a i ma.

²³ Ñayii ndichi ma chi kaji kaji‑ni i tnu'u va'a ká'an i, te tnu'u ká'an i ma káxtnu'u ja ñayii jini nawa sa'a i ma kúu i,

²⁴ vaa kuenda tnu'u ja sukan asi jaa nduxi ñuñu ma, sukan ka kuu tnu'u vii tnu'u mani ká'an ñayii ma, vaa sa'a i ja ndusii ini yikikuñu o.

²⁵ Ka iyo jaku ñayii chi ka jani ini i ja ichi va'a ma kuan koo i, kovaa masu nde ka ndasa'a maa i kuenda ja ndita ndita ichi nuu jin skenaa i maa i ma kuan koo i.

²⁶ Ñayii kokon ma chi ja kokon i ma sa'a ja satniñu xeen‑ka i, sukan‑va'a ni'i i ja kaa i ma.

²⁷ Ñayii nanimaa ja u'vi ñu'u ini anua i ma chi ndimaa jani ini i naxe sa'a‑ka i ja u'vi ma, te sukan sa'a ñu'u káyu kóko ma ja xnaa ndi'i i nawa iyo nuu káyu ma, sukan ka kuu tnu'u ká'an i ma,

²⁸ vaa ñayii sa'a nanimaa ja u'vi ma chi sa'a i ja ka kanaa ñayii ma, te ñayii tnu'u ma chi sa'a i ja ka ndakiti ini nuu tna'a ñayii ka ketna'a ini ma.

²⁹ Ñayii nde'e xeen kaa ini ma chi xnda'vi i in‑ka ñayii ma te skaka i ñayii ma ichi u'vi ma,

³⁰ te ndákueni kutu kutu i te jani ini i ja u'vi‑ka sa'a‑ka i, te nú jâ ni sa'a i ja u'vi ma chi ndákayi'i vava'a i ñii yu'u i ma‑ni.

³¹ Ñayii jâ ni kuu nija'nu te jâ ni vixi xini i ma chi jayiñu'u kúu nú ni yo sa'a i ja vii ja ndaa ma.

³² Ja va'a kúu ja kava kuee ini o ma sana ja ko kuyachi ini o te ndimaa ko kanaa o ma, te ja va'a‑ka kúu nú kúndee o kánda o te kaa kuee ini o ma sana ja kundee o tatnuni o nuu ñayii kua'a iyo in ñuu ma.

³³ Ñayii ma chi ja ñu ini maa i‑ni te jani ini i naxe sa'a i ma, kovaa masu nde ndása'a i kuenda ja Su'si ma kúu iya ka'an nú saa xi ña'a.