Proverbios 13 - New Testament Psalms and Proverbs in Mixtec Magdalena Peñasco

¹ Suchi ndichi ma chi jan‑ta'vi i ja ndáka'an so'o yuva i ma nuu i, kovaa suchi so'o xeen kaa ma chi masu nde kándija i ja ndáka'an so'o yuva i ma nuu i.

² Ndi‑in ndi‑in o chi jin ndani'i jin ndatna'a maa o sukan ka ka'an o ma, kovaa ñayii ñatuu va'a ini te ke'en su'va i in‑ka ñayii ma chi ndimaa ja sa'a ndeva'a i in‑ka ñayii ma ñu'u ini i.

³ Ñayii ndása'a kuenda te ñatuu ká'an yachi i ma chi ja jito va'a i maa i kúu, kovaa ñayii ñatuu nde ndása'a i kuenda ma te ká'an yachi i ma chi maa i‑ni sa'a ja jákun‑nee i nuu tnundo'o ma.

⁴ Ñayii kuxi ma chi ndíyo ini i kua'a ja koneva'a i kovaa masu nawa ni'i i, kovaa ñayii ndí ini ja satniñu i ma chi ve ni'i ve tna'a‑ka i.

⁵ Ñayii sa'a ja va'a ja ndaa ma chi masu játna ini kuiti i ja xnda'vi tna'a o ma, kovaa ñayii sa'a ja u'vi ma, ja kan‑yu'u ja kan‑nuu ni'i i, vaa masu ka jatna ini ñayii ma ja sa'a ja kúu i ma.

⁶ Ñayii jika ndaa nuu Su'si ma chi ja va'a ja ndaa sa'a i ma jito va'a ña'a, kovaa ñayii sa'a ja u'vi ma chi maa ja u'vi sa'a i ma xnaa ña'a.

⁷ Ka iyo ñayii ka sa'a tnu'u ja xiku ka kuu i kovaa masu nawa ka neva'a kuiti i, te suni ka iyo tna ñayii ja ka sa'a i tnu'u ja ñayii ka kunda'vi ka kukee ka kuu i, visi ka ni'i ka tna'a i.

⁸ Ñayii ka kuxiku ma chi ka iyo‑ka ñayii ka xtna'a ña'a ja jin sa'a u'vi ña'a i, kovaa chíndee ña'a xu'un i ma te ka kaku i. Kovaa ñayii ka kunda'vi ma chi masu na in xtna'a ña'a.

⁹ Ñayii ka sa'a ja va'a ja ndaa ma chi sukan kúu in ñu'u tnúu jajaa ma, sukan ka kuu i, kovaa ñayii ka sa'a ja u'vi ma chi sukan ni ka nda'va ñu'u ma, sukan‑nka‑ni ka kuu i.

¹⁰ Ñayii jani ini ja maa i kúu‑ka ma chi yika‑ni ja ndúku i kúu ja kanaa i ji'in in‑ka ñayii ma, kovaa ñayii jan‑ta'vi ja ka ndaka'an so'o i nuu i ma chi in ñayii ndichi kúu i.

¹¹ Ñayii xnda'vi in‑ka ñayii ma te kúxiku i ma chi masu kunitnuni i te ndi'i xu'un i ma, kovaa ñayii satniñu ji'in nda'a i te kúu tava'a i xu'un i ma chi ndi‑vala ndi‑vala te kukua'a‑ka.

¹² In ja ndetu ñayii ma ja ni'i i ma te kuee kénda ma, te chukan chi sa'a i ja kúxii ini i, kovaa ora kénda ja ndetu o ma chi sukan kúu in yutnu téku ja kuikuii iyo tnu ma sukan kúsii ini o.

¹³ Ñayii saxiko te ñatuu jatanuu i ja sa'a i ja ni kucargu i ja sa'a i ma chi ndo'o xeen i ja ñatuu ni kandija i ma te ndakani ini i, kovaa ñayii ndí ini te ni‑yu'u ni‑ini i jatanuu i sa'a i ja ni kucargu i ma chi koo va'a xeen i te koo sii ini xeen i ja ni kundee i ni sa'a i ma.

¹⁴ Ndaka tnu'u va'a káxtnu'u ñayii ndichi ma chi suu i chindee ña'a ja kaku o ja ma ki'in o ichi nuu skenaa o maa o ma, te koteku o.

¹⁵ Ñayii ka jaku'ni ini te ka sa'a i sukan kúni Su'si ma chi kuatnu'u ini ña'a Su'si ma te skuta'vi ña'a ya ja vii ja va'a, kovaa ñayii sa'a so'o nuu Su'si ma chi ndimaa ndo'o neni i, vaa ñatuu játna ini Su'si ma ja sa'a i ma.

¹⁶ Ñayii ndichi ma chi ndása'a i kuenda te sa'a i ja va'a ma, kovaa ñayii ñatuu ndása'a kuenda ma te sa'a maa i ja u'vi ma chi ndáxtuu i maa i ja ñayii so'o xeen kúu i nuu Su'si ma.

¹⁷ Ñayii kúcargu in ja ki'in i jin kaxtnu'u i ma te nú ma ndakani ndaa i ma chi sa'a i ja kua'a tnundo'o jin tna'a ñayii ma, kovaa ñayii ndákani ndaa sukan iyo ma chi sa'a i ja ka iyo sii ini ñayii ma.

¹⁸ Ñayii saxiko ja ka ndaka'an so'o ñayii ma nuu i ma chi ko kunda'vi ko kukee i te ndatna'a i ja kan‑nuu, kovaa ñayii jan‑ta'vi ja ka ndaka'an so'o i nuu i ma chi ndani'i i jayiñu'u.

¹⁹ Ñayii ni kundee ja ni xndoo i ja u'vi ma te sa'a i ja va'a ma chi iyo sii ini xeen i, kovaa ñayii so'o xeen kaa ma chi ñatuu játna ini i ja xndoo i ja u'vi ma.

²⁰ Ñayii ndikin tna'a ji'in ñayii ndichi ma chi ñayii ndichi ko kuu tna i, kovaa ñayii ndikin tna'a ji'in ñayii inuso'o xeen ka ndaa ma chi ko kuu tna i sukan te skenaa tna i maa i.

²¹ Te ñayii ka sa'a ja u'vi ma chi ndimaa ja u'vi ma ndetu ña'a, kovaa ñayii sa'a ja va'a ja ndaa ma chi nanimaa ja va'a ma ndani'i i.

²² Ñayii sa'a ja va'a ja ndaa ma chi ndaka ja neva'a i ma ndaskuta'vi i sañani i ma, kovaa ja ni xtutu ñayii sa'a ja u'vi ma chi ñayii ka sa'a ja va'a ja ndaa ma jin ndunda'a.

²³ Ñayii ka kunda'vi ma te ka satniñu ñukuun i itu i ma chi ka ni'i kua'a i ja jin kaa jin ko'o i, kovaa kénda koo ñayii ka sa'a ja u'vi ma, te ndi'i ka ndaxtandee i.

²⁴ Ñayii nde'ya ja u'vi sa'a sa'ya i ma te ñatuu na tnu'u xeen kéne'e i nuu suchi ma, sukan‑va'a ndasa'a i kuenda te ma ko sa'a‑ka i ja u'vi ni sa'a i ma chi ñatuu kútoo i sa'ya i ma, kovaa ñayii kútoo sa'ya i ma chi onde luluu suchi ma te jâ iyo tnu'u xeen nuu i ma.

²⁵ Ñayii sa'a ja va'a ja ndaa ma chi ko ni'i i ja kaa i onde ndutu va'a chii i ma, vaa maa Su'si ma kua'a, kovaa ñayii so'o xeen kaa ma chi ko ka'ni ña'a i ja kaa i ma te ko kokon ko yichi i.